Read koho Lik Ejiptơ 21 Bible Online

Lik Ejiptơ 21 - koho bible

Lik Ejiptơ 21

¹Do la ală bơta boh lam mê pal bơto làng bol in:

²Dilah mê blơi dô nă cau klau Hebrơ duh broă, khai rơp duh broă bol mê tòm prau nam; mơya tus di nam dơ̆ poh khai rơp geh khat gơboh, ò tơm wơl dô nơm phan lơi.

³Dilah khai tus mìng dô nă, gen khai rơp lik mìng dô nă; mơya dilah khai gơs bau ùr tòm tŭ khai tus, gen bau ùr khai rơp lik bal mơ khai.

⁴Dilah cau tòm khai dê jòi bau khai in, mơ dilah bau ùr khai dê tơnggơs ală kòn klau hala ală kòn ùr, gen cau ùr mơ ală kòn khai dê rơp gơrê bal mơ cau tòm khai dê, mìng dô nă cau klau rơp lik lơm.

⁵Mơya, dilah cau duh broă đơs lah: “Añ kòñ gơboh cau tòm, bau ùr mơ ală kòn añ jê, mơ añ ò bài lik khat gơboh,”

⁶gen cau tòm khai dê rơp lam khai tus di đap ală cau kwang cahrña, lam khai tus rềp di mpồng hala jrong mpồng, lồc behơ̆ ai dô nơm nsồc mơ lòs cuh tồr khai dê. Behơ̆, khai rơp duh broă cau tòm in jơh rài kis khai.

⁷Dilah dô nă cau tac kòn ùr khai dê lơh gơs cau duh broă, gen kòn ùr hơ̆ ò geh lik klàs kung be ală cau klau duh broă.

⁸Dilah khai ò niam nùs cau tòm neh sac rwah khai, gen khai pal lòi cau ùr duh broă geh tơwài wơl. Khai ò geh gơnoar tac cau ùr duh broă mơ ală làng bol bơdìh, tài bơh khai ò prap gàr jơnau ho bal mơ cau ùr duh broă.

⁹Dilah khai sac rwah cau ùr duh broă kòn klau khai in, gen khai pal gơwèt mơ cau hơ̆ be dô nă kòn ùr.

¹⁰Dilah khai bau mơ cau ndai, gen gơwèt mơ cau sơnròp khai ò geh gơnoar pơndut phan sa, phan soh, mơ ală gơnoar gơrê bal mơ bơta tòmbau.

¹¹Dilah khai ò lơh pe bơta do gơwèt hơ cau duh broă gen cau duh broă geh gơnoar lik khat gơboh, ò càng tơm jền lơi.

¹²Cau lơi pù lơh mơ tơnchơt dô nă cau gen cau hơ̆ rơp kong tơnchơt.

¹³Bulah behơ̆, dilah khai ò di gơs nùs lơh nền kòñ tơnchơt, mơya Yàng Tom Trồ neh lòi gơlik gơs behơ̆, gen khai pal ntoat dô tus di dô bă tiah mơ Añ rơp sồr rcang sir.

¹⁴Mơya dilah gơs dô nă cau bơtào kai gơrmơ̆i mơ gơs nùs kòñ tơnchơt dô nă cau ndai, gen kup cèng khai bơh di cơnòng duh khoai Añ jê mơ tơnchơt tĕ khai.

¹⁵Cau lơi pù lơh bèp hala mè khai dê gen pal kong tơnchơt.

¹⁶Cau lơi kup kơñau dô nă cau, gen khai pal kong tơnchơt, bulah khai neh tac cau hơ̆ rau hala gam lòi wơl.

¹⁷Cau lơi srat sơntơm bèp hala mè khai dê gen khai pal kong tơnchơt.

¹⁸Dilah gơs ală cau tòmlah bal, mơ cau do pòng cau ne mơ lŭ hala mơ kơndap tê, cau ne ò chơt, mơya pal bic di cơnòng,

¹⁹dilah khai ñă ntào jra gai lik lòt gùt dar, gen cau neh pòng khai rơp ò kòl kup glài; bulah behơ̆, khai pal tơm jền roh tơngai lơh broă, mơ dong kòl jơl tus di tŭ cau hơ̆ geh bòi wil tơl.

