Read koho Lik Ejiptơ 22 Bible Online

Lik Ejiptơ 22 - koho bible

Lik Ejiptơ 22

¹Dilah cau lơi kơñau dô nơm kơnrồ dam hala dô nơm belàt, lồc behơ̆ tơnchơt gơ hala tac gơ, gen khai pal tơm wơl pram nơm kơnrồ dam ala dô nơm, mơ poan nơm belàt ala dô nơm.

²Dilah dô nă cau ntung kơñau gơkòl kup tòm tŭ mut kơñau tòm hìu cau mơ kong pòng chơt gen cau pòng chơt ò gơkòl kup glài lơh gơhòr mhàm cau;

³mơya dilah bơta hơ̆ gơlik gơs tòm tŭ mattơngai neh lik rau, gen khai kong kup glài lơh gơhòr mhàm cau. Ngan la cau ntung kơñau pal tơm wơl; mơya dilah khai ò gơs phan lơi nàng tơm, gen khai pal kong tac gơs dĭ nàng tơm glài ntung kơñau khai dê.

⁴Dilah phan poan jơng neh kơñau gam kis tòm ală phan mơna khai gơs, ò git la kơnrồ, alàng hala belàt, gen khai pal tơm wơl bàr dơ̆ rlau.

⁵Dilah cau lơi ai phan poan jơng khai dê sa ñhơt tòm dô nơm ƀlàng hala tòm dô nơm suơn ño, mơ lòi bol gơ lòt lềng làng mut sa tòm dô nơm ƀlàng cau ndai dê, gen khai pal ai plai đo niam rlau jơh tòm ƀlàng hala tòm suơn ño khai dê mơ tơm wơl.

⁶Dilah gơs ồs sa mơ gơ sa rì tus di ală rlau lò tian gơs gơ sa tơn kòi gar hala kòi òhềt toès hala kòi neh cap rau, gen cau neh sing ồs hơ̆ pal tơm wơl jơh ală phan neh ồs sa.

⁷Dilah cau lơi jào priă hala màh cau gơp ƀòn khai in prap gàr, mơ gơs cau ntung kơñau bơh tòm hìu cau gơp ƀòn hơ̆, dilah cau ntung kơñau gơkòl kup, gen khai pal tơm bàr dơ̆ rlau.

⁸Mơya dilah cau ntung kơñau ò gơkòl kup gen cau tòm hìu pal ntào di đap ală cau kwang cahrña, nàng lơh nền lah khai neh ơn tê hơđang ală phan mơna cau gơp ƀòn khai dê hala ò.

⁹Tòm ală bơta tòm pơndang gơrềng bơh phan mơna, bơh dô nơm kơnrồ dam, dô nơm alàng, dô nơm belàt, ồi ào, hala dô nơm phan lơi ndai neh roh mơ gơs cau đơs lah: “Do la phan añ jê,” gen jơh bàr đah pal cèng bơta hơ̆ tus hơ kwang cahrña. Cau lơi mơ cau kwang cahrña đơs lah gơs glài gen cau hơ̆ pal tơm cau gơp ƀòn khai in bàr dơ̆ rlau.

¹⁰Dilah cau lơi jào dô nơm alàng, dô nơm kơnrồ dam, dô nơm belàt, hala dô nơm phan poan jơng lơi ndai cau gơp ƀòn he sền gàr, mơ phan hơ̆ chơt, sồt rmàñ hala gơkòl kup cèng roh thit tòm tŭ ò gơs cau lơi sền gàr,

¹¹gen digùl bol khai rgơi pơnring bơh bơta srat să di đap Yàng Jehôwa lah cau sền gàr phan poan jơng ò gŏ ơn tê hơđang phan mơna cau ndai dê. Cau tòm phan poan jơng pal dòp jơnau srat să hơ̆, mơ ò càng gơs bơta tơm wơl.

¹²Mơya dilah phan poan jơng gơkòl kup kơñau bơh di cau gơp ƀòn, gen khai pal tơm wơl cau tòm in.

