Read koho Lik Ejiptơ 12 Bible Online

Lik Ejiptơ 12 - koho bible

Lik Ejiptơ 12

¹Yàng Jehôwa đơs mơ Môise mơ Arôn tòm lơgar Ejiptơ lah:

²“Kơnhai do rơp geh kòp la kơnhai sơnròp bol mê in, hơ̆ la kơnhai dùl tòm dô nam.

³Đơs tĕ mơ jơh mpồl jơnum cau Israel dê lah, tòm ngai jơt kơnhai do, kòp nă cau klau pal kup dô nơm belàt kòn hìu nhă khai in, kòp hìu nhă dô nơm.

⁴Dilah hìu nhă lơi gơs mìng dô êt nă cau lơm, ò jai sa jơh dô nơm belàt kòn, gen bol khai pal sa bal mơ hìu nhă cau ơm rềp rlau jơh mơ bol khai, tơnơ̆ mơ tŭ neh kòp khà cau neh gơs tòm hìu nhă hơ̆. Bol mê pal lơh nền pal gơs kàr lơi belàt jat be pràn kòp nă cau rgơi sa.

⁵Kup tĕ bơh di mpồl belàt hala mpồl bol mê dê dô nơm belàt dam hala dô nơm be dam tơl dô nam ò sồt rmàñ.

⁶Ròng siam bol gơ jơl tus di ngai jơt poan kơnhai do la ngai jơh dô mpồl jơnum Israel dê pal hàl tơnchơt bol gơ di tŭ trồ mho.

⁷Gen bol khai rơp ai dô êt mhàm belàt neh hàl tơnchơt hơ̆ mơ bong di bàr đah jrong mơ di hơđang bồ mpồng ală hìu mơ bol khai ơm sa poac ală belàt kòn hơ̆.

⁸Tòm mang hơ̆ bol khai rơp sa poac buh hơđang ồs bal mơ biap bơtang mơ piang lă ò gơs kañ.

⁹Bañ sa poac ris hala gơm tòm dà, mơya pal buh jơh hơđang ồs, hơ̆ la bồ, ală jơng, bal mơ ală klung klòm tòm dơlam gơ dê.

¹⁰Bañ lòi wơl dô êt lơi jơl tus àng hìng; dilah gam wơl dô êt lơi gen bol mê pal chu tĕ tòm ồs.

¹¹Bol mê pal sa poac hơ̆ be do: Ào jrùh kơt che but, jơng jă gơltau jă, tê at gai kwềt. Sa tĕ sơrbac sơrbang; hơ̆ la bơta Pơjum Sa Lòt Gan Yàng Jehôwa dê.

¹²Kung tòm mang hơ̆, Añ rơp lòt gan lơgar Ejiptơ mơ tơnchơt kòp nă kòn tơnhoa, kòn mơnus bal mơ phan poan jơng; mơ Añ rơp cèng bơta lơh glài hơđang jơh ală yàng cau Ejiptơ dê. Añ la Yàng Jehôwa.

¹³Mhàm bong di ală hìu bol mê ơm rơp ngui lơh tềl bol mê in; mơ tòm tŭ Añ gŏ mhàm gen rơp lòt gan di bol mê. Rơp ò gơs pluh plàng tơnroh tus di bol mê tòm tŭ Añ lơh glài Ejiptơ.

¹⁴Hơ̆ la ngai bol mê pal kah prap; tòm ală rài tơnơ̆ bol mê rơp pơjum hòn chò tòm ngai hơ̆ lơh gơs dô bơta pơjum sa dờng Yàng Jehôwa in, hơ̆ la dô bơta sồr lam gam sùm sùm.

¹⁵Tòm poh ngai bol mê pal sa piang lă ò gơs kañ. Tòm ngai sơnròp, bol mê pal tă sang kañ bơh di ală hìu bol mê dê; bơh dilah cau lơi sa phan lơi gơs kañ tòm hơ̆, bơh ngai sơnròp tus di ngai poh, gen rơp kong tă tơlik bơh di Israel.

¹⁶Tòm ngai sơnròp rơp gơs dô bơta pơjum goh; tus di ngai poh kung rơp gơs dô bơta pơjum sàng goh tai. Bañ lơh dô nơm broă lơi tòm ală ngai hơ̆, lòi mìng rcang phan sa kòp nă cau in lơm, kàr hơ̆ la jơh ală bơta bol mê rgơi lơh.

