Read koho Este 3 Bible Online

Este 3 - koho bible

Este 3

¹Tơnơ̆ mơ ală broă hơ̆, bơtau Ahasuerus bơtào tơngguh gơnoar broă Haman in, kòn klau Hammedatha cau Agak, bơtào khai mơ ơn khai in nggui tiah hơđang rlau jơh mơ ală cau kwang at bồ bal mơ khai.

²Mơ jơh ală cau kwang duh broă bơtau la ală cau ơm di mpồng gơlang bơtau kun khoai mơ sền dờng màng di Haman; bơh bơtau neh ai gơnoar sồr pal lơh behơ̆ gơwèt mơ khai. Mơya Mordike ò kun khoai hala duh rngòt di khai.

³Gen ală cau duh broă ơm di mpồng bơtau dê lùp Mordike lah: “Ñchi bơh tài mê ò dòn bơr gơnoar sồr cau bơtau dê taih?”

⁴Bol hơ̆ đơs mơ khai bơh ngai do tus hơ ngai ne, mơya khai ò bài iat bol hơ̆, bol khai yal mơ Haman nàng sền bơta Mordike neh lơh hơ̆ rơp gơlik be lơi, bơh khai neh yal bol hơ̆ in khai la cau Juda.

⁵Tòm tŭ Haman gŏ Mordike ò kun khoai mơ duh rngòt di khai, gen Haman gơhào gơjrañ ngan.

⁶Mơya khai kơlôi lah ò kwơ khai in dilah mìng tơnroh dô nă Mordike lơm; behơ̆ tòm tŭ Haman neh jòi git làng bol Mordike dê la làng bol lơi, gen Haman bơtào kai gơrmơ̆i nàng tơnroh jơh ală cau Juda, làng bol Mordike dê tòm làm jơh lơgar Ahasuerus dê.

⁷Tòm nam jơt bàr rài at bồ bơtau Ahasuerus dê, tòm kơnhai dùl la kơnhai Nisan, bol khai tĕ phur (hơ̆ la tĕ khà) di đap Haman nàng sac rwah bơh ngai mơ kơnhai. Mơ khà neh tĕ di kơnhai jơt bàr la kơnhai Adar.

⁸Gen Haman đơs mơ bơtau Ahasuerus lah: “Gơs dô nơm làng bol gơprah ơm nrah nring digùl ală làng bol tòm jơh ală kơnhwàl lơgar bơtau dê. Ală bơta boh lam bol khai dê la krơi is mơ jơh ală làng bol ndai dê, mơ bol khai ò lơh jat ală bơta boh lam bơtau dê; gen tàng ò di pal ngan bơtau in kong ơt di bol khai.

⁹Dilah bơta do niam nùs bơtau gen dan bơtau tơlik dô bơta lơh nền nàng tơnroh bol khai, mơ añ rơp ơn jơt rbô talơng priă tòm tê ală cau kwang cau bơtau dê, nàng bol kai tơmut gơtòm đam jàr bơtau dê.”

¹⁰Behơ̆ cau bơtau hồ sơmbiat ƀang kì bơh di tê bơtau dê mơ ai Haman kòn klau Hammedatha in cau Agak la cau sò tơm di cau Juda.

¹¹Bơtau đơs mơ Haman lah: “Prap gàr tĕ jền priă mê in, mơ lơh di làng bol jat nùs mê kòñ.”

¹²Gen ală cau cih sră bơtau dê pơjum bal tòm ngai jơt pe kơnhai dùl, mơ dô gơnoar sồr, jat be gơnoar Haman dê, neh geh cih tus hơ bơtau oh mơ kwang dờng at bồ hơđang ală kơnhwàl dê mơ tus hơ ală cau kwang at bồ jơh làng bol, tus hơ kòp kơnhwàl jơnau đơs kòp làng bol dê. Ală sră hơ̆ geh cih tòm sơnđan să tòm bơtau Ahasuerus dê mơ geh tap ƀang kì bơtau dê.

¹³Ală sră hơ̆ geh pơyoa bơh ală cau ling cèng tus hơ jơh ală kơnhwàl lơgar cau bơtau dê, cih gơnoar sồr nàng tơnroh, tơnchơt mơ pơndut tơnlồi jơh ală cau Juda, cau pơnu mơ cau kra, cau ùr mơ kơnòm dềt, mìng tòm dô ngai la ngai jơt pe kơnhai jơt bàr la kơnhai Adar, mơ phà kơñau ală phan mơna bol khai dê.

¹⁴Dô pang sră geh cih tơlik mơ geh pơyoa làm jơh be dô bơta lơh nền tòm kòp kơnhwàl bơh jơnau yal tơnggit, hòi jà jơh ală làng bol pal rcang sir bơh ngai hơ̆,

¹⁵Ală cau geh kong sồr lik lòt sơrbac sơrbang jat jơnau gơnoar sồr cau bơtau dê, mơ bơta lơh nền neh geh yal tơlik tòm Susa la ƀòn dờng bơtau dê. Cau bơtau mơ Haman nggui ñô tơrnòm, mơya ƀòn dờng Susa gen sơlồng sơlàng.