Read koho Este 4 Bible Online

Este 4 - koho bible

Este 4

¹Tòm tŭ Mordike neh kơno jơh ală bơta neh gơlik gơs rau, khai crè ồi ào khai dê, soh ƀào sơnò kiat mơ ơm tòm bùh, lòt làm ƀòn dờng, ñìm rac dờng jơnau dô bă sràt bơtang ngan.

²Mơya khai mìng lòt tus di đap mpồng gơlang bơtau dê lơm, bơh ò gơs cau lơi soh ƀào sơnò kiat geh gơnoar mut tòm mpồng hơ̆.

³Tòm kòp kơnhwàl tiah lơi gơnoar sồr mơ bơta lơh nền bơtau dê neh tus, gen tềng hơ̆ gơs bơta ñìm rac moat jrùng digùl ală cau Juda, bal mơ bơta ơt sa, ñìm mơ rac ròc, mơ oă cau tòm bol khai soh ào ƀào sơnò kiat mơ bic tòm bùh.

⁴Tòm tŭ ală cau ùr duh broă Este dê mơ ală cau kwang kriau mò dê tus yal mò in, gen bau ùr bơtau moat jrùng ngan. Khai pơyoa ào jrùh Mordike in soh, nàng khai hồ ào ƀào sơnò kiat, mơya khai ò bài dòp gơ.

⁵Gen Este hòi Hathak la dô nă cau kwang kriau bơtau dê neh geh sồr duh broă Este mơ sồr khai lòt tus hơ Mordike nàng git bơta neh gơlik gơs mơ ñchi bơh tài neh gơs behơ̆.

⁶Behơ̆ Hathak lòt tus hơ Mordike tòm ƀlàng jơnum ƀòn dờng, di đap mpồng gơlang bơtau dê.

⁷Mordike yal Hathak in jơh ală bơta neh gơlik tus di khai, mơ yal tòm toh khà priă Haman neh ho ơn tòm đam jàr bơtau dê nàng tơnroh làng bol Israel.

⁸Khai kung ai Hathak in dô pang sră neh pơyoa tòm Susa cih bơta lơh nền bơtau dê tòm bơta tơnroh làng bol Israel nàng sơnio mơ yal tơlik Este in, mơ Mordike kung sồr Hathak chồl Este lòt tus hơ cau bơtau nàng dan bơta nđàc mơ dong tò làng bol khai in.

⁹Hathak rê mơ yal wơl Este in git jơh ală bơta Mordike neh đơs.

¹⁰Gen Este sồr Hathak đơs mơ Mordike lah:

¹¹“Jơh ală cau kwang duh broă bơtau mơ làng bol tòm ală kơnhwàl bơtau dê git lah dilah cau klau hala cau ùr lơi lòt tus hơ cau bơtau tòm hìu dơlam mơ ò geh cau bơtau hòi tus gen cau bơtau gơs mìng dô bơta boh lam lơm: cau hơ̆ pal kong lơh glài tơnchơt. Mìng dilah bơtau yơr gai gơnoar at bồ cau hơ̆ in, gen cau hơ̆ rgơi geh kis. Să tòm añ òhềt geh hòi tus hơ cau bơtau neh dô kơnhai rau.”

¹²Tòm tŭ ală jơnau Este dê neh geh yal wơl Mordike in,

¹³gen Mordike sồr ho wơl Este in lah: “Bañ kơlôi lah tài bơh ai ơm tòm gơlang bơtau dê, gen ai rơp geh klàs rlau mơ ală cau Juda ndai.

¹⁴Bơh dilah ai ơm mŏ mŏ tòm tŭ gơs bơta be do, gen bơta dong kòl mơ dong tă rơp tơngguh làng bol Israel in bơh đah ndai, mơya ai mơ hìu nhă bèp ai dê rơp kong roh rui. Mơ ñcau rgơi git taih? Digơlan ai geh gơlik bau ùr bơtau ò di la tài bơh dô tŭ tơngai be do ò ơ?”

¹⁵Behơ̆ Este sồr ho wơl ală jơnau do Mordike in:

¹⁶“Lòt pơjum tĕ jơh ală cau Juda ơm tòm Susa, mơ tài bơh añ mơ ơt sa. Bañ sa hala hùc tòm pe ngai mơ pe mang. Añ mơ ală cau ùr duh broă añ kung rơp ơt sa sơl. Tòm tŭ neh lơh behơ̆ rau, añ rơp lòt tus hơ cau bơtau bulah bơta hơ̆ la tìs mơ bơta boh lam. Mơ dilah añ pal chơt gen añ chơt.”

¹⁷Behơ̆ Mordike lòt mơ lơh jat jơh ală bơta Este neh sồr khai lơh.