Read koho Lik Ejiptơ 29 Bible Online

Lik Ejiptơ 29 - koho bible

Lik Ejiptơ 29

¹Do la bơta mê pal lơh nàng pồ bơtào Arôn mơ ală kòn klau khai dê nàng bol khai lơh gơs ală cau gơnoar ơn phan duh khoai duh broă Añ. Kup tĕ dô nơm kơnrồ dam mơ bàr nơm belàt dam ò tềl sồt rmàñ.

²Mơ ngui kơmbuh kòi mi rhền ngan lơh gơs piang lă ò gơs kañ, lơh tĕ piang lă mơ ƀañ bơcă mơ mơñà, mơ ƀañ lơho gơs mơñà bong hơđang.

³Ơn tĕ gơtòm dô nơm bài, lơh gơs phan ơn bal mơ kơnrồ dam mơ bàr nơm belàt dam.

⁴Cèng tĕ Arôn mơ ală kòn klau khai dê tus di mpồng mut Sàl Tòm Mat mơ ai dà tơnum bol khai.

⁵Lồc behơ̆, ai tĕ ală ồi ào tơnsoh Arôn in, hơ̆ la ào soh dơlam, ào jrùh ephot dê, ephot, mơ ồi dềt kơt ntơh. Kơt tĕ ephot dê khai bơh ală che kơt tàñ hàng mơnĕ.

⁶Tơndau tĕ sơgơn di bồ khai mơ kơt tĕ pet màh sàng goh di sơgơn,

⁷Ai tĕ mơñà ơn is nàng bong mơ tuh hơđang bồ khai dê.

⁸Cèng tĕ ală kòn klau Arôn dê mơ tơnsoh ào dơlam bol khai in,

⁹mơ tơndau tĕ sơgơn di bồ bol khai. Lồc behơ̆ kơt tĕ che but Arôn in mơ ală kòn klau khai in sơl. Gơnoar ơn phan duh khoai rơp gơrê bal mơ bol khai jat dô bơta sồr lam gam sùm sùm. Mê pal pồ bơtào Arôn mơ ală kòn klau khai behơ̆.

¹⁰Tề tĕ kơnrồ dam tus di đap Sàl Tòm Mat, Arôn mơ ală kòn klau khai dê rơp ơn tê hơđang bồ gơ.

¹¹Siat tĕ ngko gơ di đap Yàng Jehôwa di mpồng mut Sàl Tòm Mat dê.

¹²Ai tĕ dô êt mhàm kơnrồ hơ̆, iurŭ ràs tê tòm mhàm mơ bong ală ngke cơnòng duh khoai, mơ tuh mhàm gam wơl di jơng cơnòng duh khoai.

¹³Lồc behơ̆, ai tĕ jơh ală dơngi gòm gùt dar pròc klung, dơngi gòm gùt dar klòm, bàr nơm plai leh mơ dơngi hơđang gơ, mơ chu jơh hơđang cơnòng duh khoai.

¹⁴Mơya chu tĕ poac kơnrồ, gơltau mơ è gơ dê di đah bơdìh sàl ơm làng bol dê. Hơ̆ la dô nơm phan ơn tơwài glài.

¹⁵Kup tĕ dô nơm tòm bàr nơm belàt dam, Arôn mơ ală kòn klau khai dê rơp ơn tê hơđang bồ gơ.

¹⁶Siat tĕ ngko gơ, lồc behơ̆ ai mhàm mơ rsìh làm jơh gùt dar cơnòng duh khoai.

¹⁷Gen koh tĕ belàt gơs dô pet dô pet, rào goh pròc klung mơ jơng, lồc behơ̆ ơn bal mơ bồ gơ mơ ală pet ndai neh koh.

¹⁸Gen chu tĕ jơh hir dô nơm belàt dam hơđang cơnòng duh khoai. Hơ̆ la dô nơm phan ơn chu pơrguc, gơs ƀô bơkah ơn Yàng Jehôwa in.

¹⁹Kup tĕ belàt ne, Arôn mơ ală kòn klau khai dê rơp ơn tê hơđang bồ gơ.

²⁰Siat tĕ belàt hơ̆, ai dô êt mhàm bong di plai tồr ma Arôn dê mơ ală kòn klau khai dê, mơ bong hơđang ràs tê ma mơ ràs jơng ma bol khai dê; lồc behơ̆ rsìh mhàm gùt dar jơh ală đah cơnòng duh khoai dê.

²¹Gen ai tĕ dô êt mhàm hơđang cơnòng duh khoai bal mơ mơñà ngui nàng bong mơ rsìh hơđang Arôn mơ ală ồi ào khai dê, hơđang ală kòn klau khai bal mơ ală ồi ào bol khai dê. Behơ̆ Arôn bal mơ ală kòn klau khai dê mơ ală ồi ào bol khai dê rơp geh ơn is sàng goh.

²²Ai tĕ dơngi be dam hơ̆, dơngi tiang, dơngi gùt dar ală pơnah tòm kơndul gơ dê, pet dơngi lơho gòm klòm, bàr nơm plai leh bal mơ dơngi hơđang gơ, mơ bơnô ma. (Do la belàt dam ơn tòm bơta bong mơñà pồ bơtào)

²³Ai tĕ dô nơm piang lă, dô nơm ƀañ lơh mơ mơñà, mơ dô nơm ƀañ lơho bơh tòm bài piang lă ò gơs kañ neh ơn di đap Yàng Jehôwa,

²⁴ơn tĕ jơh ală phan hơ̆ tòm tê Arôn mơ ală kòn klau khai dê; lòi bol khai ơn phan ơn tơyài hơđang.

