Read koho Lik Ejiptơ 15 Bible Online

Lik Ejiptơ 15 - koho bible

Lik Ejiptơ 15

¹Gen Môise mơ cau Israel đơs chò bơta đơs chò do Yàng Jehôwa in: “Añ rơp đơs chò Yàng Jehôwa in, bơh Kơnràñ geh bơta gơklŏ pha lin rlau. Kơnràñ neh sơrbì tòm dàlềng ơseh mơ cau hào ơseh.

²Yàng Jehôwa la bơta pràn kơldang mơ la bơta đơs chò añ jê; Kơnràñ neh gơlik gơs bơta dong klàs añ jê. Kơnràñ la Yàng Tom Trồ añ jê, mơ añ rơp jòng ro Kơnràñ, Kơnràñ la Yàng Tom Trồ ồng pàng añ jê, añ rơp yò tơngguh Kơnràñ.

³Yàng Jehôwa la dô nă cau ling tòmlơh; Sơnđan Kơnràñ la Jehôwa.

⁴Kơnràñ neh sơrbì tòm dàlềng ală rơndeh lòs tòmlơh bal mơ mpồl ling pràn kơldang Pharaôn dê. Ală cau kwang ling jak rlau jơh Pharaôn dê neh gơbŭ tòm Dàlềng Pơrhê.

⁵Dà jrô neh bồr ndơp bol khai; Bol khai neh gơkram tòm kơnàng jrô kung be dô pơnai lŭ.

⁶Ơ Yàng Jehôwa! Tê ma Kơnràñ dê gơs gơnap gơnoar gơklŏ ngan. Ơ Yàng Jehôwa! Tê ma Kơnràñ dê tơnlề cau sò tơm.

⁷Tòm gơnoar dờng ryŭ ryơm Kơnràñ dê, Kơnràñ tơmplơ̆ ală cau sòdră di Kơnràñ. Kơnràñ gơhào bơta gơjrañ dờng Kơnràñ dê; Gơ chu pơrguc bol khai be rhe.

⁸Bơh nhơm lik bơh di trồm muh Kơnràñ dê gen dà gơs gơnru. Ală ryà dà ơm kơ̆ wơl kung be dô nơm dơrñang; Dà jrô khơt wơl di klŏ dàlềng.

⁹Cau sò tơm đơs lah: ‘Añ rơp ting jat, añ rơp ting jat bàn bol khai. Añ rơp tòmpà phan tòmpìt geh; Bơta añ kơp kòñ rơp geh hừh nùs bơh bol khai; Añ rơp tă đào añ jê mơ tê añ rơp tơnroh bol khai.’

¹⁰Mơya Kơnràñ neh ai nhơm khồm bol khai roh thit, dàlềng neh bồr bol khai. Bol khai gơkram kung be dô pơnai trà, tòm kơnàng dàlềng pràn ngan.

¹¹Ơ Yàng Jehôwa! Digùl ală yàng, ñcau ndròm be Kơnràñ taih? Ñcau rgơi ndròm be Kơnràñ, ryŭ ryơm tòm bơta sàng goh, Pal rngòt rngơt tòm bơta gơklŏ, lơh ală bơta krơi tềl is?

¹²Kơnràñ neh pò tơlik tê ma Kơnràñ dê, ù neh sa loan bol khai.

¹³Tòm bơta kòñ gơboh kơ̆ dơn Kơnràñ dê, Kơnràñ tề lam làng bol Yàng neh tơwài. Tòm bơta pràn kơldang Kơnràñ dê, Kơnràñ rơp tề lam bol khai tus hơ tiah ơm sàng goh Kơnràñ dê.

¹⁴Ală làng bol rơp kơno mơ rơm să; Bơta rngòt rngơt brồ tơm làng bol Philistin.

¹⁵Ală cau at bồ Edôm ò suk ơm, Ală cau lam bồ Môap rơm să; Làng bol Kanaan lề roh jơh.