¹⁷Pơjum hòn chò tĕ ngai Pơjum Sa Piang Lă Ò Gơs Kañ, tài bơh di di ngai hơ̆ Añ neh cèng tơlik ală mpồl làng bol bol mê dê bơh di Ejiptơ. Pơjum hòn chò tĕ tòm ngai do, bơh hơ̆ la dô bơta sồr lam gam sùm sùm ală rài tơnơ̆ in.

¹⁸Tòm kơnhai sơnròp, bol mê pal sa piang lă ò gơs kañ, bơh mho ngai jơt poan kơnhai dùl, tus di mho ngai bàr jơt dùl.

¹⁹Tòm poh ngai, ò di gơs kañ tòm ală hìu ơm bol mê dê. Mơ cau lơi sa phan lơi gơs kañ tòm hơ̆ gen pal kong tă tơlik bơh di mpồl jơnum Israel dê, bulah khai la cau làng bơdìh hala cau làng tòm kung behơ̆.

²⁰Bañ sa phan lơi lơh mơ kañ. Tiah lơi bol mê ơm, bol mê pal sa piang lă ò gơs kañ.”

²¹Behơ̆, Môise hòi pơjum bal jơh ală cau kwang kra Israel dê mơ đơs mơ bol khai lah: “Lòt tĕ mo mơ sac rwah tĕ ală phan poan jơng kòp nơm hìu ală bol mê in mơ hàl belàt Pơjum sa Lòt Gan dê.

²²Ai tĕ dô cap ntê chi iurŭ tòm thao mhàm, mơ bong mhàm di đah hơđang mơ di bàr đah jrong mpồng. Bañ gơs dô nă cau lơi tòm bol mê lik bơh di mpồng hìu jơl tus diàng hìng.

²³Tòm tŭ Yàng Jehôwa rơp lòt gan nàng tơnchơt cau Ejiptơ; Kơnràñ rơp gŏ mhàm di đah đang mơ di bàr đah jrong mpồng gen Yàng rơp pleh bơh di mpồng, mơ Kơnràñ ò ai gơnoar cau tơnroh mut tòm ală hìu nàng tơnchơt bol mê.

²⁴Lơh jat tĕ ală bơta bơto do lơh gơs dô bơta sồr lam gam sùm sùm bol mê in mơ ală kòn sau bol mê in sơl.

²⁵Tòm tŭ bol mê mut tòm lơgar mơ Yàng Jehôwa rơp ai bol mê in jat be jơnau Kơnràñ neh ho pơgon, gen kah prap tĕ bơta pơjum sa do.

²⁶Mơ tòm tŭ kòn sau bol mê lùp bol mê bơh bơta pơjum sa do gơs jơnau gơtha lơi gơwèt mơ bol mê taih?

²⁷Gen yal tĕ bol khai in lah: ‘Hơ̆ la phan ơn Ngai Pơjum Sa Lòt Gan Yàng Jehôwa dê, Kơnràñ neh lòt gan ală hìu cau Israel dê tòm Ejiptơ mơ lòi hìu nhă bol he dê lơngap lơngai tòm tŭ Kơnràñ tơnchơt cau Ejiptơ.’” Gen làng bol tơmbic să mơ duh khoai.

²⁸Cau Israel lơh jat tòm toh be jơnau Yàng Jehôwa neh sồr Môise mơ Arôn.

²⁹Tòm gùl mang, Yàng Jehôwa tơnchơt jơh ală kòn tơnhoa tòm Ejiptơ, bơh kòn tơnhoa Pharaôn dê nggui hơđang sơbàn tus di kòn tơnhoa cau ơm jàm tòm ơdŭ hìu jàm, bal mơ ală kòn tơnhoa jơh phan poan jơng dê.

³⁰Pharaôn mơ jơh ală cau kwang duh broă khai dê bal mơ jơh ală cau Ejiptơ guh tòm trồ mang mơ gơs jơnau pơt wòl nggồr nggàc tòm Ejiptơ, tài bơh ò gơs hìu lơi mơ ò gơs cau chơt.

³¹Tòm trồ mang, Pharaôn sồr hòi Môise mơ Arôn tus mơ đơs lah: “Guh tĕ! Mê mơ cau Israel lòi tĕ làng bol añ jê. Lik lòt tĕ duh khoai Yàng Jehôwa jat be bol mê neh dan.