²⁵Gen ai tĕ jơh bơh di tê bol khai mơ chu gơ hơđang cơnòng duh khoai, bal mơ phan ơn chu pơrguc nàng gơs ƀô bơkah di đap Yàng Jehôwa; hơ̆ la dô nơm phan ơn chu mơ ồs ơn Yàng Jehôwa in.

²⁶Tơnơ̆ mơ tŭ mê neh ai al belàt dam ơn tòm bơta pồ bơtào Arôn gen tơyài tĕ di đap Yàng Jehôwa be phan ơn tơyài, mơ gơ rơp gơrê bal mơ mê.

²⁷Ơn is tĕ sàng goh ală pơnah belàt dam neh ngui lơh gơs phan ơn pồ bơtào Arôn bal mơ ală kòn klau khai dê, hơ̆ la al belàt dam neh tơyài hơđang mơ bơnô neh ơn.

²⁸Ală phan ơn do rơp la pơnah bơh cau Israel ơn Arôn mơ ală kòn klau khai in. Hơ̆ la pơnah mơ cau Israel ơn Yàng Jehôwa in bơh tòm ală phan ơn bơta gơtòmklac bal dê.

²⁹Ală ồi ào ơn is Arôn in rơp lòi wơl ală kòn sau khai in, nàng bol khai soh tòm tŭ geh bong mơñà mơ pồ bơtào gơs cau gơnoar ơn phan duh khoai.

³⁰Kòn klau rơp tơrbŏ lơh gơs cau gơnoar ơn phan duh khoai mơ tus tòm Sàl Tòm Mat nàng duh broă tòm Tiah Sàng Goh, gen rơp soh ồi ào hơ̆ tòm poh ngai.

³¹Ai tĕ belàt dam ngui tòm bơta pồ bơtào mơ gơm gơtòm dô bă tiah ơn is sàng goh.

³²Di gùng mut tòm Sàl Tòm Mat, Arôn mơ ală kòn klau khai dê rơp sa poac belàt dam hơ̆ bal mơ piang lă tòm bài.

³³Bol khai pal sa ală phan ơn do la phan ơn tơwài glài nàng pồ bơtào mơ ơn is bol khai.

³⁴Dilah poac belàt dam bơta pồ bơtào dê mơ piang lă gam tơngkah wơl tus di ngai hìng, gen chu tĕ tòm ồs. Bañ sa ală phan hơ̆ tài bơh ală phan hơ̆ neh ơn is sàng goh.

³⁵Lơh tĕ Arôn in bal mơ ală kòn klau khai dê jat kòp bơta Añ neh sồr mê, ai tĕ poh ngai nàng pồ bơtào bol khai.

³⁶Kòp ngai ơn tĕ dô nơm kơnrồ dam lơh gơs phan ơn tơwài glài nàng tơwài glài. Lơh tĕ cơnòng duh khoai gơlik gơs sàng goh bơh ơn dô nơm phan ơn tơwài glài gơ in, mơ bong mơñà mơ ơn is gơ in gơlik gơs sàng goh.

³⁷Tòm poh ngai tơwài glài tĕ cơnòng duh khoai in mơ ơn is gơ in gơlik gơs sàng goh. Gen cơnòng duh khoai rơp gơlik gơs sàng goh rlau jơh, mơ phan lơi tup di cơnòng duh khoai gen rơp gơlik sàng goh.

³⁸Do la ală phan mê pal ơn sùm be òs kòp ngai hơđang cơnòng duh khoai: bàr nơm belàt kòn dô nam.

³⁹Ơn tĕ dô nơm tòm àng drim mơ dô nơm tòm trồ mho.

⁴⁰Bal mơ belàt sơnròp gen ơn tĕ dùl kơr kơmbuh rhền kòi mi bơcă bal mơ dùl lit mơñà ôlibe bơh di mpal pat mơñà, mơ dùl lit tơrnòm ño nàng lơh gơs phan ơn ñô.

⁴¹Ơn tĕ belàt ne tòm tŭ trồ mòr mang bal mơ phan ơn mơ kòi mi mơ phan ơn ñô gơ dê kung be neh ơn tòm àng drim; hơ̆ la dô nơm phan ơn gơs ƀô bơkah Yàng Jehôwa in.

⁴²Tòm jơh ală rài rơp tus, phan ơn chu pơrguc do pal ơn sùm be òs kòp ngai di mpồng mut tòm Sàl Tòm Mat di đap Yàng Jehôwa. Tềng hơ̆ Añ rơp tìp mat mơ mê mơ đơs mơ mê;

⁴³kung tềng hơ̆ Añ rơp tìp mat mơ làng bol Israel, mơ tiah do rơp ơn is lơh gơs sàng goh bơh bơta gơklŏ Añ jê.

⁴⁴Behơ̆ Añ rơp ơn is sàng goh Sàl Tòm Mat bal mơ cơnòng duh khoai; kung rơp ơn is sàng goh Arôn mơ ală kòn klau khai dê tai sơl, nàng bol khai lơh gơs cau gơnoar ơn phan duh khoai duh broă di đap Añ.

⁴⁵Gen Añ rơp ơm digùl làng bol Israel mơ lơh gơs Yàng Tom Trồ bol khai dê.

⁴⁶Bol khai rơp git Añ la Jehôwa Yàng Tom Trồ bol khai dê, la Bơtau neh cèng bol khai lik klàs bơh di lơgar Ejiptơ nàng Añ rgơi ơm sùm digùl bol khai. Añ la Jehôwa Yàng Tom Trồ bol khai dê.