¹⁶Bơta rngòt rngơt rơp dùh hơđang bol khai. Ơ Yàng Jehôwa! Bơh gơnap gơnoar tơwòr tê Kơnràñ dê, bol khai rơp ơm mŏ mŏ kung be lŭ, jơl tus di tŭ lơi làng bol Kơnràñ dê lòt gan, jơl tus di tŭ làng bol Kơnràñ neh tơwài lòt gan.

¹⁷Ơ Yàng Jehôwa! Kơnràñ neh cèng tơmut bol khai, mơ tam bol khai hơđang mơnơm sre brê Kơnràñ dê, la tiah Kơnràñ neh lơh gơs hìu ơm Kơnràñ dê, la Hìu Duh Khoai Sàng Goh, ơ Yàng Jehôwa, mơ tê Kơnràñ neh bơtào gơs.

¹⁸Yàng Jehôwa rơp at bồ sùm sùm ò lồi.”

¹⁹Tòm tŭ ală ơseh, ală rơndeh lòs tòmlơh bal mơ mpồl ling hào ơseh Pharaôn dê neh mù tòm dàlềng, gen Yàng Jehôwa neh lơh dà tòm dàlềng dơp wơl hơđang bol khai. Mơya làng bol Israel lòt gan dàlềng hơđang ù rañ rsơh.

²⁰Gen Miriam la cau gơnoar hwơr ùr, kung la bi ùr Arôn dê, at sơnggơr dềt tòm tê, gen jơh ală cau ùr lòt jat khai, at sơnggơr dềt mơ tòmya.

²¹Miriam đơs chò mơ bol khai lah: “Đơs chò tĕ Yàng Jehôwa in, bơh Kơnràñ neh geh pha lin gơklŏ ngan. Kơnràñ neh sơrbì tòm dàlềng ơseh mơ cau hào ơseh.”

²²Gen Môise neh lam làng bol Israel lòt bơh Dàlềng Pơrhê mơ bol khai lòt tus tòm ƀlàng ngềt ngơt Sur. Tòm pe ngai bol khai lòt tòm ƀlàng ngềt ngơt, jòi ò geh dà hùc.

²³Tòm tŭ bol khai tus di Mara, bol khai ò rgơi hùc dà tềng hơ̆ tài bơh dà bơtang. Tài bơh hơ̆ tàng cau sơnđan tiah hơ̆ la Mara.

²⁴Behơ̆ làng bol yoam tòmdră mơ Môise mơ đơs lah: “Ñchi bol hi ai hùc taih?”

²⁵Gen Môise hòi dan mơ Yàng Jehôwa, mơ Kơnràñ sơnio khai in dô gơl ntê chi; khai dòñ sơrbì tòm dà, gen dà gơlik gơs lơngồt mo. Tềng hơ̆, Yàng Jehôwa bơtào dô bơta sồr lam mơ dô bơta boh lam làng bol in, mơ tềng hơ̆ Kơnràñ lòng bol khai.

²⁶Kơnràñ đơs lah: “Dilah bol mê iat nền nền jơnau đơs Jehôwa Yàng Tom Trồ bol mê dê, mơ lơh bơta di ngan di đap Kơnràñ, dilah bol mê ơn nùs tồr di ală jơnau sồr Kơnràñ dê mơ prap gàr jơh ală bơta sồr lam Kơnràñ dê, gen Añ rơp ò đùh hơđang bol mê dô bơta kòp jê lơi tòm ală bơta kòp jê mơ Añ neh đùh hơđang cau Ejiptơ, bơh Añ la Yàng Jehôwa, Bơtau sơmbòi kòp jê bol mê in.”

²⁷Lồc behơ̆ bol khai tus hơ Elim, tềng do gơs jơt bàr nơm croh dà, mơ poh jơt đòm chi gòl; làng bol bơtào sàl ơm tềng hơ̆, rềp di croh dà.