Read koho Lik Ejiptơ 18 Bible Online

Lik Ejiptơ 18 - koho bible

Lik Ejiptơ 18

¹Tŭ hơ̆ Jetrô, cau gơnoar ơn phan duh khoai Midian la po bèp Môise dê, neh kơno bơh jơh ală bơta mơ Yàng Tom Trồ neh lơh Môise mơ làng bol Israel in, la làng bol Kơnràñ dê, mbe Kơnràñ neh cèng Israel lik bơh di Ejiptơ.

²Tơnơ̆ mơ tŭ Môise neh sồr bau ùr khai dê la Jiphôra rê hìu, po bèp khai dê la Jetrô dòp rò Jiphôra,

³bal mơ bàr nă kòn klau khai dê. Dô nă kòn klau sơnđan la Gersôm bơh Môise neh đơs lah: “Añ neh gơlik gơs dô nă cau làng bơdìh tòm lơgar cau bơdìh”

⁴mơ dô nă sơnđan lah: Eliejer bơh khai neh đơs lah: “Yàng Tom Trồ bèp añ jê la Bơtau dong kòl añ; Kơnràñ neh dong añ klàs bơh di đào Pharaôn.”

⁵Behơ̆ Jetrô, po bèp Môise bal mơ bàr nă kòn klau mơ bau ùr Môise dê tus mơ khai tòm ƀlàng ngềt ngơt la tiah khai bơtào sàl ơm rềp di mơnơm Yàng Tom Trồ dê.

⁶Jetrô sồr yal mơ Môise lah: “Añ la Jetrô, po bèp mê dê, bal mơ bau ùr mơ bàr nă kòn klau mê dê tus hơ mê.”

⁷Môise lik lòt wă rò po bèp khai dê, cùn khoai mơ cum khai. Bol khai lùp còp să bal, lồc behơ̆ mut tòm sàl.

⁸Môise yal po bèp khai in git jơh ală bơta mơ Yàng Jehôwa neh bơh Israel mơ lơh di Pharaôn mơ cau Ejiptơ, bal mơ jơh ală bơta bòl glar kalke khai neh kong rò gùng, mơ mbe lơi Yàng Jehôwa neh dong klàs bol khai.

⁹Jetrô hòn chò ngan bơh ală bơta niam mơ Yàng Jehôwa neh lơh Israel in, dong tă bol khai klàs bơh di cau Ejiptơ.

¹⁰Khai đơs lah: “Pal jòng ro Yàng Jehôwa la Bơtau neh dong tă mê klàs bơh tê cau Ejiptơ mơ Pharaôn, mơ dong tă làng bol bơh tê cau Ejiptơ dê.

¹¹Tŭ do añ git lah Yàng Jehôwa la dờng rlau mơ jơh ală yàng ndai, bơh Kơnràñ neh lơh bơta hơ̆ ală cau neh pơnhừ să gơwèt mơ Israel”.

¹²Gen Jetrô po bèp Môise dê, ơn dô nơm phan ơn chu pơrguc bal mơ ală phan ơn duh khoai ndai Yàng Tom Trồ in; Arôn mơ jơh ală cau kwang kra Israel dê tus sa piang lă bal mơ po bèp Môise dê, di đap Yàng Tom Trồ.

¹³Ngai tơnơ̆, Môise nggui cahrña làng bol; tòm tŭ làng bol ñă ntào gùt dar khai bơh àng drim tus di trồ mho.

¹⁴Tòm tŭ po bèp khai neh gŏ jơh ală bơta khai neh lơh làng bol in, khai đơs lah: “Ñchi bơta kòn lơh làng bol in behơ̆ taih? Ñchi bơh tài kòn ơm nggui mìng dô nă lơm nàng cahrña tòm tŭ jơh làng bol do ơm ntào gùt dar kòn bơh àng drim tus di trồ mho behơ̆ taih?”

¹⁵Môise ho lah: “Tài bơh làng bol tus hơ añ nàng jòi git nùs kòñ Yàng Tom Trồ dê.

¹⁶Tŭ lơi bol khai gơs bơta tòm pơndang bal gen bol khai cèng bơta hơ̆ tus mơ añ, mơ añ cahrña lơh nền digùl cau do mơ cau ne, mơ ai bol khai in git ală jơnau sồr mơ ală bơta boh lam Yàng Tom Trồ dê.”

¹⁷Mơya po bèp Môise dê ho lah: “Bơta kòn lơh hơ̆ ò hoan niam.

¹⁸Kòn bal mơ làng bol lòt tus hơ kòn rơp òsô. Broă hơ̆ kơnjơ̆ kơnjut kòn in; kòn ò jai lơh is mìng dô nă.

¹⁹Tŭ do, iat tĕ añ, añ rơp bơto kòn in dô êt jơnau, dan Yàng Jehôwa ơm bal mơ kòn. Kòn pal la cau ala mat làng bol di đap Yàng Tom Trồ, mơ cèng ală broă bol khai dê hơ Kơnràñ.

²⁰Bơto bol khai ală bơta sồr lam mơ ală bơta boh lam, sơnio bol khai in git pal ngui sa lơh lòt mbe lơi, mơ ală broă tòm bol khai pal lơh.

²¹Mơya sac rwah tĕ tòm mpồl làng bol ală cau klau chài rgơi, duh rngòt di Yàng Tom Trồ, rgơi dòn kơnòm, gơjrañ di cồng nha ƀơ̆ ƀơl, pồ bơtào bol khai gơs cau at bồ, cau ƀà hơđang dô rbô nă, cau ƀà hơđang dô rhiang nă, cau ƀà hơđang pram jơt nă, mơ cau ƀà hơđang jơt nă.

²²Bơtào tĕ bol khai gơs kwang cahrña làng bol kòp ngai, mơya lòi bol khai cèng hơ kòn ală broă kalke, ai ală broă ƀuơn gen să tòm bol khai rgơi cahrña is bol khai dê. Lơh behơ̆ gen ƀuơn rlau kòn in, tài bơh bol khai rơp tòmpà broă mơ kòn.

²³Dilah kòn lơh behơ̆, mơ Yàng Tom Trồ kung sồr kòn lơh behơ̆, gen kòn rơp rgơi kong jai, mơ jơh làng bol do rơp rê hìu lơngap lơngai.”

²⁴Môise dòn bơr po bèp khai mơ lơh jat ală bơta khai neh đơs.

²⁵Khai sac rwah digùl jơh Israel ală cau klau chài rgơi mơ pồ bơtào bol khai gơs cau lam bồ làng bol, cau ƀà at bồ hơđang dô rbô nă, cau ƀà hơđang dô rhiang nă, cau ƀà hơđang pram jơt nă, mơ cau ƀà hơđang jơt nă.

²⁶Bol khai gơs kwang cahrña làng bol kòp ngai. Ală broă kalke gen bol khai sồr cèng tus hơ Môise; mơya să tòm bol khai lơh nền is bol khai dê ală broă dềt.

²⁷Gen Môise tơngac po bèp khai dê, mơ Jetrô rê wơl hơ lơgar tòm khai dê.