Read koho Lik Ejiptơ 23 Bible Online

Lik Ejiptơ 23 - koho bible

Lik Ejiptơ 23

¹“Bañ tơlik ală jơnau yal ò song. Bañ lơh cơng blac nàng dong kòl cau iơh bơsak.

²Bañ jat bol oă tòm broă tìs. Tòm tŭ bol mê lơh cơng tòm bơta yă wơn, bañ ntào bal mơ bol oă mơ lơh tìs bơta song ring,

³mơ bañ sền òsơp dô nă cau rƀah tòm bơta yă wơn khai dê.

⁴Dilah bol mê tìp kơnrồ hala alàng cau sò tơm bol mê dê lòt tìs nrah, gen bol mê pal tề gơ wơl khai in.

⁵Dilah bol mê gŏ alàng dô nă cau gơjrañ di bol mê gơpừ hơđơm ơnòng kơnjơ̆ gơ dê gen bañ sang lòi gơ, pal dong kòl khai lơh gơ in ñă wơl.

⁶Bañ lơh rkwet rkwe bơta song ring cau rƀah lơòi bol mê dê tòm bơta yă wơn bol khai dê.

⁷Bañ bơtào bơta yă blac, mơ bañ tơnchơt dô nă cau ò gơs glài hala dô nă cau song ngan, bơh Añ rơp lơh nền glài cau lơh broă iơh behơ̆.

⁸Bañ dòp dô nơm phan loă, bơh phan loă lơh jơngo mat cau git wă, mơ lơh rkwet rkwe jơnau cau song ring dê.

⁹Mê bañ rồn bơklơn cau bơdìh, bol mê git mbe gơlơh nùs nhơm cau làng bơdìh, tài bơh bol mê neh la cau làng bơdìh tòm Ejiptơ.”

¹⁰Tòm prau nam bol mê sih gar tòm ƀlàng sre bol mê dê mơ toès plai đo gơ dê,

¹¹mơya tòm nam poh gen lòi tĕ ù ơm gòi, ò lơòr ò ngui. Gen ală cau rƀah tòm làng bol mê dê rgơi geh phan sa bơh di ù hơ̆, mơ ală phan poan jơng tòm brê rgơi sa phan lơi gam lòi wơl. Lơh tĕ behơ̆ mơ suơn ño bal mơ suơn ôlibe bol mê dê sơl.

¹²Lơh tĕ broă bol mê dê tòm prau ngai, mơya tòm ngai poh gen bañ lơh broă, tồ kơnrồ mơ alàng bol mê dê geh rlô, mơ cau dĭ deh tòm hìu mê dê bal mơ cau làng bơdìh rgơi geh bơtơl pràn wơl.

¹³Kơrhia tĕ lơh jat jơh ală bơta Añ neh đơs mơ mê. Bañ hòi dan mơ ală yàng ndai; bañ ai cau kơno ală sơnđan hơ̆ bơh di bơr bol mê dê.

¹⁴“Kòp nam pe dơ̆ bol mê pal rcang bơta pơjum sa duh rngòt Añ.

¹⁵Pơjum sa tĕ ngai wèr Piang Lă Ò Gơs Kañ jat be jơnau Añ neh sồr bol mê; sa tĕ piang lă ò gơs kañ tòm poh ngai. Lơh tĕ behơ̆ tòm jơ neh lơh nền tòm kơnhai Abip, bơh tòm kơnhai hơ̆ bol mê lik klàs bơh di Ejiptơ. Bañ gơs cau lơi tơlik mat di đap Añ mơ mpàng tê gòi.

¹⁶Bol mê pal kah prap bơta Pơjum Sa Kơnhai Toès bal mơ ală plai đo bồ sơnam gơlik bơh ală phan bol mê tùc tam tòm ƀlàng sre bol mê dê. Pơjum Sa Kơnhai Tơrgòm Prap, la tòm tŭ bol mê tơrgòm ală plai đo bơh ƀlàng sre bol mê dê.

¹⁷Kòp nam pe dơ̆ jơh ală cau klau pal tơlik mat di đap Yàng Jehôwa la Yàng Tom Trồ.

