Read koho Lik Ejiptơ 28 Bible Online

Lik Ejiptơ 28 - koho bible

Lik Ejiptơ 28

¹Sồr tĕ Arôn bi mê tus hơ mê bơh digùl cau Israel bal mơ ală kòn klau khai dê la Nađap, Abihu, Eleasa, mơ Ithamar, nàng bol khai gơs ală cau gơnoar ơn phan duh khoai duh broă Añ.

²Jing tĕ ală ồi ào ơn is sàng goh Arôn in nàng khai in geh di pal mơ geh ki ngàm

³Sồr tĕ jơh ală cau klau chài rgơi la ală cau mơ Añ neh ai bơta jak chài tòm ală bơta jing ală ồi ào Arôn in, nàng ơn is khai lơh gơs cau gơnoar ơn phan duh khoai duh broă Añ.

⁴Do la ală ồi ào mơ bol khai rơp lơh gơs: dô pang ồi dềt kơt ntơh, dô nơm ephot, dô blah ào jrùh, dô blah ào soh dơlam, dô nơm sơgơn mơ dô nơm che kơt but. Bol khai rơp lơh gơs ală ồi ào ơn is sàng goh hơ̆ Arôn bi mê in, bal mơ ală kòn klau khai dê nàng lơh gơs cau gơnoar ơn phan duh khoai duh broă Añ.

⁵Sồr bol khai ngui màh, che brài dà tơlir trồ, dà gur, dà pơrhê, mơ bài che dơmài lơbơn.

⁶Lơh tĕ ephot mơ che màh, bal mơ che brài dà tơlir trồ, dà phồng, mơ bài che dơmài lơbơn tàñ hàng mơnĕ, la broă dô nă cau chài tàñ.

⁷Pal gơs bàr pet ồi di pơnì kơt mơ bàr mum gơ dê nàng ephot rgơi geh kơt kơ̆.

⁸Che kơt but ephot geh jing bơka hàng mơnĕ kung behơ̆, gơ rơp geh kơt di ephot, mơ geh lơh mơ che brài dà tơlir trồ, dà gur, dà pơrhê, bal mơ bài che dơmài lơbơn.

⁹Ai tĕ bàr nơm lŭ kĕ pơrhê mơ pac hơđang hơ̆ sơnđan ală kòn klau Israel dê,

¹⁰jat be ngai deh bol khai dê; prau sơnđan hơđang dô nơm lŭ màng do, mơ prau sơnđan gam wơl hơđang lŭ màng ne,

¹¹Pac tĕ sơnđan ală kòn klau Israel dê hơđang bàr nơm lŭ màng hơ̆ tòm toh jat be cau chài pac ƀang kì, mơ ơn bàr nơm lŭ màng hơ̆ tòm dơwàng màh bơka hàng mơnĕ.

¹²Lồc behơ̆ kơt kơ̆ bol gơ hơđang ală pang ồi di pơnì ephot dê, ngui lơh gơs lŭ màng kah kirsơnre bơh ală kòn Israel dê. Arôn rơp àñ ală sơnđan bol khai dê hơđang pơnì khai dê lơh kirsơnre di đap Yàng Jehôwa.

¹³Lơh tĕ ală dơwàng mơ màh,

¹⁴mơ bàr dang che rơnjài mơ màh ngan gơlơh kung be dô dang che, mơ kơt ală che rơnjài hơ̆ di ală dơwàng màh.

¹⁵Lơh tĕ dô pang ồi kơt ntơh nàng ngui tòm bơta lơh nền, hơ̆ la broă dô nă cau chài rgơi lơh. Lơh tĕ gơ kung be neh lơh ephot, hơ̆ la lơh mơ màh mơ che brài dà tơlir trồ, dà gur, mơ dà pơrhê, bal mơ bài che dơmài lơbơn tàñ hàng mơnĕ.

¹⁶Gơ gơs poan đah ring bal, kòp đah pơgap bàr jơt bàr sentimet, mơ jing gơs bàr tap.

¹⁷Gen kơt tĕ poan sèng lŭ màng hơđang gơ. Tòm sèng dùl gơs lŭ kĕ phồng, lŭ kĕ gur, mơ lŭ màng tơlir dà;

¹⁸tòm sèng bàr gơs lŭ màng gơcrà, lŭ màng tơlir trồ mơ lŭ màng tơlir ñhơt;

¹⁹tòm sèng pe, lŭ màng gur tơlir, lŭ màng pơrhê, mơ lŭ màng gur;

²⁰tòm sèng poan gơs lŭ màng rmit, lŭ kĕ pơrhê mơ lŭ màng gơcrà. Ală lŭ màng do rơp ơn tòm ală dơwàng màh bơka hàng mơnĕ.

²¹Gơs jơh ală la jơt bàr nơm lŭ màng, kòp nơm gơs dô sơnđan dô nă tòm ală kòn klau Israel dê; kòp sơnđan geh pac kung be dô nơm ƀang kì gơs sơnđan dô jơi tòm jơt bàr jơi bơtiàn Israel dê.

