Read koho Este 7 Bible Online

Este 7 - koho bible

Este 7

¹Behơ̆ cau bơtau mơ Haman lòt ñô sa bal mơ Este bau ùr bơtau,

²tòm ngai dơ̆ bàr tòm tŭ bol khai ơm ñô tơrnòm, bơtau lùp Este tai lah: “Ơ Este bau ùr bơtau, ñchi bơta ai kòñ dan taih? Gơ rơp geh ai ai in. Ñchi bơta ai dan taih? Bulah tus di nggùl lơgar añ jê, gơ kung rơp geh ai wil tơl.”

³Gen Este ho lah: “Ơ bơtau, dilah añ geh bơta nđàc di đap bơtau, mơ dilah bơta hơ̆ niam nùs bơtau gen dan bơtau ai añ in bơta kis, hơ̆ la bơta añ kòñ geh, mơ dan bơtau dong làng bol añ jê klàs chơt, hơ̆ la bơta añ kòñ dan.

⁴Bơh bol hi neh gơkòl tac, añ mơ làng bol añ jê rơp gơkòl tơnroh, tơnchơt mơ lơh roh rui jơh. Dilah bol hi mìng gơkòl tac nàng gơs dĭ klau dĭ ùr gen añ neh ơm mŏ mŏ, mơya bơta cau sò tơm di bol hi tơm bơtau in ò rgơi pơndròm mơ bơta roh gơcoh mơ bơtau pal kong.”

⁵Bơtau Ahasuerus lùp Este lah: “Cau hơ̆ la ñcau taih? Ntềng đah cau khin lơh dô bơta behơ̆ taih?”

⁶Este đơs lah: “Cau sòdră mơ sò tơm la Haman cau iơh bơsak do.” Gen Haman rngòt rngơt ngan di đap bơtau mơ bau ùr bơtau.

⁷Cau bơtau ñă ntào gơhào gơjrañ ngan, sang lòi tơrnòm mơ lik lòt hơ suơn gơlang dê. Mơya Haman ơm wơl rac dan Este dong klàs bơta kis khai dê, tài bơh khai đal git cau bơtau neh lơh nền nàng tơnroh khai.

⁸Tòm tŭ cau bơtau rê wơl bơh suơn gơlang bơtau dê tus hơ ơdŭ neh ơm ñô sa, gen Haman neh tơmbic să hơđang cơnòng jòng la tiah Este ơm sơnđìng să. Cau bơtau đơs lah: “Khai kung khin lơh iơh di bau ùr bơtau di đap añ tòm hìu tòm añ sơl ơ?” Jơnau pa lik bơh di bơr bơtau gen cau jơm muh mat Haman dê.

⁹Gen Harbôna la dô nă cau kwang duh broă ơm rềp di bơtau đơs lah: “Sền ne, dô nơm jrong yồng cau jòng pram jơt tal neh bơtào di gah hìu Haman dê. Khai neh bơtào gơ nàng yồng Mordike la cau neh yal tơnggit nàng dong bơtau.”

¹⁰Cau bơtau đơs lah: “Yồng tĕ ngko khai hơđang hơ̆!” Behơ̆ bol khai yồng Haman hơđang jrong yồng cau mơ khai neh rcang nàng yồng Mordike. Gen bơta gơjrañ bơtau dê geh rài.