Read koho Lik Ejiptơ 3 Bible Online

Lik Ejiptơ 3 - koho bible

Lik Ejiptơ 3

¹Tŭ hơ̆ Môise ê gàr mpồl belàt po bèp khai dê la Jetrô, kung sơnđan la Reuel, la cau gơnoar ơn phan duh khoai Midian dê; khai lam mpồl belàt lòt ngài đah ne ƀlàng ngềt ngơt, mơ tus hơ mơnơm Hôrep la mơnơm Yàng Tom Trồ dê.

²Tềng hơ̆ cau gơnrơh Yàng Jehôwa dê tơlik mat mơ khai tòm lơmpiat ồs bơh digùl rlau lò. Môise sền gŏ rlau lò bulah ồs sa mơya gơ ò lề.

³Behơ̆ Môise kơlôi lah: “Añ pal lòt tus nàng sền bơta krơi dờng do, ñchi bơh tài rlau lò ò ồs sa lề.”

⁴Tòm tŭ Yàng Jehôwa neh gŏ khai cơnđòa tus nàng sền, gen Yàng Tom Trồ hòi khai bơh tòm gùl rlau lò lah: “Ơ Môise! Môise!” Môise đơs lah: “Gơs añ do!”

⁵Yàng Tom Trồ đơs lah: “Bañ tus rềp tai hơ do. Hồ tĕ gơltau jă mê dê, bơh tiah mê ơm ntào la tiah sàng goh.”

⁶Kơnràñ đơs tai lah: “Añ la Yàng Tom Trồ ồng pàng mê dê, Yàng Tom Trồ Abraham dê, Yàng Tom Trồ Jakôp dê.” Gen Môise kìng mat khai dê tài bơh rngòt sền gŏ Yàng Tom Trồ.

⁷Gen Yàng Jehôwa đơs lah: “Añ neh gŏ loh làng bơta bòl glar làng bol Añ jê tòm lơgar Ejiptơ. Añ neh kơno jơnau bol khai hòi rac tài bơh ală cau at bồ rồn bơklơn; mơ Añ git jơh bơta jê sồt bol khai dê.

⁸Behơ̆ Añ mù tus nàng dong tă bol khai klàs bơh di tê cau Ejiptơ, lam bol khai guh mơ lik bơh di lơgar hơ̆ tus hơ dô nơm lơgar niam mơ dờng ơnàng, lơgar gơs lìu làc dà toh mơ dà lơwe, hơ̆ la lơgar tòm cau Kanaan, cau Hetit, cau Amôr, cau Pheres, cau Hebit mơ cau Jebusit dê.

⁹Jơnau hòi rac cau Israel dê neh guh tus hơ Añ, mơ Añ neh gŏ mbe cau Ejiptơ rồn bơklơn bol khai.

¹⁰Behơ̆ tŭ do, lòt tĕ. Añ sồr mê lòt tus hơ Pharaôn nàng lam làng bol Añ jê la làng bol Israel lik klàs bơh di lơgar Ejiptơ.”

¹¹Mơya Môise đơs mơ Yàng Tom Trồ lah: “Añ la ñcau mơ pal lòt tus hơ Pharaôn nàng lam làng bol Israel lik klàs bơh di lơgar Ejiptơ taih?”

¹²Yàng Tom Trồ đơs lah: “Añ rơp ơm bal mơ mê. Do rơp la tềl ai mê in nàng git lah Añ la Bơtau neh sồr mê lòt: Tòm tŭ mê neh lam làng bol lik klàs bơh di lơgar Ejiptơ rau, bol mê rơp duh khoai Yàng Tom Trồ hơđang mơnơm do”.

¹³Môise đơs mơ Yàng Tom Trồ lah: “Dilah añ rơp lòt tus hơ làng bol Israel mơ đơs mơ bol khai lah: ‘Yàng Tom Trồ ồng pàng bol mê dê neh sồr añ lòt tus hơ bol mê,’ mơ bol khai lùp añ lah: ‘Ñchi sơnđan mat Kơnràñ dê taih?’ Gen ñchi añ rơp yal mơ bol khai taih?”

¹⁴Yàng Tom Trồ đơs mơ Môise lah: “AÑ LA BƠTAU GƠS IS GAM GƠS SÙM SÙM.” Kơnràñ đơs tai lah: “Yal tĕ làng bol Israel in be do: ‘BƠTAU GƠS IS neh sồr añ lòt tus hơ bol mê.’”

¹⁵Yàng Tom Trồ kung đơs tai mơ Môise lah: “Mê đơs tĕ mơ làng bol Israel: ‘Yàng Jehôwa la Yàng Tom Trồ ồng pàng bol mê dê, Yàng Tom Trồ Abraham dê, Yàng Tom Trồ Isak dê, Yàng Tom Trồ Jakôp dê, neh sồr añ lòt tus hơ bol mê.’ Hơ̆ la sơnđan gam sùm sùm Añ jê, la sơnđan pal kah bơh Añ bơh rài do tus rài ne.”

¹⁶Lòt tĕ, pơjum tơrgòm ală cau kwang kra Israel dê, mơ đơs mơ bol khai lah: “Yàng Jehôwa ồng pàng bol mê dê la Yàng Tom Trồ Abraham, Yàng Tom Trồ Isak, mơ Yàng Tom Trồ Jakôp dê, neh tơlik mat mơ añ mơ đơs lah: ‘Añ neh wèt sền di bol mê, mơ neh gŏ ñchi bơta bol khai neh lơh di bol mê tòm lơgar Ejiptơ.

¹⁷Mơ Añ neh ho dong tă bol mê lik bơh di bơta bòl glar bol mê dê tòm lơgar Ejiptơ nàng cèng tus hơ lơgar cau Kanaan, cau Hetit, cau Amôr, cau Pheres, cau Hebit, mơ cau Jebusit dê, la dô nơm lơgar gơs lìu làc dà toh mơ dà lơwe.’

¹⁸Ală cau kwang kra Israel dê rơp iat jơnau mê. Gen mê mơ ală cau kwang kra Israel dê pal lòt tus hơ cau bơtau Ejiptơ mơ đơs mơ khai lah: ‘Yàng Jehôwa la Yàng Tom Trồ cau Hebrơ dê, neh tìp mat mơ bol hi. Dan ai bol hi in lòt gùng tòm pe ngai tus hơ ƀlàng ngềt ngơt nàng ơn phan duh khoai Yàng Jehôwa in la Yàng Tom Trồ bol hi dê.’

¹⁹Mơya, Añ git la bơtau Ejiptơ rơp ò ai bol mê in lik lòt dilah ò gơs tơwòr tê gơnoar pràn chồl bơklơn khai.

²⁰Behơ̆ Añ rơp pò tê nàng pù lơh cau Ejiptơ tòm jơh ală bơta krơi Añ rơp lơh digùl bol khai. Tơnơ̆ mơ hơ̆, khai rơp ai bol mê in lik lòt.

²¹Añ rơp lơh làng bol Ejiptơ gơwèt niam mơ làng bol do; behơ̆ tòm tŭ bol mê lik lòt gen rơp ò lik lòt mpàng tê gòi.

²²Kòp nă cau ùr rơp lùp dan cau gơp ƀòn mơ cau ùr lơi ơm tòm hìu khai dê, ai bol khai in ală phan lơh mơ priă mơ màh, mơ ồi ào nàng tơnsoh ală kòn klau mơ ală kòn ùr bol mê dê. Behơ̆, bol mê rơp hồ ai jơh phan mơna cau Ejiptơ dê.”