Read koho Lik Ejiptơ 14 Bible Online

Lik Ejiptơ 14 - koho bible

Lik Ejiptơ 14

¹Gen Yàng Jehôwa đơs mơ Môise lah:

²“Sồr tĕ cau Israel rê wơl bơtào sàl rềp Phi Hahirôt, digùl pah Mitdôn mơ dàlềng. Bol mê bơtào sàl di gah dàlềng, tòm toh di đap Baal Sephôn.

³Pharaôn rơp kơlôi lah: ‘Làng bol Israel lòt rwềng rwàng tòm lơgar, gơkòl ƀlàng ngềt ngơt gơrwàng gùt dar.’

⁴Añ rơp lơh kơldang nùs Pharaôn dê, khai rơp ting jat cau Israel. Mơya să tòm Añ rơp geh gơklŏ bơh Pharaôn mơ jơh mpồl ling khai dê, mơ cau Ejiptơ rơp git Añ la Yàng Jehôwa.” Mơ cau Israel lơh jat behơ̆.

⁵Tòm tŭ bơtau Ejiptơ geh cau yal làng bol Israel neh dô jơh rau, Pharaôn mơ ală cau kwang duh broă khai dê tòmgơl nùs bơh làng bol, mơ đơs lah: “Ñchi bơta bol he neh lơh taih? Bol he neh lòi làng bol Israel in lik lòt mơ neh roh bơta duh broă bol khai dê!”

⁶Behơ̆ khai rcang rơndeh lòs tòmlơh mơ cèng mpồl ling bal mơ khai.

⁷Khai cèng prau rhiang rơndeh lòs tòmlơh jak rlau jơh bal mơ jơh ală rơndeh lòs tòmlơh ndai Ejiptơ dê, gơs ală cau kwang ling at bồ jơh bol gơ.

⁸Yàng Jehôwa lơh kơldang nùs Pharaôn, bơtau Ejiptơ dê, nàng khai ting jat cau Israel tòm tŭ cau Israel lik lòt dô bă khin cha ngan.

⁹Cau Ejiptơ, hơ̆ la jơh ală ơseh mơ rơndeh lòs tòmlơh, ling at rơndeh bal mơ mpồl ling tòmlơh Pharaôn dê, bol khai ting jat cau Israel mơ bàn bol khai tòm tŭ bol khai bơtào sàl di gah dàlềng, rềp Phi Hahirôt, tòm toh di đap Baal Sephôn.

¹⁰Tòm tŭ Pharaôn tus rềp, cau Israel pò mat mơ gŏ cau Ejiptơ ting jat bol khai. Bol khai rngòt rngơt ngan, hòi driau mơ Yàng Jehôwa.

¹¹Bol khai đơs mơ Môise lah: “Hơ̆ la tài bơh tòm Ejiptơ ò gơs tiah tơp ƀồc tàng ồng lam bol hi tus tòm ƀlàng ngềt ngơt nàng chơt sơl ơ? Ñchi ồng neh lơh bol hi in, bơh neh tă cèng bol hi lik bơh Ejiptơ taih?

¹²Bol hi ò di neh đơs mơ ồng tòm Ejiptơ lah: ‘Lòi tĕ dò bol hi; lòi tĕ bol hi duh broă cau Ejiptơ,’ sơl ơ? Chan bol hi duh broă cau Ejiptơ la niam rlau mơ chơt tòm ƀlàng ngềt ngơt!”

¹³Môise ho wơl mơ làng bol lah: “Bañ rngòt, ntào kơ̆ tĕ mơ sền gŏ bơta dong tă Yàng Jehôwa dê rơp lơh gơlik gơs bol mê in tòm ngai do. Cau Ejiptơ mơ bol mê neh gŏ tòm ngai do gen bol mê rơp ò gơs tŭ lơi gŏ bol khai tai.

¹⁴Yàng Jehôwa rơp tòmlơh ala bol mê in; bol mê mìng ơm mŏ mŏ lơm.”

¹⁵Gen Yàng Jehôwa đơs mơ Môise lah: “Ñchi bơh tài mê hòi driau mơ Añ tiah? Sồr tĕ cau Israel kư̆ lòt song hơđap.

¹⁶Pò tĕ gai kwềt mê dê hơđang mơ pò tê hơđang dàlềng nàng cah is dà tồ cau Israel lòt gan dàlềng hơđang ù rañ rsơh.

