Read koho Lik Ejiptơ 25 Bible Online

Lik Ejiptơ 25 - koho bible

Lik Ejiptơ 25

¹Yàng Jehôwa đơs mơ Môise lah:

²“Đơs tĕ mơ làng bol Israel nàng bol khai ơn Añ in dô nơm phan ơn. Mê rơp dòp ală phan ơn bơh di kòp nă cau niam nùs ơn.

³Do la ală phan ơn mơ mê rơp dòp bơh di bol khai: màh, priă, mơ kòng;

⁴che brài dà tơlir trồ, dà gur, dà pơrhê, bài che dơmài lơbơn, sơnò be,

⁵gơltau belàt dam ñòm pơrhê mơ gơltau ka sur, chi sitim,

⁶mơñà ôlibe nàng chu ồs đèng, ală phan ngui nàng lơh gơs mơñà bong mơ phan chu gơs ƀô bơlhu,

⁷ală lŭ màng bò gơcrà bal mơ ală lŭ màng ndai nàng ơn di ephot mơ di ồi kơt ntơh.

⁸Gen sồr bol khai lơh Añ in dô nơm Hìu Duh Khoai Sàng Goh, nàng Añ rơp ơm digùl bol khai.

⁹Lơh tĕ Hìu Ing Duh Khoai do bal mơ ală phan ngui tòm gơtòm toh jat be sơnoa rnoas mơ Añ rơp sơnio mê in.”

¹⁰“Sồr tĕ bol khai lơh dô nơm đài mơ chi sitim, jòng dô rhiang jơt sentimet, ơnàng prau jơt prau sentimet, mơ jơnhoa prau jơt prau sentimet.

¹¹Ai tĕ màh ngan ƀềp jơh đah dơlam mơ đah bơdìh, mơ tep che màh gùt dar đài.

¹²Tŏ tĕ poan nơm dơwàng mơ màh mơ ơn tĕ gơ di poan mum đài: bàr nơm đah do mơ bàr nơm đah ne.

¹³Gen mòn tĕ mơng tùng mơ chi sitim mơ ƀềp màh;

¹⁴Tơmut tĕ ală mơng tùng tòm ală dơwàng di bàr gah đài nàng tùng đài.

¹⁵Ală mơng tùng rơp ơm sùm tòm dơwàng, bañ tă tơlik.

¹⁶Lồc behơ̆ mê ơn tĕ tòm Đài Bơta Cơng Tàng mơ Añ rơp ai mê in.”

¹⁷“Lơh tĕ dô nơm bơnap tơwài glài mơ màh ngan, jòng dô rhiang jơt sentimet, ơnàng prau jơt prau sentimet.

¹⁸Mơ lơh tĕ bàr nơm rùp ceruƀim mơ màh klơn, ơn bàr đah bồ bơnap.

¹⁹Lơh tĕ dô nơm cerup di đah bồ do mơ dô nơm tai di đah bồ ne; lơh tĕ ală ceruƀim gơđềt mơ bơnap di bàr đah bồ.

²⁰Ală ceruƀim gơs ală pơnđar pò hơđang bồ, jơm ndơp bơnap bơta nđàc. Ală ceruƀim wèt tòm toh mat bal, wèt sền di bơnap.

²¹Ơn tĕ bơnap bơta nđàc hơđang đài, mơ ơn tòm dơlam đài Bơta Cơng Tàng mơ Añ rơp ai mê in.

²²Tềng hơ̆, Añ rơp tìp mơ mê hơđang bơnap bơta nđàc digùl bàr nơm rùp ceruƀim hơđang đài Bơta Cơng Tàng, Añ rơp jào mê in jơh ală jơnau sồr Añ jê cau Israel in.”

²³“Lơh tĕ dô nơm cơnòng mơ chi sitim, jòng phàm jơt phàm sentimet, ơnàng poan jơt poan sentimet, mơ jơnhoa prau jơt prau sentimet,

²⁴tep dô dang che màh gùt dar.

²⁵Kung lơh tĕ dô pang mpàn cang gùt dar hơđang mat cơnòng jơnhoa pơgap poan nơm kòn tê mơ tep di mpàn hơ̆ dô dang che màh.

²⁶Tŏ tĕ poan nơm dơwàng màh mơ ơn gơ di poan mum cơnòng di poan jơng gơ dê.

²⁷Ală dơwàng rơp ơn rềp di mpàn cang nàng tơmut mơng tùng cơnòng.

²⁸Mòn tĕ mơng tùng mơ chi sitim, ƀềp gơ mơ màh, mơ ngui nàng tùng cơnòng.

²⁹Ai tĕ màh ngan mơ lơh gơs ală sơlào, prềng, gri, mơ mơngàn nàng ngui tròc ală phan ơn duh khoai ñô.

³⁰Ơn tĕ piang lă pơdơng hơđang cơnòng do nàng gơ ơm di đap Añ sùm sùm.”

³¹“Lơh tĕ dô nơm jơng đèng mơ màh ngan klơn lơho, bơh jơng tus di să, bồ, ală gri ơn mơñà gơs rùp be sơmbut bơkào mơ bơkào, jơh bol gơtòmđềt bal mơ gơp.

³²Prau nơm ntê gơcat bơh di jơng đèng, pe nơm đah do mơ pe nơm đah ne.

³³Bơh di kòp nơm ntê gơcat pe nơm gri gơs rùp kung be sơmbut bơkào gus mơ bơkào đèng mơ ntê bơkào đèng, pe nơm gri behơ̆ hơđang ntê di gah, mơ jơh prau nơm ntê gơcat bơh di jơng đèng, ntê lơi kung gơs ndròm bal behơ̆.

³⁴Mơ hơđang să jơng đèng gen gơs poan nơm gri gơs rùp kung be sơmbut bơkào gus, bơkào đèng mơ ntê bơkào đèng.

³⁵Dô nơm sơmbut rơp ơm hơđơm dô yô ntê sơnròp gơcat bơh di jơng đèng, sơmbut dơ̆ bàr ơm hơđơm dô yô ntê dơ̆ bàr, mơ sơmbut dơ̆ pe ơm hơđơm dô yô ntê dơ̆ pe, jơh ală la prau nơm ntê.

³⁶Ală sơmbut mơ ală ntê rơp tòmđềt dô bă mơ jơng đèng, lơh mơ màh ngan neh klơn lơho.

³⁷Gen lơh tĕ poh nơm đèng ơn di bồ gơ nàng gơ pơnđàng sòl tòm pah wah di đap gơ.

³⁸Pềs jơkap che brài ồs đèng mơ mơngàn ơn bùh đèng dê kung rơp lơh mơ màh ngan.

³⁹Cau rơp ngui pơgap pe jơt poan kơr màh ngan nàng lơh jơng đèng do mơ ală phan ngui bal mơ jơng đèng.

⁴⁰Behơ̆, mê pal lơh jơh ală phan hơ̆ tòm toh jat be sơnoa rnoas neh sơnio mê in hơđang mơnơm.”