Read koho Lik Ejiptơ 24 Bible Online

Lik Ejiptơ 24 - koho bible

Lik Ejiptơ 24

¹Gen Yàng Tom Trồ đơs mơ Môise lah: “Mê mơ Arôn, Nađap mơ Abihu bal mơ poh jơt nă cau kwang kra Israel dê guh tĕ mơ Yàng Jehôwa. Bol mê pal ơm ngài mơ duh khoai,

²mìng dô nă Môise rơp tus rềp mơ Yàng Jehôwa; ală cau ndai ò di pal tus rềp. Mơ làng bol kung ò di guh bal mơ khai.”

³Tòm tŭ Môise lòt tus yal làng bol in jơh ală jơnau đơs mơ ală bơta boh lam Yàng Jehôwa dê, gen bol khai ho dô jơnau bal lah: “Bol hi rơp lơh jat jơh ală jơnau Yàng Jehôwa neh đơs.”

⁴Môise cih wơl jơh ală bơta Yàng Jehôwa neh đơs. Àng drim hìng khai guh gòñ mơ bơt bơtào dô nơm cơnòng duh khoai di jơng mơnơm, mơ bơtào jơt bàr pơnai lŭ lơh gơs jrong sơnio bơh jơt bàr jơi bơtiàn Israel.

⁵Lồc behơ̆, khai sồr ală cau pơnu Israel, mơ bol khai ơn phan chu pơrguc mơ ơn ală kơnrồ dam lơh gơs ală phan ơn bơta ring lơngai Yàng Jehôwa in.

⁶Môise ai nggùl mhàm ơn tòm ală cờu, ai nggùl gam wơl gen khai rsìh hơđang cơnòng duh khoai.

⁷Chòp khai ai Sră Bơta Ho Bal mơ sền làng bol in iat. Làng bol ho lah: “Bol hi rơp lơh jat jơh ală jơnau Yàng Jehôwa neh đơs, bol hi rơp dòn bơr.”

⁸Gen Môise ai mhàm rsìh hơđang làng bol mơ đơs lah: “Do la mhàm bơta ho bal mơ Yàng Jehôwa neh bơtào mơ bol mê tòm toh jat be jơh ală jơnau do.”

⁹Môise mơ Arôn, Nađap mơ Abihu bal mơ poh jơt nă cau kwang kra Israel dê guh hơđang mơnơm,

¹⁰mơ sền gŏ Yàng Tom Trồ Israel dê. Hơđơm jơng Kơnràñ dê gơs phan gơlơh kung be lŭ màng gơcrà, àng be trồ gơcrà.

¹¹Mơya Yàng Tom Trồ ò pò tê Kơnràñ dê tòmdră mơ ală cau lam bồ Israel do; bol khai sền gŏ Yàng Tom Trồ, gen bol khai neh sa mơ hùc.

¹²Yàng Jehôwa đơs mơ Môise lah: “Guh tĕ mơ Añ hơđang mơnơm, mơ ơm tềng hơ̆; mơ Añ rơp ai mê in ală mpàn lŭ, gơs bơta boh lam mơ ală bơta sồr lam mơ Añ neh cih nàng bơto làng bol.”

¹³Gen Môise ntào bal mơ Jôsue la cau dong broă khai, mơ Môise guh hơđang mơnơm Yàng Tom Trồ dê.

¹⁴Khai đơs mơ ală cau kwang kra lah: “Ơm gơn tĕ tềng do jơl tus di tŭ bol hi rê wơl mơ bol mê. Arôn mơ Hur ơm mơ bol mê, cau lơi gơs broă lơi gen tus lùp bol khai.”

¹⁵Tòm tŭ Môise guh hơđang mơnơm, mhwal jơm gòm mơnơm,

¹⁶mơ bơta gơklŏ Yàng Jehôwa dê ơm hơđang mơnơm Sinai. Tòm prau ngai, mhwal jơm gòm mơnơm, tus di ngai poh Yàng Jehôwa ơm tòm puk mhwal hòi Môise.

¹⁷Gơwèt mơ cau Israel gen bơta gơklŏ Yàng Jehôwa dê sền gơlơh kung be dô nơm ồs sa pơrguc hơđang bồ mơnơm.

¹⁸Môise guh hơđang mơnơm gen khai mut tòm mhwal. Mơ khai ơm hơđang mơnơm tòm poan jơt ngai mơ poan jơt mang.