Read koho Lik Ejiptơ 34 Bible Online

Lik Ejiptơ 34 - koho bible

Lik Ejiptơ 34

¹Yàng Jehôwa đơs mơ Môise lah: “Phàt tĕ bàr nơm mpàn lŭ be bàr nơm mpàn lài; mơ Añ rơp cih hơđang gơ ală jơnau neh cih hơđang bàr nơm mpàn lài mơ mê neh jan bơcah.

²Rcang sir tĕ tòm àng drim, lồc behơ̆ guh tĕ hơđang mơnơm Sinai mơ ntào di đap mat Añ. Să tòm mê gơs mat tĕ tềng hơ̆, hơđang bồ mơnơm.

³Bañ gơs cau lơi guh bal mơ mê, kung bañ gơs mat cau lơi di tiah gùt dar mơnơm, bulah mpồl belàt mơ kơnrồ kung ò geh sa ñhơt di đap mơnơm sơl.”

⁴Behơ̆ Môise phàt bàr nơm mpàn lŭ tòm toh kung be bàr nơm lài, mơ guh hơđang mơnơm Sinai tòm rìng àng drim jat be Yàng Jehôwa neh sồr; cèng bal bàr nơm mpàn lŭ tòm tê khai dê.

⁵Gen Yàng Jehôwa mù tòm dô puk mhwal, ntào di gah Môise tềng hơ̆ mơ khai mơ ai sơnđan Kơnràñ dê la: “Yàng Jehôwa.”

⁶Mơ Kơnràñ lòt gan di đap Môise, mơ yal lah: “Jehôwa! Jehôwa! La Yàng Tom Trồ nđàc sơngit mơ kòñ nđàc, òbat gơhào gơjrañ, tơngkah tơngkañ nùs kòñ gơboh kơ̆ dơn mơ dòn song,

⁷prap gàr bơta kòñ gơboh kơ̆ dơn tus rbô rài, toh bơta tồi glài iơh bơsak, bơta gơtup tìs mơ tồi glài. Mơya Kơnràñ ò kòp cau tìs glài la ò gơs glài, tài bơh tồi glài ồng pàng gen Kơnràñ lơh glài kòn sau bol khai dê tus di pe poan rài tơnơ̆.”

⁸Tŭ hơ̆ mo, Môise tơmbic să di tiah mơ duh khoai.

⁹Khai đơs lah: “Khoai Yàng Jehôwa, dilah añ geh bơta nđàc di đap Yàng, gen dan Yàng Jehôwa lòt bal mơ bol hi. Bulah làng bol do la dô nơm làng bol kơldang bồ, dan toh bơta iơh bơsak mơ tồi glài bol hi dê, mơ dan dòp bol hi lơh gơs sre brê Kơnràñ dê.”

¹⁰Gen Yàng Jehôwa đơs lah: “Tŭ do Añ bơtào dô bơta ho bal mơ mê. Di đap jơh làng bol mê dê, Añ rơp lơh ală bơta krơi òhềt tŭ lơi gơs tòm dô nơm làng bol lơi hơđang jơh plai ù. Làng bol mơ mê gơrê bal rơp sền gŏ broă lơh rngòt rngơt ngan mơ Añ la Yàng Jehôwa rơp lơh mê in.

¹¹Dòn bơr lơh jat tĕ jơnau Añ sồr mê ngai do. Añ rơp ting bơtrơh bơh di đap mê cau Amôr, cau Kanaan, cau Hetit, cau Pheres, cau Hebit, mơ cau Jebusit.

¹²Kơrhia tĕ, bañ bơtào bơta ho bal mơ cau ơm tòm lơgar mơ mê rơp mut, rngòt bol khai gơlik gơs dô nơm dă digùl bol mê.

¹³Phà tơrlah tĕ ală cơnòng duh khoai bol khai dê, pòng bơcah tĕ ală lŭ bol khai duh khoai, mơ koh tĕ ală jrong Asera.

¹⁴Bañ duh khoai yàng lơi ndai, bơh Yàng Jehôwa gơs sơnđan la Ƀoah Pơrñat la Yàng Tom Trồ ƀoah pơrñat.

¹⁵Kơrhia tĕ, bañ bơtào bơta ho bal mơ làng bol ơm tòm lơgar, bơh tòm tŭ bol khai tòmtir să tòm bol khai mơ ală yàng bol khai dê mơ ơn phan duh khoai ală yàng hơ̆ in, lồc behơ̆ bol khai rơp jà bol mê mơ bol mê rơp sa phan ơn duh khoai bol khai dê.

¹⁶Mơ tòm tŭ bol mê sac rwah dô êt nă kòn ùr bol khai dê lơh gơs bau ală kòn klau bol mê in, mơ ală kòn ùr hơ̆ să tòm bol khai tòmtir mơ ală yàng bol khai dê, bol khai lam ală kòn klau bol mê dê lơh jat kung be bol khai.