¹⁷Gen Añ rơp lơh cau Ejiptơ in kơldang nùs nàng bol khai rơp mù tòm dàlềng mơ ting jat cau Israel. Mơ Añ rơp geh gơklŏ bơh Pharaôn bal mơ jơh mpồl ling khai dê, bơh ală rơndeh lòs tòmlơh bal mơ ală cau ling hào ơseh khai dê.

¹⁸Cau Ejiptơ rơp git Añ la Yàng Jehôwa tòm tŭ Añ geh gơklŏ bơh Pharaôn, bơh ală rơndeh lòs tòmlơh khai dê mơ bơh ală cau ling hào ơseh khai dê.”

¹⁹Gen cau gơnrơh Yàng Tom Trồ dê neh lòt lài di đap mpồl ling Israel dê ruc wơl mơ lòt jat đah ngkòi bol khai. Jrong mhwal neh lòt lài di đap gen kung tơrwơl mơ ntào đah ngkòi bol khai;

²⁰ơm digùl mpồl ling Ejiptơ mơ Israel. Jrong mhwal lơh jơngo đah do in, mơ cèng bơta àng đah ne in; gen tàng jơh dô mang ò gơs đah lơi rgơi tus rềp mơ gơp.

²¹Gen Môise pò tê hơđang dàlềng, mơ tòm mang hơ̆ Yàng Jehôwa sồr dô ròs càl đah mattơngai lik khồm pràn chồl dàlềng ruc wơl, dà tòmcah is mơ gơs ù rañ rsơh.

²²Cau Israel lòt gan dàlềng hơđang ù rañ rsơh, gơs dô nơm dơrñang dà đah ma mơ dô nơm đah kiau.

²³Cau Ejiptơ ting jat bol khai, mơ jơh ală ơseh, rơndeh lòs tòmlơh bal mơ mpồl ling hào ơseh Pharaôn dê lòt jat bol khai mù tòm dàlềng.

²⁴Tòm àng drim, Yàng Jehôwa bơh di jrong ồs mơ mhwal tơmềt sền gŏ mpồl ling Ejiptơ gen Kơnràñ lơh bol khai in sơlồng sơlàng.

²⁵Kơnràñ lơh kong rơndeh lòs tòmlơh bol khai dê gơkòl sơntă, lòi bol khai at dô bă bòl glar kalke ngan. Gen cau Ejiptơ đơs lah: “Bol he dô pleh tĕ bơh di cau Israel, Yàng Jehôwa bơh bol khai mơ tòmlơh mơ Ejiptơ.”

²⁶Gen Yàng Jehôwa đơs mơ Môise lah: “Pò tĕ tê mê dê hơđang dàlềng nàng dà rơp dơp wơl hơđang cau Ejiptơ, hơđang ală rơndeh lòs tòmlơh mơ hơđang mpồl ling hào ơseh bol khai dê.”

²⁷Môise pò tê khai dê hơđang dàlềng, mơ di diàng drim, dàlềng dơp wơl be òs. Cau Ejiptơ ntoat dô bơh di gơ, mơya Yàng Jehôwa chồl tơlo bol khai tòm gùl dàlềng.

²⁸Dà gơbồr wơl mơ jơm gòm ală rơndeh lòs tòmlơh bal mơ mpồl ling hào ơseh, hơ̆ la jơh hir dô mpồl ling Pharaôn dê neh jat cau Israel mù tòm dàlềng. Ò gơs dô nă cau lơi tòm bol khai gam kis.

²⁹Mơya cau Israel lòt gan dàlềng hơđang ù rañ rsơh, gơs dô nơm dơrñang dà đah ma mơ dô nơm đah kiau bol khai dê.

³⁰Tòm ngai hơ̆, Yàng Jehôwa dong tă Israel klàs bơh di tê cau Ejiptơ; mơ Israel neh gŏ ƀồc cau Ejiptơ dê chơt di gah dàlềng.

³¹Mơ tòm tŭ cau Israel neh gŏ gơnap gơnoar dờng Yàng Jehôwa dê tòmdră mơ cau Ejiptơ, gen làng bol rngòt di Yàng Jehôwa, dòn kơnòm di Kơnràñ mơ di Môise la cau duh broă Kơnràñ dê.