Read koho Lik Ejiptơ 36 Bible Online

Lik Ejiptơ 36 - koho bible

Lik Ejiptơ 36

¹Bejalel, Ôhôliap mơ kòp nă cau mơ Yàng Jehôwa neh ai bơta chài rgơi nàng git mbe lơh gơlik gơs jơh ală broă tòm bơta bơt bơtào tiah sàng goh gen rơp lơh ală broă tòm toh jat be Yàng Jehôwa neh sồr.”

²Gen Môise hòi pơjum Bejalel, Ôhôliap, mơ ală cau mơ Yàng Jehôwa neh ai bơta chài rgơi mơ gơs nùs kòñ tus mơ lơh broă.

³Bol khai dòp bơh di Môise jơh ală phan ơn mơ làng bol Israel neh cèng tus nàng lơh ală broă bơt bơtào tiah sàng goh. Mơ kòp àng drim, làng bol kư̆ cèng pơnjat tai ală phan ơn jat nùs kòñ.

⁴Behơ̆ jơh ală cau chài rgơi lơh jơh ală broă bơt bơtào tiah sàng goh yal wơl broă bol khai ơm lơh,

⁵mơ đơs mơ Môise lah: “Làng bol cèng oă ală phan rlau mơ bơta pal càng nàng lơh gơlik gơs broă mơ Yàng Jehôwa neh sồr lơh.”

⁶Gen Môise ai dô jơnau sồr mơ bol khai lòt yal làm jơh tòm tiah sàl ơm làng bol dê lah: “Bañ gơs cau klau hala cau ùr lơi ơn phan lơi tai nàng bơt tiah sàng goh.” Behơ̆ làng bol ò cèng tus phan lơi tai,

⁷tài bơh ală phan neh gơs la oă rlau mơ bơta pal càng nàng lơh jơh ală broă.

⁸Jơh ală cau klau chài rgơi tòm mpồl ală cau lơh broă, bơt Hìu Ing Duh Khoai mơ jơt blah bài kơrnìng mơ che dơmài lơbơn tàñ mơ che brài dà tơlir trồ, dà gur mơ dà pơrhê, gơs dô nă cau chài rgơi jing bơka rùp ceruƀim tòm hơ̆.

⁹Jơh ală blah bài kơrnìng pal jòng ròt mơ ơnàng ndròm bal, jòng ròt jơt bàr met, ơnàng bàr met.

¹⁰Bol khai kơt bal pram blah kơrnìng lơh gơs dô blah, mơ kung lơh behơ̆ mơ pram blah ne.

¹¹Gen bol khai bơrkoat ală dơwàng mơ che brài dà tơlir trồ rò gah tiang blah kơrnìng neh kơt bal dô bă, mơ kung lơh behơ̆ di tiang blah kơrnìng neh kơt bal dô bă ne.

¹²Bol khai kung bơrkoat pram jơt dơwàng di dô blah kơrnìng, mơ pram jơt dơwàng di tiang blah kơrnìng kơt bal dô bă ne, ală dơwàng đah do mơ đah ne gơ ơm song tòm toh di đap gơ dê.

¹³Gen bol khai lơh pram jơt nơm kơlnĕ mơ màh, mơ ngui ală kơlnĕ hơ̆ tòmtơrbŏ bal bàr blah kơrnìng nàng lơh Hìu Ing Duh Khoai gơs bal dô bă.

¹⁴Bol khai lơh bài kơrnìng mơ sơnò be nàng tìm hơđang Hìu Ing Duh Khoai, jơh ală la jơt dùl blah.

¹⁵Jơh jơt dùl blah jòng ròt mơ ơnàng ndròm bal, jòng ròt pe jơt tal, ơnàng poan tal.

¹⁶Bol khai kơt pram blah kơrnìng lơh gơs dô blah, mơ kơt prau blah ne lơh gơs dô blah tai.

¹⁷Gen bol khai bơrkoat pram jơt nơm dơwàng brài rò gah tiang dô blah kơrnìng neh kơt bal dô bă, mơ kung lơh behơ̆ rò gah tiang blah kơrnìng neh kơt bal dô bă ne.

