Read koho Lik Ejiptơ 11 Bible Online

Lik Ejiptơ 11 - koho bible

Lik Ejiptơ 11

¹Gen Yàng Jehôwa đơs mơ Môise lah: “Añ rơp đùh hơđang Pharaôn mơ lơgar Ejiptơ dô bơta rung rài tai. Tơnơ̆ mơ hơ̆, khai rơp lòi bol mê lik lòt bơh do, mơ tòm tŭ khai lơh bơta hơ̆, khai rơp bơtrơh bol mê lik bơh do.

²Đơs tĕ mơ làng bol lah ală cau klau bal mơ ală cau ùr sơl pal dan mơ cau ơm rềp mơ he ală phan mơ priă mơ màh.”

³Yàng Jehôwa lơh làng bol in geh bơta nđàc di đap cau Ejiptơ, mơ să tòm Môise geh ală cau kwang duh broă Pharaôn mơ làng bol tòm Ejiptơ sền dờng màng.

⁴Behơ̆ Môise đơs lah: “Yàng Jehôwa neh đơs be do: ‘Pơgap digùl mang Añ rơp lòt làm Ejiptơ.

⁵Kòp nă kòn klau tơnhoa tòm Ejiptơ rơp chơt, bơh di kòn klau tơnhoa bơtau Pharaôn nggui hơđang sơbàn tus di kòn klau tơnhoa cau dĭ ùr duh broă di mpal piah kòi, bal mơ jơh ală kòn tơnhoa ală phan poan jơng tai sơl.

⁶Tòm làm jơh lơgar Ejiptơ rơp gơs jơnau ñìm nggà nggồr nggàc ngan, tian gơs òhềt tŭ lơi gơs behơ̆ mơ kung rơp ò tŭ lơi gơs behơ̆ tai sơl.

⁷Mơya, digùl cau Israel rơp ò gơs dô nơm so lơi khoal di cau hala di phan poan jơng lơi. Gen bol mê rơp git lah Yàng Jehôwa cah is làng bol Israel bơh di cau Ejiptơ.’

⁸Jơh ală cau kwang bol mê dê rơp lòt tus hơ añ, tơmbic să di đap añ mơ đơs lah: ‘Lik lòt tĕ, mê mơ jơh làng bol lòt jat mê!’ Tơnơ̆ hơ̆ añ rơp lik lòt.” Gen Môise lik lòt bơh di đap Pharaôn, mơ nùs gơhào gơjrañ ngan.

⁹Yàng Jehôwa neh đơs mơ Môise lah: “Pharaôn rơp ò bài iat mê, tồ ală tềl krơi Añ jê gơbơtơl tai tòm Ejiptơ.”

¹⁰Môise mơ Arôn lơh jơh ală tềl krơi do di đap Pharaôn, mơya Yàng Jehôwa lơh kơldang nùs Pharaôn dê, mơ khai ò bài lòi làng bol Israel in lik lòt bơh lơgar khai dê.