Read koho Lik Ejiptơ 10 Bible Online

Lik Ejiptơ 10 - koho bible

Lik Ejiptơ 10

¹Gen Yàng Jehôwa đơs mơ Môise lah: “Lòt tĕ tus hơ Pharaôn, bơh Añ neh lơh kră kơldang nùs khai dê mơ nùs ală cau kwang duh broă khai dê nàng Añ in lơh ală tềl krơi Añ jê digùl bol khai,

²tồ mê yal wơl ală kòn mơ sau mê in git mbe lơi Añ neh lơh bòl glar di cau Ejiptơ, mơ mbe lơi Añ neh lơh ală tềl is Añ jê digùl bol khai, nàng bol mê git lah Añ la Yàng Jehôwa.”

³Gen Arôn mơ Môise lòt tus hơ Pharaôn mơ đơs lah: “Yàng Jehôwa la Yàng Tom Trồ làng bol Hebrơ dê neh đơs be do: ‘Mê ò tơnliah să di đap Añ jơl tus di tŭ lơi taih? Lòi tĕ làng bol Añ jê lik lòt nàng bol khai duh khoai Añ.

⁴Dilah mê ò bài lòi bol khai in lik lòt, ngai hìng Añ rơp cèng srah nting tus tòm lơgar mê dê.

⁵Bol gơ rơp jơm gòm ù tian gơs cau ò rgơi sền gŏ ù tai. Bol gơ rơp sa roh jơh ală phan mìu piar lòi wơl; bal mơ ală chi hòn tòm ƀlàng sre bol mê dê.

⁶Bol gơ rơp mut bềng tòm ală hìu mê dê, tòm ală hìu jơh ală cau kwang duh broă mê dê, mơ tòm jơh ală hìu tum cau Ejiptơ dê; hơ̆ la dô bơta mơ mè bèp mơ ồng pàng bol mê dê kung òhềt tŭ lơi gŏ bơh tŭ bol khai neh ơm tòm lơgar do jơl tus di ngai do.’” Gen Môise wơlke mơ lik lòt bơh di Pharaôn.

⁷Ală cau kwang duh broă Pharaôn đơs mơ khai lah: “Cau do rơp gơlơh kung be dô nơm dă gơwèt mơ bol he jơl tus di tŭ lơi taih? Lòi tĕ làng bol hơ̆ in lik lòt, nàng bol khai duh khoai Jehôwa Yàng Tom Trồ bol khai dê. Bơtau òhềt đal git lah lơgar Ejiptơ kong tơnroh ò ơ?”

⁸Gen Môise mơ Arôn geh hòi tus wơl hơ Pharaôn. Pharaôn đơs lah: “Lik lòt tĕ duh khoai Jehôwa Yàng Tom Trồ bol mê dê. Mơya ală cau lơi pal lòt taih?”

⁹Môise ho lah: “Jơh tơl nă bol hi cau kra mơ cau pơnu rơp lòt bal, lam ală kòn klau mơ kòn ùr bol hi dê, mơ cèng ală kơnrồ mơ belàt sơl, tài bơh bol he rơp lơh dô bơta pơjum sa hòn chò di đap Yàng Jehôwa.”

¹⁰Gen Pharaôn đơs lah: “Yàng Jehôwa ơm bal mơ bol mê, dilah añ rơp lòi bol mê in lik lòt bal mơ ală bau kòn bol mê. Loh làng la bol mê kòñ lơh broă iơh!

¹¹Ò! Mìng bol mê la cau klau lơm rgơi lik lòt duh khoai Yàng Jehôwa, hơ̆ la bơta bol mê neh dan.” Gen bol khai bơtrơh Môise mơ Arôn bơh di đap Pharaôn.

¹²Yàng Jehôwa đơs mơ Môise lah: “Pò tê mê dê hơđang Ejiptơ nàng srah nting rơp gơtras hơđang lơgar, mơ sa tơnroh jơh ală phan lơi hòn tòm ală ƀlàng sre, jơh ală phan mơ mìu piar lòi wơl.”

¹³Behơ̆, Môise pò gai kwềt khai dê hơđang Ejiptơ, mơ Yàng Jehôwa cèng tus dô ròs càl đah mattơngai lik gơkhồm hơđang lơgar tòm ngai hơ̆ mơ mang hơ̆. Tus àng drim càl neh cèng tus srah nting.

