Read koho Lik Ejiptơ 1 Bible Online

Lik Ejiptơ 1 - koho bible

Lik Ejiptơ 1

¹Do la sơnđan ală kòn klau Israel dê, kòp nă lam hìu nhă khai dê lòt bal mơ Jakôp tus hơ lơgar Ejiptơ:

²Ruben, Simeôn, Lebi, mơ Juda;

³Isaka, Jebulun, mơ Benjamin;

⁴Dan, Neptali, Gat, mơ Aser.

⁵Jơh ală kòn sau tơnggơs bơh Jakôp gơs poh jơt nă; Jôsep neh ơm tòm lơgar Ejiptơ.

⁶Mơ tai, Jôsep mơ jơh ală oh mi khai dê bal mơ jơh ală cau tòm rài hơ̆ neh chơt jơh rau,

⁷mơya Israel tơnggơs mơ gơbơtơl oă, ntum khà gơlik pràn dờng ngan, mơ ơm bềng lìu tòm làm lơgar.

⁸Gen gơs dô nă cau bơtau pa guh at bồ lơgar Ejiptơ, khai ò git bơh Jôsep.

⁹Khai đơs mơ làng bol khai dê lah: “Do, cau Israel neh gơlik oă ngan mơ pràn rlau mơ bol he.

¹⁰Heh! Bol he pal gơwèt mơ bol khai dô bă jak chài, dilah ò gen bol khai rơp gơbơtơl oă rlau tai, mơ dilah gơs bơta tòmlơh gơ tus, bol khai rơp lơh gơs dô bă bal mơ ală cau sò tơm bol he dê, tòmlơh wơl mơ bol he mơ lik klàs bơh di lơgar.”

¹¹Behơ̆ cau Ejiptơ bơtào ală cau at bồ cau dĭ hơđang bol khai nàng rồn bơklơn bol khai pal lơh broă kơnjơ̆ ngan; cau Israel bơt bơtào Phithom mơ Ramse lơh gơs ală ƀòn dờng đam jàr Pharaôn in.

¹²Mơya sơlo bol khai kong rồn bơklơn, sơlo bol khai gơbơtơl oă mơ gơlik lìu làc làm bă tiah; behơ̆ gen cau Ejiptơ kơlôi rngòt di cau Israel,

¹³mơ kup bol khai lơh broă bòl glar dô bă ò nđàc dô êt lơi.

¹⁴Bol khai lơh rài kis cau Israel in gơlik sràt bơtang bơh broă kơnjơ̆, lơh gac mơ cài bơt hìu bal mơ tơl jơh ală broă tòm ală ƀlàng sre; tòm jơh ală broă kơnjơ̆ cau Ejiptơ ngui cau Israel dô bă ò nđàc dô êt lơi.

¹⁵Bơtau Ejiptơ đơs mơ ală cau ùr đơng deh cau Hebrơ dê, dô nă cau sơnđan la Siphra, mơ dô nă sơnđan lah Phua,

¹⁶“Tòm tŭ bol ai lòt đơng deh cau ùr Hebrơ in, dilah gŏ deh kòn klau gen tơnchơt tĕ kòn hơ̆; mơya dilah la kòn ùr gen lòi kòn hơ̆ kis.”

¹⁷Mơya ală cau ùr đơng deh duh rngòt di Yàng Tom Trồ mơ ò lơh jat jơnau bơtau Ejiptơ neh sồr bol khai; bol khai lòi jơh ală kòn klau in kis.

¹⁸Gen bơtau Ejiptơ sồr hòi ală cau ùr đơng deh tus mơ lùp lah: “Ñchi bơh tài bol ai neh lơh behơ̆ taih? Ñchi bơh tài lòi ală kòn klau in kis taih?”

¹⁹Ală cau ùr đơng deh ho wơl mơ Pharaôn lah: “Ală cau ùr Hebrơ ò di kung be ală cau ùr Ejiptơ; bơh bol khai pràn rlau mơ deh kòn lài mơ tŭ tus cau đơng deh.”

²⁰Behơ̆, Yàng Tom Trồ gơwèt niam mơ ală cau ùr đơng deh; làng bol gơbơtơl oă mơ ntum khà gơlik gơs dờng rlau tai.

²¹Mơ tài bơh ală cau ùr đơng deh gơs nùs duh rngòt di Yàng Tom Trồ gen Kơnràñ ai lơngai lơngò hìu nhă tòm bol khai in.

²²Lồc behơ̆, Pharaôn ai jơnau sồr jơh làng bol khai in lah: “Kòp nă kòn klau cau Hebrơ pa deh, bol mê pal sơrbì tĕ tòm hiòng Nil; mơya lòi kis jơh ală kòn ùr.”