³²Cèng tĕ bal ală mpồl phan poan jơng bol mê dê jat be jơnau bol mê neh đơs, mơ lòt tĕ. Mơ kung ai lơngai añ in sơl.”

³³Cau Ejiptơ chồl cau Israel mhar mhar lik lòt bơh di lơgar. Bol khai đơs lah: “Dilah ò gen bol he rơp chơt jơh!”

³⁴Behơ̆, làng bol cèng kơnac kơmbuh phe òhềt gơs kañ, ơn gơtòm ală thùng bơcă kơmbuh phe, klơm tòm ồi mơ tui hơđang pơnì bol khai dê.

³⁵Làng bol Israel neh lơh jat tòm toh be jơnau Môise neh sồr mơ dan cau Ejiptơ ală phan mơ priă, mơ màh bal mơ ồi ào.

³⁶Yàng Jehôwa neh lơh làng bol in geh bơta nđàc di đap cau Ejiptơ, gen tàng cau Ejiptơ ai bol khai in phan lơi bol khai dan; cau Israel tă ai phan bơh di cau Ejiptơ la behơ̆.

³⁷Làng bol Israel lòt bơh Ramse tus Sukôt. Gơs pơgap prau rhiang rbô nă cau klau lòt jơng, ò kòp cau ùr mơ cau kơnòm.

³⁸Gơs oă ngan cau làng bol ndai lòt jat bal mơ bol khai, cèng bal oă mpồl phan poan jơng.

³⁹Bol khai ai kơnac kơmbuh phe mơ bol khai neh cèng bơh di Ejiptơ mơ buh gơs piang lă ò gơs kañ. Kơnac kơmbuh phe ò gơs kañ, tài bơh bol khai gơkòl bơtrơh tơlik bơh di Ejiptơ gen tàng bol khai ò thàn rcang phan sa lơi bol khai in.

⁴⁰Mơ tai, pah tơngai làng bol Israel ơm tòm Ejiptơ la poan rhiang pe jơt nam.

⁴¹Tòm tŭ neh lồi poan rhiang pe jơt nam rau, gen tòm ngai hơ̆, jơh ală mpồl làng bol Yàng Jehôwa dê lik lòt bơh di Ejiptơ.

⁴²Tài bơh Yàng Jehôwa neh drơng mang hơ̆ nàng cèng bol khai lik klàs bơh di Ejiptơ, gen bơh di mang hơ̆, jơh làng bol Israel pal ơn is nàng jòng ro Yàng Jehôwa tòm ală rài tơnơ̆.

⁴³Yàng Jehôwa đơs mơ Môise mơ Arôn lah: “Do la ală bơta sồr lam bơh ngai Pơjum sa Lòt Gan: Ò gơs cau làng bol bơdìh lơi geh gơnoar sa ngai pơjum sa hơ̆.

⁴⁴Cau dĭ lơi mơ bol mê neh blơi mơ neh siat gơltau khai in rau gen khai rgơi sa ngai pơjum sa hơ̆,

⁴⁵mơya dô nă cau ơm ing mơ cau ơm lơh broă ơpah gen ò geh gơnoar sa ngai pơjum sa hơ̆.

⁴⁶Pal sa ngai pơjum sa hơ̆ tòm dô nơm hìu; bañ cèng dô pet poac lơi lik hơ bơdìh hìu. Bañ lơh pă dô nơm ntìng lơi.

⁴⁷Jơh dô nơm mpồl jơnum Israel dê pal pơjum hòn chò tòm ngai hơ̆.

⁴⁸Dô nă cau làng bol bơdìh kis digùl bol mê kòñ pơjum ngai Pơjum sa Lòt Gan Yàng Jehôwa dê gen kòp nă cau klau tòm hìu nhă khai dê pal kong siat gơltau; lồc behơ̆ sồng khai rgơi pơjum sa kung be dô nă cau neh deh tòm lơgar. Ò gơs dô nă cau klau lơi ò kong siat gơltau rgơi sa ngai pơjum sa hơ̆.

⁴⁹Cau deh tòm lơgar bal mơ làng bol bơdìh ơm digùl bol mê pal kah prap dô nơm bơta boh lam do.”

⁵⁰Jơh làng bol Israel lơh jat jơnau Yàng Jehôwa neh sồr Môise mơ Arôn.

⁵¹Mơ tòm ngai hơ̆, Yàng Jehôwa tă mpồl làng bol Israel dê lik bơh Ejiptơ.