¹⁷Bañ tŏ ală rùp duh khoai.

¹⁸Pơjum sa tĕ ngai Pơjum sa Piang lă ò gơs Kañ. Tòm poh ngai sa tĕ piang lă ò gơs kañ jat be Añ neh sồr mê. Lơh tĕ behơ̆ di di tŭ jơ neh lơh nền tòm kơnhai Abip, bơh tòm kơnhai hơ̆ mê lik lòt bơh di Ejiptơ.

¹⁹Ală kòn deh sơnròp gen gơrê bal mơ Añ; kòp bal jơh ală kòn dam deh sơnròp tòm mpồl phan poan jơng mê dê, bulah la kơnrồ hala belàt kung behơ̆ sơl.

²⁰Tơwài tĕ alàng deh sơnròp mơ dô nơm belàt kòn, mơya dilah mê ò tơwài gơ gen dơrpă tĕ ngko gơ. Tơwài tĕ jơh ală kòn klau tơnhoa mê dê. Bañ gơs cau lơi lòt tơlik mat di đap Añ mơ mpàng tê gòi.

²¹Tòm prau ngai mê lơh tĕ broă, mơya tòm ngai poh pal rlô; bulah tòm kơnhai lơòr hala kơnhai toès mê kung pal rlô.

²²Pơjum sa tĕ ngai Pơjum sa ală poh dê mơ kơnhai toès kòi bồ sơnam mê dê, mơ ngai Pơjum Sa Tơrgòm Prap lồi nam.

²³Pe dơ̆ tòm kòp nam, jơh ală cau klau bol mê dê pal tơlik mat di đap Yàng Jehôwa Bơtau At Bồ Hơđang rau Jơh, la Yàng Tom Trồ Israel dê.

²⁴Añ rơp ting bơtrơh ală làng bol di đap mê, mơ pò ơnàng lơgar mê dê; mơ ò gơs cau lơi kòñ tòmpìt lơgar mê dê tòm tŭ mê guh tơlik mat di đap Jehôwa Yàng Tom Trồ mê dê.

²⁵Bañ ơn mhàm phan poan jơng ơn duh khoai dê bal mơ phan lơi gơs kañ, mơ bañ lòi wơl pơnah lơi tòm phan ơn bơh bơta Pơjum Sa Lòt Gan jơl tus àng hìng.

²⁶Cèng tĕ plai đo bồ sơnam niam rlau jơh gơlik bơh di ù tiah mê dê tơmut tòm hìu Jehôwa la Yàng Tom Trồ mê dê. Bañ gơm be kòn tòm dà toh be mè dê.”

²⁷Yàng Jehôwa kung đơs mơ Môise lah: “Cih tĕ ală jơnau do; lơh jat ală jơnau do mơ Añ neh bơtào ho bal mơ mê mơ Israel.”

²⁸Môise ơm tềng hơ̆ bal mơ Yàng Jehôwa tòm poan jơt ngai mơ poan jơt mang, ò sa piang lă hala hùc dà. Mơ Yàng Jehôwa cih hơđang ală mpàn lŭ ală jơnau bơta ho bal dê, hơ̆ la Jơt Bơta Sồr Lam.

²⁹Tòm tŭ Môise mù bơh di mơnơm Sinai, at bàr nơm mpàn lŭ Bơta Cơng Tàng tòm tê khai dê, khai ò git lah muh mat khai dê àng lơr tài bơh khai neh tòmbơhbơr mơ Yàng Jehôwa.

³⁰Tòm tŭ Arôn bal mơ jơh Israel sền gŏ Môise gơs muh mat àng lơr gen bol khai rngòt ò khin tus rềp Môise.

³¹Mơya Môise hòi bol khai, behơ̆ Arôn bal mơ jơh ală cau gơnoar at bồ mpồl jơnum rê wơl mơ Môise, mơ Môise tòmbơhbơr mơ bol khai.

³²Tơnơ̆ mơ hơ̆, jơh làng bol Israel tus rềp di khai, mơ khai ai bol khai in jơh ală jơnau sồr mơ Yàng Jehôwa neh ai khai in hơđang mơnơm Sinai.

³³Tòm tŭ Môise neh sir tòmbơhbơr mơ bol khai gen Môise ai chèo jơm gòm muh mat khai dê.

³⁴Mơya tŭ lơi Môise tus di đap Yàng Jehôwa nàng tòmbơhbơr mơ Kơnràñ, gen khai pò chèo jơm gòm muh mat khai dê jơl tus di tŭ khai lik bơh hơ̆. Mơ tòm tŭ khai neh lik gen khai yal wơl làng bol Israel in ală jơnau Kơnràñ neh sồr khai.

³⁵Làng bol Israel sền gŏ muh mat Môise àng lơr, gen Môise ai chèo jơm gòm muh mat khai dê jơl tus di tŭ lơi mut tòmbơhbơr mơ Yàng Jehôwa.