¹³Dilah phan poan jơng gơkòl phan brê crè poac, khai pal cèng pơnah gam wơl nàng gơs cơng tàng, mơ khai rơp ò pal tơm wơl phan gơkòl crè hơ̆.

¹⁴Dilah cau lơi jồm bơh di cau gơp ƀòn he dô nơm phan poan jơng mơ gơkòl sồt rmàñ hala chơt tòm tŭ ò gơs mat cau tòm, gen cau hơ̆ pal tơm wơl.

¹⁵Mơya dilah gơs mat cau tòm bal mơ phan poan jơng, gen cau jồm gơ rơp ò càng tơm wơl. Dilah phan poan jơng neh ai ơpah, gen khà priă ơpah ala khà priă tơm wơl.

¹⁶Dilah cau lơi pơndòm ơniai dô nă cau ơruh dềt òhềt ho bau mơ bic mơ khai, gen cau hơ̆ pal dap khà priă tòmbau, mơ pal bau mơ khai.

¹⁷Dilah bèp cau ơruh dềt hơ̆ lơh nền ò ai kòn ùr khai dê tòmbau mơ cau klau hơ̆, gen cau klau hơ̆ kung pal dap khà priă tòm toh khà priă tòmbau cau ơruh dềt hơ̆ in.

¹⁸Bañ lòi kis cau ùr gơs gru bơjơu.

¹⁹Cau lơi bic mơ dô nơm phan poan jơng gen cau hơ̆ rơp kong tơnchơt.

²⁰Cau lơi ơn phan duh khoai yàng lơi ndai rlau mơ Yàng Jehôwa gen cau hơ̆ rơp kong tơnroh.

²¹Bañ gơwèt ò niam hala rồn bơklơn dô nă cau làng bơdìh, bơh bol mê neh la cau làng bơdìh tòm Ejiptơ.

²²Bañ bơklơn dô nă cau ùr bơnrau hala dô nă cau kòn đòi nàng lơh gơlik cồng nha he in.

²³Dilah bol mê lơh behơ̆, mơ bol khai hòi driau tus hơ Añ, gen ngan Añ rơp iat jơnau hòi driau bol khai dê.

²⁴Bơta gơjrañ Añ jê rơp gơhào khuh, mơ Añ rơp ai đào tơnchơt bol mê, gen bau ùr bol mê dê rơp gơlik cau ùr bơnrau, mơ kòn bol mê rơp gơlik kòn đòi.

²⁵Dilah bol mê ai dô nă cau siơ̆u siar tòm làng bol Añ jê ơm digùl bol mê càn jền, gen bañ lơh kung be cau ai càn priă, bañ sa jền cồng bơh di khai.

²⁶Dilah bol mê ai ào jrùh cau gơp ƀòn dê lơh gơs phan ai bồ, gen ai wơl tĕ khai in lài mơ tŭ mattơngai ñơp,

²⁷tài bơh ào jrùh khai dê la phan khai gơs mìng dô nơm nàng ngui jơm să khai dê. Ñchi phan khai rơp gơs nàng tơ̆ tòm tŭ bic mang taih? Tòm tŭ khai hòi driau tus mơ Añ gen Añ rơp iat jơnau khai, bơh Añ gơs nùs nđàc sơngit.

²⁸Bañ đơs tràl sơrbil di Yàng Tom Trồ hala srat rma cau kwang at bồ làng bol mê dê.

²⁹Bañ òbat ơn Añ in ală phan ơn bơh di ală đam jàr bol mê dê hala bơh di ală thùng tơrnòm bol mê dê. Bol mê pal ơn Añ in kòn klau tơnhoa tòm ală kòn klau bol mê dê

³⁰Kung lơh behơ̆ gơwèt mơ kơnrồ mơ belàt bol mê dê. Lòi bol gơ ơm mơ mè bol gơ dê tòm poh ngai, mơya ơn tĕ gơ Añ in tòm ngai phàm.

³¹Bol mê rơp la làng bol sàng goh Añ jê. Behơ̆, bañ sa poac phan poan jơng lơi neh gơkòl crè bơh phan brê; sơrbì tĕ so in sa.