Read koho Lik Ejiptơ 7 Bible Online

Lik Ejiptơ 7 - koho bible

Lik Ejiptơ 7

¹Yàng Jehôwa đơs mơ Môise lah: “Sền tĕ, Añ neh lơh mê in kung be Yàng Tom Trồ Pharaôn dê, Arôn bi mê, rơp gơs cau gơnoar hwơr mê dê.

²Mê rơp yal wơl jơh ală jơnau Añ rơp sồr mê, mơ Arôn bi mê, rơp đơs mơ Pharaôn nàng khai lòi làng bol Israel lik lòt bơh di lơgar khai dê.

³Mơya Añ rơp lơh kơldang nùs Pharaôn, mơ bulah Añ bơtơl oă bơta krơi tềl is Añ jê tòm lơgar Ejiptơ,

⁴khai rơp ò iat mê. Gen Añ rơp pò tê Añ jê hơđang Ejiptơ, ngui ală broă gơnap gơnoar lơh glài nàng cèng ală mpồl làng bol Añ jê la làng bol Israel lik lòt bơh hơ̆.

⁵Tòm tŭ Añ pò tê tòmdră mơ Ejiptơ nàng cèng làng bol Israel lik lòt bơh di lơgar hơ̆, gen làng bol Ejiptơ rơp git Añ la Yàng Jehôwa.”

⁶Môise mơ Arôn lơh jat tòm toh be jơnau Yàng Jehôwa neh sồr bol khai.

⁷Tòm tŭ bol khai đơs mơ Pharaôn, gen Môise neh phàm jơt nam, mơ Arôn phàm jơt pe.

⁸Yàng Jehôwa đơs mơ Môise mơ Arôn lah:

⁹“Tŭ lơi Pharaôn sồr bol mê lah: ‘Lơh tĕ bơta krơi,’ gen mê đơs mơ Arôn lah: ‘Ai tĕ gai kwềt bi dê mơ sơrbì gơ di đap Pharaôn, gen gơ rơp gơlik gơs dô nơm bơs.’”

¹⁰Behơ̆, Môise mơ Arôn lòt tus hơ Pharaôn mơ lơh tòm toh jat be jơnau Yàng Jehôwa neh sồr. Arôn sơrbì gai kwềt khai dê di đap Pharaôn mơ ală kwang duh broă khai dê, gen gai kwềt gơlik gơs dô nơm bơs.

¹¹Gen Pharaôn sồr hòi ală cau jak chài, ală cau gru bơjơu, mơ ală cau juh proh Ejiptơ dê; bol khai kung lơh tòm toh behơ̆ kơnòm di ală bơta chài rgơi ndơp ndơr bol khai dê.

¹²Kòp nă bol khai sơrbì gai kwềt khai dê di tiah gen gơlik gơs dô nơm bơs. Mơya gai kwềt Arôn dê sa loan ală gai kwềt bol khai dê.

¹³Bulah behơ̆ nùs Pharaôn neh gơlik kră kơldang mơ khai ò iat Môise mơ Arôn, tòm toh be jơnau Yàng Jehôwa neh đơs.

¹⁴Gen Yàng Jehôwa đơs mơ Môise lah: “Nùs Pharaôn ò kong alah, khai ò ai làng bol in lik lòt.

¹⁵Àng drim hìng mê lòt tĕ tìp mat mơ Pharaôn tòm tŭ khai lòt tus hơ gah hiòng dà. At tĕ gai kwềt neh gơlik gơs bơs mơ ơm gơn tĕ di gah hiòng Nil nàng tìp mat mơ khai.

¹⁶Gen đơs tĕ mơ khai lah: ‘Yàng Jehôwa, la Yàng Tom Trồ cau Hebrơ dê neh sồr añ tus mơ đơs mơ bơtau lah: Lòi tĕ làng bol Añ jê lik lòt, nàng bol khai duh khoai Añ tòm ƀlàng ngềt ngơt. Mơya jơl tus di tŭ do mê neh ò iat jơnau.’

¹⁷Do la jơnau Yàng Jehôwa đơs: ‘Bơh broă do gen mê rơp git Añ la Yàng Jehôwa.’ Sền, Añ rơp ai gai kwềt tòm tê Añ mơ pòng dà hiòng Nil, gen gơ rơp tòmgơl mơ gơlik gơs mhàm.

¹⁸Ka tòm hiòng Nil rơp chơt, hiòng rơp gơs ƀô ồm; cau Ejiptơ ò rgơi hùc dà gơ dê.”

¹⁹Gen Yàng Jehôwa đơs mơ Môise lah: “Sồr tĕ Arôn lah: ‘At tĕ gai kwềt bi dê mơ pò tĕ tê bi dê hơđang dà Ejiptơ, hơđang ală croh dà mơ ală hiòng, hơđang ală tơnau mơ ală tiah prap lòi dà, mơ dà rơp gơlik gơs mhàm. Mhàm rơp gơs làm jơh tòm Ejiptơ, tian gơs tòm ală thùng ơn dà lơh mơ mpàn bal mơ ală gri mơ lŭ kung gơs mhàm sơl.’”

²⁰Môise mơ Arôn lơh jat tòm toh be jơnau Yàng Jehôwa neh sồr. Khai pò gai kwềt khai dê di đap Pharaôn mơ ală cau kwang duh broă khai dê, mơ pòng dà hiòng Nil mơ jơh ală dà gơlik gơs mhàm lơm.

²¹Ka tòm hiòng Nil chơt jơh, ală hiòng gơs ƀô ồm tian gơs cau Ejiptơ ò rgơi hùc dà gơ; mhàm gơlik gơs tòm làm jơh Ejiptơ.

²²Mơya ală cau juh proh Ejiptơ dê kung lơh gơlik gơs ndròm bal behơ̆ kơnòm di ală bơta chài rgơi ndơp ndơr bol khai dê, mơ nùs Pharaôn dê gơlik kră kơldang; khai ò iat Môise mơ Arôn, tòm toh be jơnau Yàng Jehôwa neh đơs.

²³Pharaôn wơlke mơ rê wơl hơ gơlang khai dê, ò ơn nùs dô êt lơi bơh bơta hơ̆.

²⁴Jơh ală cau Ejiptơ tò ù rò gah hiòng Nil nàng jòi dà hùc, tài bơh bol khai ò rgơi hùc dà tòm hiòng.

²⁵Dô poh neh rlau tơnơ̆ mơ tŭ Yàng Jehôwa pòng hiòng dà Nil.