Read koho Este 6 Bible Online

Este 6 - koho bible

Este 6

¹Tòm mang hơ̆ cau bơtau ò rgơi bic; behơ̆ khai ai jơnau gơnoar sồr cau cèng tus sră cih yal yau kòp nam mơ cau sền bơtau in iat.

²Cau sền gŏ bơta neh cih tòm hơ̆ bơh Mordike neh yal tơnggit kai gơrmơ̆i Bikthan mơ Teres dê la bàr nă cau kwang kriau duh broă bơtau kơp gàr mpồng gơlang, la ală cau bơtào tòmdră kòñ tơnchơt òm bơtau Ahasuerus.

³Bơtau lùp lah: “Ñchi bơta neh geh jòng ro hala phan ƀàn lơi neh ai Mordike in bơh bơta do sơl?” Ală cau kwang ơm rềp bơtau ho lah: “Ò gơs bơta lơi neh lơh khai in.”

⁴Bơtau đơs lah: “Ñcau ơm tòm ơdŭ bơdìh gơlang dê taih?” Tŭ hơ̆ Haman pa mut tòm ƀlàng jơng bơdìh gơlang bơtau dê nàng dan bơtau yồng Mordike di jrong yồng cau mơ khai neh bơtào Mordike in.

⁵Ală cau kwang ơm rềp bơtau ho lah: “Haman ơm ntào tòm ƀlàng bơdìh gơlang bơtau dê.” Cau bơtau ai jơnau sồr lah: “Sồr khai mut tĕ!”

⁶Tòm tŭ Haman neh mut gen cau bơtau lùp khai lah: “Ñchi pal lơh di cau mơ cau bơtau kòñ bơtào khai geh jòng màng taih?” Haman kơlôi is bơh să tòm khai lah: “Gơs cau lơi mơ bơtau kòñ bơtào jòng màng rlau mơ añ taih?”

⁷Behơ̆ khai ho mơ bơtau lah: “Gơwèt hơ cau mơ bơtau kòñ bơtào jòng màng,

⁸gen cèng tĕ ào jrùh mơ cau bơtau neh soh mơ dô nơm ơseh mơ cau bơtau neh hào, la ơseh geh bơka hàng mơnĕ bơtau in.

⁹Gen jào ào jrùh mơ ơseh tòm tê dô nă cau kwang dờng ryŭ ryơm rlau jơh bơtau dê. Lòi bol khai tơnsoh ào jrùh di cau mơ bơtau kòñ bơtào jòng màng, mơ tề ơseh gơs cau hơ̆ hào hơđang lòt tòm ală gùng ƀòn dờng dê, mơ driau dờng di đap khai lah: ‘Do la bơta pal lơh di cau mơ bơtau kòñ bơtào jòng màng!’”

¹⁰Gen cau bơtau ai jơnau sồr Haman lah: “Lòt tĕ mo, cèng ào jrùh mơ ơseh mơ lơh tòm toh jat be mê neh đơs hơ̆ Mordike in la cau Juda ơm nggui di mpồng gơlang bơtau dê. Bañ sang lòi bơta lơi mơ mê neh đơs hơ̆.”

¹¹Behơ̆ Haman ai ào jrùh mơ ơseh. Khai tơnsoh ào jrùh Mordike in mơ tề ơseh gơs Mordike hào hơđang, mơ lam lòt tòm ală gùng ƀòn dờng dê mơ driau dờng di đap khai lah: “Do la bơta pal lơh di cau mơ bơtau kòñ bơtào jòng màng!”

¹²Tơnơ̆ mơ hơ̆, Mordike rê wơl hơ mpồng gơlang bơtau dê. Mơya Haman sơrbac sơrbang rê hìu, moat jrùng mơ gòm bồ,

¹³mơ yal wơl Jeres bau khai in mơ jơh ală oh mi bơyô khai dê jơh ală bơta neh gơlik tus di khai. Ală cau jak bơyai broă khai dê mơ Jeres bau khai dê đơs mơ khai lah: “Mê neh sơntòm kong alah di đap Mordike, mơ tài bơh khai la jơi cau Juda gen mê ò jai tòmdră mơ khai; ngan la mê rơp kong alah di đap khai!”

¹⁴Tòm tŭ bol khai gam đơs mơ Haman gen ală kwang kriau bơtau dê tus chồl khai lòt mhar tus hơ bơta ñô sa dờng mơ Este neh yò.