Read koho Lik Ejiptơ 35 Bible Online

Lik Ejiptơ 35 - koho bible

Lik Ejiptơ 35

¹Môise hòi pơjum wơl jơh mpồl jơnum Israel dê mơ đơs lah: “Do la ală bơta mơ Yàng Jehôwa neh sồr bol mê:

²Tòm prau ngai mê pal lơh sir ală broă, mơya ngai poh rơp la ngai sàng goh bol mê dê, hơ̆ la ngai Saƀat ơm rlô Yàng Jehôwa in. Cau lơi lơh broă lơi tòm ngai hơ̆ gen rơp kong lơh glài tơnchơt.

³Bañ sing ồs tòm ală hìu lơi bol mê dê tòm ngai Saƀat.”

⁴Môise đơs mơ jơh mpồl jơnum Israel dê lah: “Do la ală jơnau Yàng Jehôwa neh sồr:

⁵Ai tĕ tòm ală phan bol mê gơs mơ ơn dô nơm phan ơn Yàng Jehôwa in. Kòp nă cau lơi gơs nùs kòñ ơn gen cèng tĕ Yàng Jehôwa in dô nơm phan ơn mơ màh, mơ priă, mơ kòng;

⁶Che brài mơ che dơmài lơbơn dà tơlir trồ, dà gur, mơ dà phồng; sơnò be,

⁷gơltau be ñòm pơrhê, mơ gơltau ală ka sur, chi sitim,

⁸mơñà ôlibe nàng chu ồs, ală phan ƀô bơlhu nàng lơh gơs mơñà bong mơ kơlhô chu;

⁹ală lŭ màng pơrhê, mơ ală lŭ màng ndai nàng pơnđềt di ephot mơ di ồi dềt kơt ntơh.

¹⁰Jơh ală cau chài rgơi digùl bol mê pal lòt tus mơ lơh ală bơta Yàng Jehôwa neh sồr:

¹¹sàl mơ bài jơm hơđang, ală kơlnĕ, ală mpàn, ròc dra, ală jrong mơ ală trồm jrong;

¹²Đài Bơta Ho Bal mơ ală mơng tùng gơ; bơnap bơta tơwài glài bal mơ bài kơrnìng cang;

¹³cơnòng mơ ală mơng tùng gơ bal mơ jơh ală phan ngui bal mơ gơ, piang lă Bơta Gơs Mat dê;

¹⁴jơng đèng nàng pơnđàng mơ ală phan ngui bal mơ gơ, ală đèng mơ mơñà chu đèng;

¹⁵cơnòng chu kơlhô bal mơ ală mơng tùng gơ; mơñà bong mơ kơlhô, bài kơrnìng mpồng mut tòm Hìu Ing Duh Khoai;

¹⁶cơnòng ơn phan ơn chu pơrguc mơ lơ-i kòng gơ dê, ală mơng tùng gơ mơ jơh ală phan ngui bal mơ gơ; thùng ơn dà rào mơ jơng gơ dê;

¹⁷ală bài kơrnìng cang tiah jơng hìu dê bal mơ ală jrong mơ trồm jrong gơ dê, mơ bài kơrnìng mpồng mut di ƀlàng jơng hìu;

¹⁸ală mơng sơntơp sàl Hìu Ing Duh Khoai dê, mơ ƀlàng dềt dê; mơ ală che kơt gơ dê;

¹⁹ală yô ào tàñ nàng soh tòm tŭ duh broă tòm Tiah Sàng Goh; ồi ào sàng goh Arôn in la cau gơnoar ơn phan duh khoai, mơ ală ồi ào ală kòn klau khai dê tòm tŭ bol khai duh broă kung be ală cau gơnoar ơn phan duh khoai.”

²⁰Gen jơh làng bol Israel lik lòt bơh di đap Môise,

²¹mơ kòp nă cau lơi gơs nùs kòñ lơh broă mơ gơs nùs gơchồl gen lòt tus mơ cèng dô nơm phan ơn Yàng Jehôwa in nàng ngui tòm broă lơh gơs Sàl Tòm Mat, lơh gơs jơh ală phan ngui tòm hơ̆ mơ ală ồi ào sàng goh.

²²Jơh ală cau gơs nùs kòñ lơh broă, cau klau mơ cau ùr, lòt tus mơ cèng tơl ală phan bơka să mơ màh: ală crang sŏ, ală bơno tồr, ală sơmbiat, mơ ală phan ndai. Jơh tơl nă bol khai ơn màh bol khai dê lơh gơs phan ơn tơyài hơđang Yàng Jehôwa in.

²³Kòp nă cau lơi gơs che brài dà gur, dà pơrhê, dà phồng, brài che dơmài lơbơn, sơnò be, gơltau belàt dam ñòm phồng, mơ gơltau ka sur tòm hìu gen cèng tus.

²⁴Ală cau ơn phan mơ priă hala mơ kòng gen cèng ală phan hơ̆ lơh gơs dô nơm phan ơn Yàng Jehôwa in, mơ ală cau gơs chi sitim rgơi ngui lơh gơs phan lơi gen kung cèng tus.

²⁵Jơh ală cau ùr chài rgơi ai tê rồi che brài gen cèng tus che brài bol khai neh pồt: Che brài dà tơlir trồ, dà gur, dà pơrhê, hala brài che dơmài lơbơn.

²⁶Mơ jơh ală cau ùr gơs nùs kòñ lơh mơ chài rgơi gen rồi che brài sơnò be.

²⁷Ală cau lam bồ làng bol cèng lŭ màng pơrhê mơ ală lŭ màng ndai nàng pơnđềt di ephot mơ di ồi dềt kơt ntơh;

²⁸Bol khai kung cèng ală phan ƀô bơlhu mơ mơñà ôlibe nàng chu đèng mơ ngui lơh gơs mơñà bong mơ kơlhô.

²⁹Jơh làng bol Israel, cau klau mơ cau ùr, la ală cau gơs nùs kòñ ơn gen cèng ơn Yàng Jehôwa in ală phan ơn jat nùs kòñ bol khai dê nàng ngui tòm jơh ală broă mơ Yàng Jehôwa neh kơnòm di Môise sồr bol khai lơh.

³⁰Gen Môise đơs mơ làng bol Israel lah: “Do Yàng Jehôwa neh sac rwah Bejalel kòn klau Uri dê, sau Hur dê, tòm jơi bơtiàn Juda,

³¹mơ Kơnràñ neh ai khai in bềng lìu Hwềng Yàng Tom Trồ dê, bal mơ bơta chài rgơi mơ bơta git jak tòm jơh ală broă pac sềr

³²nàng lơh ală phan hàng mơnĕ mơ màh, mơ priă, mơ kòng,

³³nàng koh mơ pơnđềt ală lŭ màng, nàng lơh ală phan mơ chi, mơ lơh jơh ală phan pac sềr.

³⁴Kơnràñ kung ai khai in bal mơ Ôhôliap in, la kòn klau Ahisamak dê, tòm jơi bơtiàn Dan, bơta chài rgơi nàng bơto ală cau ndai.

³⁵Kơnràñ neh ai bol khai in oă bơta chài rgơi nàng lơh jơh ală broă kung be ală cau chài pac sềr, ală cau chài jing bơka ală che brài mơ brài che dơmài lơbơn dà tơlir trồ, dà gur, dà phồng, mơ ală cau chài tàñ; jơh tơl nă bol khai la cau chài rgơi rlau jơh tòm ală broă hơ̆.