Read koho Este 9 Bible Online

Este 9 - koho bible

Este 9

¹Ngai jơt pe kơnhai jơt bàr la kơnhai Adar, tòm tŭ gơnoar sồr bơtau dê mơ bơta lơh nền bơtau dê pal geh lơh jat, tòm ngai do tòm tŭ ală cau sò tơm di cau Juda kơp kòñ geh pha rlau mơ bol khai, mơya bơta hơ̆ neh geh tòmgơl gơlik gơs dô ngai ală cau Juda geh wơl gơnoar pràn hơđang ală cau sò tơm bol khai dê.

²Ală cau Juda pơjum bal dô bă tòm ală ƀòn dờng tòm làm jơh ală kơnhwàl lơgar bơtau Ahasuerus dê nàng brồ lơh ală cau neh jòi gùng tơnroh bol khai, mơ ò gơs cau lơi rgơi ntào jai tòmdră mơ bol khai, tài bơh bơta rngòt rngơt bơh bol khai neh dùh hơđang jơh làng bol.

³Jơh ală cau kwang at bồ tòm ală kơnhwàl, cau bơtau oh mơ ală cau kwang đơng lơgar, mơ ală cau kwang duh broă cau bơtau dê kung neh dong kòl ală cau Juda, tài bơh bol khai rngòt di Mordike.

⁴Bơh Mordike gơs gơnoar pràn ngan tòm gơlang bơtau, mơ bơta tiơng pơnro bơh khai neh yal làm jơh tòm ală kơnhwàl lơgar, khai sơlo ngai sơlo geh gơnoar pràn rlau tai.

⁵Behơ̆ ală cau Juda ai đào sreh jơh ală cau sò tơm di bol khai, tơnchơt mơ tơnroh bol khai; mơ lơh bơta lơi niam nùs bol khai kòñ gơwèt hơ ală cau lơi gơjrañ kơuềng di bol khai.

⁶Tòm ƀòn dờng kơ̆ cê Susa, cau Juda tơnchơt mơ tơnroh pram rhiang nă cau klau.

⁷Bol khai kung tơnchơt Parsandatha, Dalphôn, Abatha,

⁸Pôratha, Adalia, Aridatha,

⁹Parmasata, Arisai, Aridai mơ Baijatha,

¹⁰hơ̆ la jơt nă kòn klau Haman, kòn klau Hammedatha dê, la cau sò tơm di cau Juda. Mơya bol khai ò tòmpìt ai phan mơna.

¹¹Ntum khà cau neh kong tơnchơt tòm ƀòn dờng kơ̆ cê Susa neh yal cau bơtau in tòm ngai hơ̆.

¹²Cau bơtau đơs mơ bau ùr bơtau lah: “Tòm ƀòn dờng kơ̆ cê Susa cau Juda neh tơnchơt pram rhiang nă cau klau mơ jơt nă kòn klau Haman dê. Ñchi bol khai neh lơh tòm ală kơnhwàl ndai lơgar bơtau dê taih? Ñchi bơta ai dan taih? Gơ kung rơp geh ai ai in sơl.”

¹³Este ho lah: “Dilah niam nùs bơtau gen dan ai cau Juda ơm tòm Susa in, tòm ngai hìng kung gơs gơnoar lơh jat jơnau gơnoar sồr bơtau dê kung be tòm ngai do sơl, mơ ai gơnoar sồr yồng jơt nă kòn klau Haman dê hơđang jrong yồng cau.”

¹⁴Behơ̆ bơtau ai jơnau gơnoar sồr lơh jat behơ̆. Dô jơnau gơnoar sồr neh geh yal tơlik tòm Susa, mơ bol khai yồng jơt nă kòn klau Haman dê.

¹⁵Cau Juda tòm Susa pơjum bal dô bă tòm ngai jơt poan kơnhai Adar, mơ bol khai tơnchơt pe rhiang nă cau klau tòm Susa, mơya bol khai ò tòmpìt ai phan mơna.

¹⁶Tŭ hơ̆ ală cau Juda ndai tòm kơnhwàl lơgar bơtau dê kung rcang gàr bơta kis bol khai dê, geh dong tă bơh cau sò tơm bol khai dê, mơ tơnchơt poh jơt pram rbô nă ală cau gơjrañ di bol khai, mơya bol khai ò tòmpìt ai phan mơna.

¹⁷Bơta hơ̆ gơlik gơs tòm ngai jơt pe kơnhai Adar, mơ tòm ngai jơt poan bol khai ơm rlô mơ lơh ngai hơ̆ in gơlik gơs dô ngai pơjum sa mơ hòn chò.

