Read koho Lik Ejiptơ 38 Bible Online

Lik Ejiptơ 38 - koho bible

Lik Ejiptơ 38

¹Bol khai kung lơh cơnòng duh khoai ơn phan chu pơrguc mơ chi sitim, jơnhoa dô met pe; gơ gơs poan gah ring bal, jòng ròt bàr met bàr.

²Bol khai lơh dô nơm ngke di kòp poan mum cơnòng duh khoai, gơđềt bal dô bă mơ cơnòng, mơ bol khai ƀềp cơnòng duh khoai mơ kòng.

³Bol khai ngui kòng lơh gơs jơh ală phan ngui bal mơ cơnòng duh khoai, hơ̆ la ală yang, ală cơnhŏ chŏ bùh, ală thùng ơn dà rsìh, ală cơnhŏ sề jră poac, mơ ală chàng.

⁴Bol khai lơh cơnòng duh khoai in dô nơm phan cang kung be bơtơng mơ kòng ơn hơđơm ală gah gơ dê, bơh jơng guh tus digùl.

⁵Bol khai tŏ ală dơwàng mơ kòng nàng tơmut mơng tùng di poan mum phan cang dê

⁶Bol khai mòn ală mơng tùng mơ chi sitim, ƀềp gơ mơ kòng.

⁷Bol khai tơmut ală mơng tùng tòm ală dơwàng di bàr gah cơnòng duh khoai, nàng tùng gơ. Bol khai lơh cơnòng mơ mpàn, brong tòm dơlam.

⁸Bol khai ngui kòng lơh krơh triang muh mat ală cau ùr duh broă di mpồng mut Sàl Tòm Mat dê nàng lơh gơs dô nơm thùng bal mơ jơng ơn gơ dê.

⁹Tơnơ̆ mơ hơ̆, bol khai lơh tiah ƀlàng jơng gùng Hìu Duh Khoai. Đah hơđơm jòng poan jơt poan met, gơs ală bài kơrnìng lơh gơs mơ bài che dơmài lơbơn dê,

¹⁰gơs bàr jơt nơm jrong chi mơ bàr jơt nơm trồm jrong mơ kòng, bal mơ ală kơlnĕ jrong mơ priă mơ ală che kơt di ală jrong.

¹¹Đah đang kung jòng poan jơt poan met, mơ gơs bàr jơt jrong chi mơ bàr jơt trồm jrong mơ kòng, gơs kơlnĕ mơ priă bal mơ che kơt di ală jrong.

¹²Đah mattơngai mut ơnàng bàr jơt bàr, gơs ală bài kơrnìng bal mơ jơt nơm jrong chi mơ jơt nơm trồm jrong bal mơ ală kơlnĕ mơ priă mơ ală che kơt di ală jrong.

¹³Đah hơđap la đah mattơngai lik kung ơnàng bàr jơt bàr met bài kơrnìng.

¹⁴Di dô đah mpồng mut gơs bài kơrnìng jòng ròt, prau met prau pe nơm jrong chi mơ pe nơm trồm jrong,

¹⁵mơ đah ne mpồng mut tiah jơng hìu dê kung gơs bài kơrnìng jòng ròt prau met prau, gơs pe nơm jrong chi mơ pe nơm trồm jrong.

¹⁶Jơh ală bài kơrnìng gùt dar jơng hìu dê lơh gơs mơ bài che dơmài lơbơn.

¹⁷Ală trồm ală jrong dê la mơ kòng. Ală kơlnĕ lơh mơng yồng kơrnìng mơ priă, ală cồng gơ kung ƀềp mơ priă; behơ̆ jơh ală jrong tiah ƀlàng jơng gùng hìu dê gơs ală mơng yồng mơ priă.

¹⁸Bài kơrnìng di mpồng mut di tiah jơng hìu tàñ mơ che brài dà tơlir trồ, dà gur mơ dà pơrhê bal mơ bài che dơmài lơbơn, hơ̆ la broă cau chài jing bơka dê. Gơ gơs jòng bàr jơt tal, jơnhoa ndròm bal mơ ală bài kơrnìng gùt dar ƀlàng jơng hìu dê, hơ̆ la bàr met bàr,

¹⁹gơs poan nơm jrong chi mơ poan nơm trồm jrong mơ kòng. Ală kơlnĕ mơ mơng yồng gơ dê la mơ priă, cồng gơ kung ƀềp priă sơl.

²⁰Jơh ală mơng sơntơp sàl Hìu Ing Duh Khoai mơ ƀlàng jơng hìu gùt dar gen lơh mơ kòng.

²¹Do la ală khà tơrgòm wơl jơh ală phan ngui nàng lơh gơs Hìu Ing Duh Khoai, la Hìu Ing Duh Khoai Cơng Tàng dê, neh cih prap bơh ală cau Lebi, jat jơnau sồr Môise dê, mơ hơđơm bơta at bồ Ithamar dê, la kòn klau cau gơnoar ơn phan duh khoai Arôn.

²²Bejalel, kòn klau Uri, sau Hur, bal mơ jơi bơtiàn Juda, lơh jơh ală bơta jat Yàng Jehôwa neh sồr Môise,

²³bal mơ khai gơs Ôhôliap, kòn klau Ahisamak, bal mơ jơi bơtiàn Dan, la cau chài lơh jơh ală broă mơ bơto sơnio cau ndai, kung la cau chài jing bơka mơ che brài dà tơlir trồ, dà gur, dà phồng, che brài mơ bài che dơmài lơbơn.

²⁴Jơh ală màh neh ơn tòm ală phan ơn tơyài hơđang mơ neh ngui tòm ală broă Tiah Sàng Goh dê la dô rbô kơr jat sieklơ Tiah Sàng Goh dê.

²⁵Priă dòp geh bơh di mpồl jơnum la ală cau neh geh kòp mơ cih tòm sră cih khà làng bol la pe rbô poan rhiang pe jơt kơr jat sieklơ Tiah Sàng Goh dê,

²⁶kòp nă ơn prau gram jat sieklơ Tiah Sàng Goh dê; ală cau geh kòp hơ̆ la bơh bàr jơt nam mơ dờng rlau, jơh ală la prau rhiang pe rbô pram rhiang pram jơt nă.

²⁷Behơ̆, pe rbô poan rhiang kơr priă neh ngui nàng tŏ ală trồm jrong tiah sàng goh dê, mơ trồm jrong ală bài kơrnìng dê, pe rbô poan rhiang kơr priă lơh gơs dô rhiang trồm jrong, hơ̆ la dô talơng dô nơm trồm jrong.

²⁸Bol khai ngui pe jơt kơr nàng lơh ală kơlnĕ di ală jrong, nàng ƀềp di bồ ală jrong, nàng lơh ală mơng yồng gơ dê.

²⁹Tơrgòm khà kòng neh ơn la bàr rbô poan rhiang kơr.

³⁰Bol khai ngui kòng hơ̆ lơh trồm jrong mpồng mut di Sàl Tòm Mat, lơh cơnòng duh khoai mơ kòng bal mơ jơh ală phan ngui bal mơ cơnòng duh khoai;

³¹lơh ală trồm jrong gùt dar rơng tiah ƀlàng jơng hìu mơ ală trồm jrong mpồng mut gơ dê, mơ jơh ală mơng sơntơp sàl Hìu Ing Duh Khoai dê mơ gùt dar ƀlàng jơng hìu dê.