Read koho Lik Ejiptơ 2 Bible Online

Lik Ejiptơ 2 - koho bible

Lik Ejiptơ 2

¹Tŭ hơ̆, dô nă cau tòm jơi bơtiàn Lebi bau mơ dô nă kòn ùr Lebi dê.

²Cau ùr hơ̆ bun, mơ deh dô nă kòn klau. Tòm tŭ khai gŏ hơ̆ la dô nă kòn hàng mơnĕ gen pồn kòn hơ̆ tòm pe kơnhai.

³Mơya tòm tŭ khai ò rgơi pồn jŏ rlau tai, gen khai ai dô nơm bài tàñ mơ proh, lềr gơ mơ cài nho, lồc behơ̆ khai ơn kòn dềt tòm dơlam gơ, mơ cèng gơ pơđồng tòm dà digùl ală tòm proh di gah hiòng Nil.

⁴Bi ùr kòn dềt ntào ngài ngài bơh tiah hơ̆ nàng sền ñchi bơta rơp gơlik tus di kòn dềt.

⁵Mơ tai tŭ hơ̆ kòn ùr Pharaôn dê lòt tus um dà hiòng Nil, ai ală cau ùr duh broă khai dê gen lòt kơnhơl rò gah hiòng. Kòn ùr bơtau gŏ bài hơ̆ digùl ală tòm proh, gen sồr cau ùr duh broă khai dê lòt ai gơ.

⁶Kòn ùr bơtau pò bài mơ gŏ kòn klau dềt. Kòn klau dềt hơ̆ ñìm, mơ khai gơs nùs nđàc sơngit di kòn dềt hơ̆, mơ đơs lah: “Do la dô nă tòm ală kòn dềt cau Hebrơ dê.”

⁷Gen bi ùr kòn dềt lùp kòn ùr bơtau lah: “Añ pal lòt hòi dô nă tòm ală cau ùr Hebrơ nàng ròng siam kòn dềt ai in sơl?”

⁸Kòn ùr bơtau ho lah: “Ơi, lòt tĕ.” Gen kòn ùr hơ̆ lòt mơ hòi mè kòn dềt dê tus.

⁹Kòn ùr bơtau đơs mơ khai lah: “Cèng tĕ kòn dềt do mơ ròng siam khai añ in, añ rơp tơm jền tơngai ai in.” Behơ̆, cau ùr kơnđu kòn dềt mơ ròng siam khai.

¹⁰Tòm tŭ kòn dềt neh dờng rau gen khai lam kòn hơ̆ tus hơ kòn ùr Pharaôn; khai dòp lơh gơs kòn khai dê, mơ tơmoh sơnđan la Môise mơ đơs lah: “Añ neh tă tơlik khai klàs bơh dà.”

¹¹Gơs dô ngai ne, tòm tŭ Môise neh dờng rau, khai lik lòt tus hơ tiah làng bol tòm khai dê mơ sền gŏ bol khai lơh broă bòl glar. Khai neh gŏ dô nă cau Ejiptơ pù lơh dô nă cau Hebrơ la dô nă gơp bơtiàn khai dê.

¹²Khai sền gùt dar mơ ò gŏ dô nă cau lơi, gen khai tơnchơt cau Ejiptơ mơ pồn ƀồc tòm bràs.

¹³Ngai hìng, khai lik lòt tai mơ gŏ bàr nă cau Hebrơ tòmlơh bal. Khai lùp cau neh lơh tìs lah: “Ñchi bơh tài mê pù lơh cau gơp jơi Hebrơ mê dê taih?”

¹⁴Cau hơ̆ đơs lah: “Ñcau neh pồ bơtào mê lơh gơs cau at bồ mơ cau kwang cahrña bol hi taih? Ngan sơl la mê kơlôi kòñ tơnchơt añ kung be mê neh tơnchơt cau Ejiptơ ne ơ?” Kơno behơ̆ gen Môise rngòt mơ kơlôi lah: “Bơta añ neh lơh neh cau git jơh rau.”

¹⁵Tòm tŭ Pharaôn neh kơno bơta hơ̆, geh kòñ tơnchơt Môise; mơya Môise dô pleh bơh di Pharaôn, lòt ơm tòm lơgar Midian, tềng hơ̆ khai nggui di gah dô nơm tơrlung dà.

¹⁶Mơ tai, dô nă cau gơnoar ơn phan duh khoai Midian dê gơs poh nă kòn ùr; bol khai lòt bơ̆ dà mơ tuh bềng tòm ală bòng nàng belàt bèp bol khai dê hùc.

¹⁷Mơya gơs dô êt nă cau ê belàt tus tềng hơ̆ mơ bơtrơh bol khai; gen Môise ñă ntào, dong tò ală cau ơruh hơ̆ mơ ai ală mpồl belàt in hùc dà.

¹⁸Tòm tŭ ală cau ơruh rê hơ Reuel la bèp bol khai dê, gen khai lùp lah: “Ñchi bơh tài ngai do ală kòn rê gòñ behơ̆ taih?”

¹⁹Bol khai ho lah: “Dô nă cau Ejiptơ neh dong bol hi klàs bơh di tê ală cau ê belàt, mơ khai kung bơ̆ dà bol hi in mơ ai mpồl belàt in hùc tai sơl.”

²⁰Gen khai lùp ală kòn ùr khai dê lah: “Ntềng đah cau hơ̆ ơm taih? Ñchi bơh tài ală kòn lòi khai lòt taih? Jà tĕ khai tus nàng sa piang lă.”

²¹Môise kòñ ơm mơ cau do, gen khai ai Jiphôra, kòn ùr khai dê Môise in bau.

²²Jiphôra deh dô nă kòn klau; Môise tơmoh sơnđan la Gersôm bơh khai đơs lah: “Añ neh gơlik gơs cau ơm ing tòm lơgar cau bơdìh.”

²³Tòm pah ngai jŏ jòng hơ̆, bơtau Ejiptơ loă rài. Làng bol Israel pơt wòl hơđơm yô dĭ gơna bol khai dê mơ rac ròc dan bơta dong kòl. Jơnau rac ròc hòi dan tài bơh bơta ơm dĭ bol khai dê guh tus hơ Yàng Tom Trồ.

²⁴Yàng Tom Trồ neh kơno jơnau pơt wòl bol khai dê mơ Kơnràñ kah wơl bơta ho pơgon mơ Abraham, Isak mơ Jakôp.

²⁵Behơ̆, Yàng Tom Trồ wèt sền di cau Israel mơ kơlôi rcang bơh bol khai.