¹⁸Mơya ală cau Juda ơm tòm Susa neh pơjum bal tòm ngai jơt pe mơ ngai jơt poan, mơ tòm ngai jơt pram gen bol khai ơm rlô mơ lơh ngai hơ̆ in gơlik gơs dô ngai pơjum sa mơ hòn chò.

¹⁹Tài bơh hơ̆ tàng ală cau Juda ơm tòm ƀòn lơgar, hơ̆ la ală cau ơm tòm ală ƀòn dềt, kah prap ngai jơt poan kơnhai Adar lơh gơs ngai hòn chò mơ ngai pơjum sa, dô ngai mơ bol khai pơyoa phan pà gòi bal mơ gơp.

²⁰Mordike cih prap ală bơta do, mơ khai pơyoa sră jơh ală cau Juda in tòm ală kơnhwàl lơgar bơtau Ahasuerus dê, cau ơm ngài mơ ơm rềp

²¹Sồr bol khai pal prap gàr ngai pơjum sa tòm ngai jơt poan mơ ngai jơt pram kơnhai Adar kòp nam,

²²be ală ngai mơ cau Juda neh geh dong klàs bơh di tê ală cau sò tơm di bol khai, mơ la kơnhai mơ bơta moat jrùng bol khai dê neh gơlik gơs bơta hòn chò, mơ bơta ñìm rac bol khai dê gơlik gơs dô ngai pơjum sa. Bol khai pal lơh ală ngai hơ̆ in gơlik ală ngai pơjum sa chò hòp mơ hòn chò, ală ngai bơta pơyoa phan pà phan sa bal mơ gơp mơ phan ƀàn ală cau rƀah in.

²³Behơ̆ cau Juda dòp be dô bơta òs mòng bơh ală bơta bol khai sơntòm lơh, be sră pơyoa Mordike neh cih bol khai in.

²⁴Bơh Haman kòn klau Hammedatha cau Agak la cau sò tơm di jơh ală cau Juda, khai neh rơndap kai gơrmơ̆i sòdră di cau Juda nàng tơnroh bol khai, mơ neh tă khà lơh roh rui mơ tơnroh bol khai.

²⁵Mơya tòm tŭ kai gơrmơ̆i hơ̆ neh geh yal tơnggit cau bơtau in gen cau bơtau cih ală sră jơnau gơnoar sồr lah ală kai gơrmơ̆i iơh bơsak mơ Haman neh bơtào gơs sòdră di cau Juda gen pal tuh wơl hơđang bồ khai, mơ khai bal mơ ală kòn klau khai dê pal kong yồng hơđang jrong yồng cau.

²⁶(Gen tàng ală ngai hơ̆ geh sơnđan la Phurim jat jơnau Phur.) Tài bơh jơh ală jơnau neh cih tòm sră pơyoa do mơ tài bơh ală bơta bol khai neh gŏ mơ neh gơlik gơs bol khai in,

²⁷Ală cau Juda dòp mơ bơtào kơ̆ be dô bơta òs mòng să tòm bol khai in mơ ală kòn sau bol khai in bal mơ jơh ală cau gơs dô bă bal mơ bol khai, bơta do ò geh sang lòi, bol khai pal pơnjat prap gàr bàr ngai do tòm kòp nam jat be neh cih mơ jat tŭ tơngai neh lơh nền.

²⁸Ală ngai do pal kah prap mơ lơh jat tòm kòp rài mơ bơh kòp hìu nhă, tòm kòp kơnhwàl lơgar mơ tòm kòp ƀòn dờng. Mơ ală ngai Phurim do rơp ò tŭ lơi lòi roh digùl cau Juda mơ ală ngai kah kirsơnre do bañ tŭ lơi dơh wơl digùl ală kòn sau bol khai dê.

²⁹Behơ̆ Este bau ùr bơtau kòn ùr Abihail, bal mơ Mordike cau Juda, geh gơnoar cih sră pơyoa sră pơyoa dơ̆ bàr do lơh nền bơh ngai Phurim.

³⁰Ală sră pơyoa neh geh pơyoa ai bơta lơngai mơ bơta dong tă tus hơ ală cau Juda, tus hơ dô rhiang bàr jơt poh kơnhwàl lơgar tòm lơgar bơtau Ahasuerus dê,

³¹mơ ai gơnoar sồr ală ngai Purim dê pal geh prap gàr tòm toh di tŭ neh lơh nền be Mordike la cau Juda mơ bau ùr bơtau la Este neh dô bă bal mơ cau Juda, jat be bol khai neh bơtào să tòm bol khai in, mơ ală kòn sau bol khai in, bơh tŭ tơngai ơt sa mơ ñìm rac bol khai dê.

³²Jơnau gơnoar sồr Este dê lơh nền ală bơta sồr lam bơh Phurim, ală bơta hơ̆ geh cih tòm ală sră.