¹⁴Bol gơ ơm bềng làm jơh tòm lơgar Ejiptơ, mơ gơ mù oă ngan ò git nđò hơđang jơh ală kơnhwàl tòm lơgar. Bơh yau òr òhềt tŭ lơi gơs dô bơta rung rài bơh srah nting behơ̆, mơ tơnơ̆ tai kung ò tŭ lơi rơp gơs ndròm behơ̆ tai.

¹⁵Srah nting gơ jơm gòm làm jơh ù tiah tian gơs ù tiah gơlik jù. Bol gơ sa roh jơh ală phan gam wơl tơnơ̆ mơ mìu piar, jơh ală phan hòn tòm ală ƀlàng sre bal mơ ală plai hơđang ală chi. Ò gam nha tơlir hơđang chi che hala dô nơm tòm chi lơi tòm jơh lơgar Ejiptơ.

¹⁶Gen Pharaôn hòi Môise mơ Arôn tus mơ đơs lah: “Añ neh tìs glài mơ Jehôwa Yàng Tom Trồ bol mê dê, bal mơ bol mê tai sơl.

¹⁷Tŭ do, dan toh glài añ in dô dơ̆ tai; mơ hòi dan mơ Jehôwa Yàng Tom Trồ bol mê dê, nàng tă tơlik bơta rung rài chơt roh do bơh di añ.”

¹⁸Gen Môise lik bơh di Pharaôn, mơ hòi dan mơ Yàng Jehôwa.

¹⁹Yàng Jehôwa tòmgơl càl mơ cèng tus dô ròs càl pràn ngan đah mattơngai mut, gơkhồm pơrdô jơh ală srah nting tus tòm Dàlềng Pơrhê. Ò gam dô nơm srah nting lơi tòm tiah Ejiptơ.

²⁰Mơya Yàng Jehôwa neh lơh kơldang nùs Pharaôn dê; khai ò bài lòi làng bol Israel in lik lòt.

²¹Gen Yàng Jehôwa đơs mơ Môise lah: “Pò tĕ tê mê dê hơđang trồ, tồ bơta klam jơngo gơ jơm gòm làm jơh Ejiptơ, dô bơta klam jơngo cau rgơi ƀư git.”

²²Behơ̆, Môise pò tê khai dê hơđang trồ, gen bơta klam jơngo jơm gòm làm jơh Ejiptơ tòm pe ngai;

²³Tòm pe ngai hơ̆ ò gơs cau lơi rgơi sền gŏ cau ndai hala rgơi ñă lòt bơh di tiah khai dê. Mơya ală cau Israel gơs bơta àng tòm tiah bol khai ơm.

²⁴Gen Pharaôn hòi Môise tus mơ đơs lah: “Lòt tĕ duh khoai Yàng Jehôwa; ală cau ùr mơ ală kòn rgơi lòt bal mơ mê sơl; mìng lòi wơl tềng do ală mpồl belàt mơ kơnrồ bol mê dê lơm.”

²⁵Mơya Môise đơs lah: “Bơtau pal lòi bol hi in gơs ală phan ơn duh khoai mơ phan ơn chu pơrguc Jehôwa Yàng Tom Trồ bol hi in.

²⁶Ală mpồl phan poan jơng kung pal lòt jat bol hi sơl, ò lòi wơl dô nơm nđias lơi ò; bơh bol hi rơp ngui phan ƀà tòm ală mpồl hơ̆ nàng duh khoai Jehôwa Yàng Tom Trồ bol hi dê; bol hi ò git phan lơi bol hi pal ngui nàng duh khoai Yàng Jehôwa lài mơ tŭ bol hi tus tềng hơ̆.”

²⁷Mơya, Yàng Jehôwa neh lơh kơldang nùs Pharaôn dê gen tàng khai ò bài ai làng bol Israel in lik lòt.

²⁸Pharaôn đơs mơ Môise lah: “Dô lik tĕ bơh di đap mat añ! Bañ tŭ lơi tơlik mat di đap añ tai! Ngai lơi mê gŏ mat añ gen mê rơp chơt.”

²⁹Môise ho wơl lah: “Di ngan be jơnau bơtau neh đơs, añ rơp ò tŭ lơi tơlik mat di đap bơtau tai.”