²⁰Dilah gơs dô nă cau ai gai pòng cau dĭ klau hala dĭ ùr khai dê mơ lơh khai in chơt mo, gen khai pal kong lơh glài,

²¹mơya dilah cau dĭ guh wơl tơnơ̆ mơ dô ngai hala bàr ngai, gen cau tòm ò kong lơh glài tài bơh cau dĭ la phan mơna khai dê.

²²Dilah gơs cau klau tòmlơh bal, gơtup di dô nă cau ùr bun mơ lơh khai in rlơs, mơya ò gơs bơta jê sồt kơnjơ̆, gen cau neh lơh gơlik bơta hơ̆ pal kong lơh glài tơmàl tơm phan jat be bau klau dan sa, mơ geh cau kwang cahrña ai gơnoar.

²³Mơya dilah gơs bơta jê sồt kơnjơ̆, gen mê pal ai bơta kis tơm bơta kis,

²⁴ai mat tơm mat, ai sề tơm sề, ai tê tơm tê, ai jơng tơm jơng,

²⁵ai lơhò tơm lơhò, ai sồt tơm sồt, ai ur tơm ur.

²⁶Dilah cau lơi pù lơh di di gar mat cau klau duh broă hala cau ùr duh broă he dê, mơ tơnroh gơ, gen cau tòmpal hồ toh khai lik khat gơboh nàng tơm wơl bơta roh mat hơ̆.

²⁷Mơ dilah cau lơi pù lơh rung dô nơm sề cau klau duh broă hala cau ùr duh broă khai dê gen khai pal hồ toh khai lik khat gơboh nàng tơm wơl bơta roh dô nơm sề hơ̆.

²⁸Dilah gơs dô nơm kơnrồ dam gĕ chơt dô nă cau klau hala dô nă cau ùr gen kơnrồ dam hơ̆ pal kong cơm lŭ chơt mơ poac gơ ò geh sa. Mơya cau tòm kơnrồ hơ̆ rơp ò gơkòl kup glài.

²⁹Bulah behơ̆, dilah bơh lài kơnrồ dam hơ̆ gơs bơta òs mòng la jak gĕ cau, mơ cau tòm neh geh cau yal tơnggit bơh bơta hơ̆ mơya khai ò krơ̆ kơnrồ hơ̆ tòm wàng, lòi gơ gĕ chơt dô nă cau klau hala dô nă cau ùr, gen kơnrồ hơ̆ pal kong cơm lŭ mơ cau tòm rơp kong tơnchơt sơl.

³⁰Bulah behơ̆, dilah cau dan sa dồs gen cau tòm kơnrồ rgơi tơm jat khà cau dan sa nàng tơwài bơta kis khai dê.

³¹Bơta boh lam do kung pal lơh jat dilah kơnrồ gĕ dô nă kòn klau hala dô nă kòn ùr.

³²Dilah kơnrồ dam gĕ dô nă cau dĭ klau hala cau dĭ ùr, gen cau tòm kơnrồ pal tơm pe jơt sieklơ priă cau tòm cau dĭ hơ̆ in; lồc behơ̆ kơnrồ pal kong cơm lŭ chơt.

³³Dilah dô nă cau pò bơnap trồm jrô, hala tò dô nơm trồm jrô mơ ò ai bơnap til wơl, dilah gơs dô nơm kơnrồ dam hala dô nơm alàng dùh tòm hơ̆,

³⁴gen cau tòm tò trồm pal tơm dồs cau tòm phan neh dùh tòm hơ̆ jat khà khai dan sa, mơ phan chơt hơ̆ gơrê mơ cau tò trồm.

³⁵Dilah kơnrồ dam cau lơi gĕ sồt kơnrồ dam cau ndai dê mơ tơnơ̆ hơ̆ gơ chơt, gen bàr nă cau tòmpal tac kơnrồ gam kis, lồc behơ̆ tòmpà ring bal khà priă neh geh bal mơ poac kơnrồ neh chơt hơ̆ sơl.

³⁶Bulah behơ̆, dilah neh git lah kơnrồ dam hơ̆ gơs bơta òs mòng la jak gĕ, mơ cau tòm ò krơ̆ gơtòm wàng, gen khai pal tơm, ai phan poan jơng tơm phan poan jơng, mơya phan poan jơng chơt rơp gơrê mơ khai.