Read koho Lik Ejiptơ 40 Bible Online

Lik Ejiptơ 40 - koho bible

Lik Ejiptơ 40

¹Yàng Jehôwa đơs mơ Môise lah:

²“Mê bơtào tĕ Hìu Ing Duh Khoai la Sàl Tòm Mat tòm ngai dùl kơnhai dùl.

³Ơn tĕ tòm hơ̆ Đài Bơta Cơng Tàng, lồc behơ̆ ai bài kơrnìng cang kìng gơ.

⁴Cèng tus tĕ cơnòng mơ ràng tơlik tĕ ală phan gơrê bal mơ gơ. Gen cèng tơmut tĕ jơng đèng mơ ơn ală đèng di tiah gơ dê.

⁵Ơn tĕ cơnòng màh chu kơlhô di đap Đài Cơng Tàng mơ yồng bài kơrnìng di mpồng mut Hìu Ing Duh Khoai dê.

⁶Ơn tĕ cơnòng ơn phan chu pơrguc di đap mpồng mut Hìu Ing Duh Khoai la Sàl Tòm Mat;

⁷ơn tĕ thùng dà di tiah digùl Sàl Tòm Mat mơ cơnòng duh khoai mơ tuh dà tòm hơ̆.

⁸Bơtào tĕ ƀlàng jơng hìu gùt dar gơ mơ yồng bài kơrnìng di mpồng mut ƀlàng jơng hìu.

⁹Ai tĕ mơñà bong mơ bong Hìu Ing Duh Khoai mơ jơh ală phan tòm hơ̆; ơn is sàng goh Hìu Ing Duh Khoai bal mơ jơh ală phan bal mơ gơ, gen gơ rơp gơlik sàng goh.

¹⁰Gen bong tĕ mơñà cơnòng ơn phan chu pơrguc bal mơ jơh ală phan ngui bal mơ gơ; ơn is sàng goh cơnòng duh khoai gen gơ rơp gơlik gơs sàng goh rlau jơh.

¹¹Bong mơñà tĕ thùng dà mơ jơng gơ dê; ơn is gơ sàng goh.

¹²Cèng tĕ Arôn mơ ală kòn klau khai dê tus di mpồng mut Sàl Tòm Mat dê mơ ai dà rào goh bol khai.

¹³Gen tơnsoh tĕ Arôn in ală ồi ào ơn is sàng goh, bong mơñà khai in mơ ơn is khai sàng goh nàng khai rơp gơs cau gơnoar ơn phan duh khoai duh broă Añ.

¹⁴Cèng tus tĕ ală kòn klau khai dê mơ tơnsoh bol khai in ào liah,

¹⁵bong tĕ mơñà bol khai in kung be mê neh bong mơñà bèp bol khai in nàng bol khai rơp gơs ală cau gơnoar ơn phan duh khoai duh broă Añ. Bơta bong mơñà bol khai in nàng gơs cau gơnoar ơn phan duh khoai rơp gơpơnjat tus di ală rài tơnơ̆.”

¹⁶Môise lơh jơh ală bơta tòm toh jat be Yàng Jehôwa neh sồr khai.

¹⁷Behơ̆ Hìu Ing Duh Khoai neh geh bơtào tòm ngai dùl kơnhai dùl nam bàr.

¹⁸Tòm tŭ Môise bơtào Hìu Ing Duh Khoai, khai ơn ală trồm jrong mơnàng di tiah gơ dê, bơtào ală mpàn, tơmut ală ròc dra digùl mơ bơtào ală jrong.

¹⁹Lồc behơ̆ khai ai sàl tìm hơđang Hìu Ing Duh Khoai mơ lă ală blah gơltau hơđang tòm toh jat be jơnau Yàng Jehôwa neh sồr khai.

²⁰Khai kung ai Mpàn Cơng Tàng mơ ơn gơtòm đài, tơmut ală mơng tùng đài dê mơ ơn bơnap bơta tơwài glài hơđang đài.

²¹Gen khai tùng đài tơmut tòm Hìu Ing Duh Khoai mơ yồng bài kơrnìng cang Đài Bơta Cơng Tàng tòm toh jat be jơnau Yàng Jehôwa neh sồr khai.

²²Môise ơn cơnòng tòm Sàl Tòm Mat di tiah đah Hìu Ing Duh Khoai, bơdìh bài kơrnìng;

²³mơ pràng piang lă pơdơng hơđang gơ, di đap Yàng Jehôwa, tòm toh jat be jơnau Yàng Jehôwa neh sồr khai.

²⁴Khai ơn jơng đèng tòm Sàl Tòm Mat, di đah đơm Hìu Ing Duh Khoai, tòm toh mat mơ cơnòng,

²⁵mơ chu ồs ală đèng di đap Yàng Jehôwa, tòm toh jat be jơnau Kơnràñ neh sồr khai.

²⁶Môise ơn cơnòng màh tòm Sàl Tòm Mat, di đap bài kơrnìng,

²⁷mơ chu kơlhô ƀô bơlhu hơđang hơ̆, tòm toh jat be jơnau Yàng Jehôwa neh sồr khai.

²⁸Gen khai yồng bài kơrnìng di mpồng mut Hìu Ing Duh Khoai.

²⁹Khai ơn cơnòng ơn phan chu pơrguc rềp di mpồng mut Hìu Ing Duh Khoai la Sàl Tòm Mat, mơ ơn hơđang hơ̆ ală phan ơn chu pơrguc, mơ ală phan ơn mơ kòi mbo, tòm toh jat be jơnau Yàng Jehôwa neh sồr khai.

³⁰Khai ơn thùng dà di tiah digùl Sàl Tòm Mat mơ cơnòng duh khoai, mơ tuh dà tòm hơ̆ nàng rào goh,

³¹Môise, Arôn bal mơ ală kòn klau khai ngui thùng dà hơ̆ rào tê mơ jơng bol khai dê.

³²Tŭ lơi bol khai mut tòm Sàl Tòm Mat hala tus rềp di cơnòng duh khoai gen bol khai rào goh tòm toh jat be jơnau Yàng Jehôwa neh sồr Môise.

³³Gen Môise bơtào ƀlàng jơng gùng gùt dar Hìu Ing Duh Khoai mơ cơnòng duh khoai, mơ yồng bài kơrnìng di mpồng mut tòm ƀlàng jơng gùng dê. Behơ̆, Môise neh lơh sir jơh ală broă.

³⁴Gen gơs dô puk mhwal jơm gòm Sàl Tòm Mat, mơ bơta gơklŏ Yàng Jehôwa dê bềng lìu Hìu Ing Duh Khoai.

³⁵Môise ò rgơi mut tòm Sàl Tòm Mat tài bơh gơs puk mhwal jơm gòm hơđang gơ, mơ bơta gơklŏ Yàng Jehôwa dê bềng lìu Hìu Ing Duh Khoai.

³⁶Tòm jơh ală gùng lòt làng bol Israel dê, tŭ lơi puk mhwal guh bơh di hơđang Hìu Ing Duh Khoai gen bol khai lik lòt;

³⁷mơya dilah puk mhwal ò guh hơđang gen bol khai ò lik lòt, jơl tus di ngai puk mhwal guh hơđang.

³⁸Behơ̆, puk mhwal Yàng Jehôwa dê ơm hơđang Hìu Ing Duh Khoai tòm trồ ngai, mơ gơs ồs tòm mhwal tòm trồ mang, di đap mat jơh làng bol Israel tòm jơh ală gùng lòt bol khai dê.