²²Di ồi dềt kơt ntơh gen lơh tĕ ală che rơnjài mơ màh ngan tàñ be dô dang che,

²³lơh tĕ bàr nơm dơwàng mơ màh ơn hơđang bàr gah mum bồ ồi dềt kơt ntơh dê.

²⁴Kơt tĕ bàr dang che rơnjài màh mơ bàr dơwàng màh di ală mum ồi dềt kơt ntơh,

²⁵mơ bàr đah bồ ne che rơnjài dê gen kơt di ală dơwàng, kơt gơ di ală pang ồi hơđang pơnì ephot dê bơh đah đap.

²⁶Lơh tĕ bàr nơm dơwàng màh mơ kơt bol gơ di bàr đah mum ne ồi dềt kơt ntơh dê, tòm đah dơlam di gah ephot.

²⁷Lơh tĕ bàr nơm dơwàng màh tai mơ kơt bol gơ di đah hơđơm ală pet ồi kơt di pơnì di đap ephot, rềp di tiang ồi, hơđang che kơt ephot.

²⁸Ală dơwàng ồi dềt kơt ntơh dê pal kơt bal mơ ală dơwàng ephot dê bơh che tơlir trồ, lơh gơ in gơđềt bal mơ che kơt but nàng ồi dềt kơt ntơh ò gơrung bơh di ephot.

²⁹Tŭ lơi Arôn mut tòm Tiah Sàng Goh, khai rơp kơt hơđang ntơh khai sơnđan ală kòn klau Israel dê di ồi dềt kơt ntơh bơh bơta lơh nền gơs dô bơta kah kirsơnre gam sùm sùm di đap Yàng Jehôwa.

³⁰Hơđang ồi dềt kơt ntơh kung pal kơt Urim mơ Thumim nàng bol gơ ơm hơđang nùs Arôn dê tòm tŭ khai tus di đap Yàng Jehôwa. Behơ̆ di đap Yàng Jehôwa, Arôn rơp àñ sùm hơđang nùs khai dê ală bơta lơh nền gơwèt hơ ală kòn klau Israel dê.

³¹Jing tĕ ào jrùh ephot dê mơ bài dà tơlir trồ lơm,

³²gơs dô nơm trồm nàng tơmut bồ digùl, gùt dar trồm hơ̆ pal tàñ kung be mat bơtơng nàng gơ ò sèt.

³³Di tiang ào hơđơm bơrkoat tĕ ală plai lừu mơ che brài dà tơlir trồ, dà gur, mơ dà pơrhê, mơ kơt tĕ ală tang liang màh digùl ală plai lừu.

³⁴Ală tang liang mơ ală plai lừu pal ơm gùt dar tiang ào jrùh, kư̆ dô nơm tang liang gen pơnjat dô nơm plai lừu.

³⁵Arôn pal soh ào do tòm tŭ khai duh broă. Ntas ală tang liang rơp kơno tòm tŭ khai mut di Tiah Sàng Goh di đap Yàng Jehôwa hala tòm tŭ khai lik bơh di tiah hơ̆, tồ khai rơp klàs chơt.

³⁶Lơh tĕ dô pet màh ngan, mơ pac hơđang gơ kung be cau pac ƀang kì lah: “SÀNG GOH YÀNG JEHÔWA IN.”

³⁷Ai tĕ dô dang che dà tơlir trồ mơ kơt pet màh hơ̆ di chèo gòm bồ.

³⁸Gơ rơp ơm di bìng liang Arôn dê, mơ khai rơp àñ bơta tồi glài cau Israel dê tòm tŭ bol khai ơn ală phan ơn tơwài glài, ò git la phan lơi. Gơ rơp ơm sùm di bìng liang Arôn dê nàng bol khai geh Yàng Jehôwa dòp rò.

³⁹Jing tĕ ào soh dơlam mơ bài che dơmài lơbơn, mơ dô nơm sơgơn mơ bài che dơmài lơbơn. Che but pal gơs cau jing bơka hàng mơnĕ.

⁴⁰Jing tĕ ală kòn klau Arôn in ală ào soh dơlam, che but mơ sơgơn, tồ bol khai in geh di pal mơ ki ngàm.

⁴¹Tơnơ̆ mơ tŭ mê neh tơnsoh ală ồi ào do Arôn bi mê bal mơ ală kòn klau khai dê gen bong tĕ mơñà bol khai in, mơ pồ bơtào tĕ bol khai. Ơn is tĕ bol khai nàng lơh gơs ală cau gơnoar ơn phan duh khoai duh broă Añ.

⁴²Jing tĕ bol khai in srồmpha mơ bài che dơmài lơbơn nàng jơm să jan bơh but tus di bơnô.

⁴³Arôn mơ ală kòn klau khai dê pal soh srồmpha hơ̆ tŭ lơi bol khai mut tòm Sàl Tòm Mat hala tus rềp di cơnòng duh khoai nàng duh broă tòm Tiah Sàng Goh, tồ bol khai ò tìs glài mơ klàs chơt. Hơ̆ la dô bơta sồr lam gam sùm sùm Arôn mơ kòn sau khai dê.