¹⁸Bañ ơn Añ in mhàm phan poan jơng bal mơ phan lơi gơs kañ tòm hơ̆. Dơngi ală phan ơn ngai pơjum sa Añ jê bañ prap lòi jơl tus ngai tơnơ̆.

¹⁹Cèng tĕ ală plai đo bồ sơnam niam rlau jơh bơh di ù tiah bol mê dê tus tòm hìu Jehôwa Yàng Tom Trồ bol mê dê. Bañ gơm be kòn tòm dà toh mè gơ dê.”

²⁰Do, Añ sồr dô nă cau gơnrơh lòt di đap bol mê nàng sền gàr bol mê tòm gùng dà mơ cèng bol mê tus di tiah Añ neh rcang sir.

²¹Ơn tĕ nùs tồr di khai mơ iat tĕ jơnau lơi khai đơs. Bañ tòmdră wơl mơ khai; khai rơp ò toh glài tòmdră mê dê ò, tài bơh Sơnđan Añ jê ơm tòm khai.

²²Dilah mê iat nền nền di jơnau lơi khai đơs, mơ lơh jat jơh ală jơnau Añ đơs, Añ rơp la cau sò tơm di cau sò tơm mê dê, mơ rơp tòmdră mơ cau tòmdră di mê.

²³Cau gơnrơh Añ jê rơp lòt hơđap mê mơ cèng mê mut tòm lơgar cau Amôr, cau Hetit, cau Pheres, cau Kanaan, cau Hebit, mơ cau Jebusit, mơ Añ rơp tơnroh jơh hir bol khai.

²⁴Bañ cùn khoai di đap ală yàng bol khai dê, hala duh khoai bol gơ, hala đòm jat bơta duh broă bol khai dê. Bol mê pal tơnroh jơh bol gơ, mơ jan bơcah lề lac ală lŭ jrong bol khai ơn duh khoai.

²⁵Duh khoai tĕ Jehôwa Yàng Tom Trồ bol mê dê; Kơnràñ rơp ai lơngai ală phan sa phan ñô bol mê dê. Añ rơp tă tơlik jơh ală bơta kòp jê bơh digùl bol mê,

²⁶rơp ò gơs cau ùr rlơs kòn hala cau ùr ơm kơnền tòm lơgar bol mê dê. Añ rơp ai bol mê in kis tơl jơh dô rài.

²⁷Añ rơp đùh bơta rngòt rngơt lài mơ mê, mơ lơh sơlồng sơlàng hơđang làng bol lơi tòmdră mơ bol mê. Añ rơp lơh jơh ală cau sò tơm mê dê wèt ngkòi mơ ntoat dô.

²⁸Añ rơp sồr òng kơnrơng lòt lài mơ mê nàng ting bơtrơh cau Hebit, cau Kanaan, cau Hetit dô pleh bơh di gùng mê dê.

²⁹Mơya Añ rơp ò ting bơtrơh jơh bol khai tòm dô nam, tài bơh lơgar rơp gơlik gơs ngềt ngơt, mơ phan poan jơng tòm brê rơp gơs oă ir bol mê in.

³⁰Rhòi rhòi Añ rơp ting bơtrơh bol khai bơh di đap bol mê, jơl tus di tŭ ntum khà bol mê dê geh gơbơtơl oă tồ rgơi ai ù tiah lơh gơs sre brê.

³¹Añ rơp bơtào kơ̆ nhàr lơgar bol mê dê bơh Dàlềng Pơrhê jơl tus di Dàlềng Philistin, bơh ƀlàng ngềt ngơt tus di Hiòng Ơphrat. Añ rơp jào tòm tê bol mê làng bol ơm tòm lơgar, mơ bol mê rơp ting bơtrơh bol khai lik bơh di đap bol mê.

³²Bañ bơtào bơta ho bal mơ bol khai, hala bal mơ ală yàng bol khai dê.

³³Bañ lòi bol khai ơm kis tòm lơgar bol mê dê, rngòt bol khai rơp lơh kai bol mê in tìs glài tòmdră mơ Añ tài bơh bơta duh khoai ală yàng bol khai dê, ngan gơ rơp gơlik dô nơm dă bol mê in.