¹⁸Bol khai lơh pram jơt nơm kơlnĕ mơ kòng nàng tòmtơrbŏ sàl gơs bal dô bă.

¹⁹Gen bol khai kung lơh Hìu Ing Duh Khoai in dô blah gơltau be dam ñòm phồng nàng tìm hơđang, mơ hơđang hơ̆ dô blah tai mơ gơltau ka sur.

²⁰Bol khai ngui mpàn mơ chi sitim lơh dơrñang Hìu Ing Duh Khoai.

²¹Kòp pang mpàn jòng ròt pơgap poan met, ơnàng prau jơt prau sentimet,

²²gơs bàr nơm sề nàng crap bal dô bă. Bol khai lơh jơh ală mpàn Hìu Ing Duh Khoai ndròm bal behơ̆.

²³Bol khai lơh bàr jơt pang mpàn đah đơm Hìu Ing Duh Khoai in,

²⁴mơ lơh poan jơt trồm sề mơ priă ơm hơđơm bol gơ; bàr nơm trồm sề hơđơm kòp pang mpàn, dô nơm trồm hơđơm dô nơm sề.

²⁵Bol khai kung lơh bàr jơt pang mpàn đah ne in, hơ̆ la đah đang hìu Ing Duh Khoai,

²⁶mơ poan jơt trồm sề mơ priă; bàr trồm hơđơm kòp pang mpàn.

²⁷Đah ngkòi Hìu Ing Duh Khoai dê, hơ̆ la đah mattơngai mut, bol khai lơh prau pang mpàn,

²⁸mơ di bàr đah mum ngkòi Hìu Ing Duh Khoai gen lơh bàr pang mpàn.

²⁹Di bàr đah mum do gen bàr pang mpàn gơtòmcrap bal bơh hơđơm tus hơđang mơ gơtơmut bal tòm dô nơm dơwàng: jơh bàr mum bàr đah gen lơh ndròm bal behơ̆.

³⁰Behơ̆ gen gơs phàm pang mpàn mơ jơt prau nơm trồm sề mơ priă, hơđơm kòp pang gơs bàr nơm trồm sề.

³¹Bol khai kung lơh ală dra mơ chi sitim: pram nơm ròc dra kòp ală pang mpàn in di dô đah Hìu Ing Duh Khoai,

³²pram nơm dra ală mpàn in di đah ne, mơ pram nơm ală mpàn in di đah ngkòi Hìu Ing Duh Khoai, hơ̆ la đah mattơngai mut.

³³Bol khai lơh dra digùl nàng gơ lòt digùl ală pang mpàn bơh đah do tus đah ne Hìu Ing Duh Khoai dê.

³⁴Bol khai ƀềp ală pang mpàn mơ màh, mơ lơh ală dơwàng màh nàng tơmut tòm ală ròc dra. Bol khai kung ƀềp ală ròc dra mơ màh sơl.

³⁵Bol khai lơh dô blah kơrnìng mơ che brài dà tơlir trồ, dà gur mơ dà phồng, mơ bài che dơmài lơbơn tàñ hàng mơnĕ, gơs rùp ceruƀim jing bơka tòm hơ̆ bơh dô nă cau chài rgơi.

³⁶Bol khai lơh gơ in poan nơm jrong mơ chi sitim ƀềp màh. Bol khai lơh gơ in ală kơlnĕ mơ màh; mơ tŏ poan nơm trồm jrong gơ dê mơ priă.

³⁷Di mpồng mut tòm sàl bol khai lơh dô blah kơrnìng mơ che brài dà tơlir trồ, dà gur mơ dà phồng, mơ bài che dơmài lơbơn tàñ hàng mơnĕ; hơ̆ la broă cau chài jing bơka dê;

³⁸mơ bol khai lơh pram nơm jrong bal mơ ală kơlnĕ gơ in. Bol khai ƀềp màh di cồng ală jrong mơ di ală ròc dra; mơ lơh pram nơm trồm jrong mơ kòng.