Read koho Jop 1 Bible Online

Jop 1 - koho bible

Jop 1

¹Tòm lơgar Us, gơs dô nă cau sơnđan la Jop. Cau hơ̆ la wil tơl mơ song ring, duh rngòt di Yàng Tom Trồ mơ pleh ngài di bơta iơh bơsak.

²Khai gơs poh nă kòn klau mơ pe nă kòn ùr.

³Khai gơs poh rbô belàt, pe rbô làkđa, pram rhiang yô kơnrồ, pram rhiang alàng me, mơ oă ngan cau duh broă. Gen tàng khai la cau pas gơs tiơng pơnro rlau jơh tòm ală làng bol ơm đah mattơngai lik.

⁴Ală kòn klau khai dê òs yò sa dờng jat wềr bơh hìu cau do tus di hìu cau ndai dê, mơ sồr jà pe nă lŏ ùr bol khai dê tus ñô sa bal mơ bol khai.

⁵Tòm tŭ ală ngai ñô sa hơ̆ neh tơl wềr bol khai dê rau, Jop sồr cau lòt rcang nàng lơh sàng goh bol khai in, khai guh gòñ bơh àng drim, mơ ơn ală phan chu duh khoai jat be khà jơh ală kòn khai dê, bơh Jop neh đơs lah: “Digơlan ală kòn añ jê neh tìs glài, mơ tòm nùs bol khai srat rma di Yàng Tom Trồ mòn!” Hơ̆ la bơta Jop òs lơh behơ̆ sùm.

⁶Gơs dô ngai ne, ală cau gơnrơh lòt tus tơlik mat bol khai di đap Yàng Jehôwa, mơ Satan kung lòt tus bal mơ bol khai sơl.

⁷Yàng Jehôwa lùp Satan lah: “Mbơh mê tus taih?” Satan ho Yàng Jehôwa lah: “Añ lòt yơng tòm plai ù, mơ lòt ma kiau làm bă tiah.”

⁸Yàng Jehôwa lùp Satan tai lah: “Mbe mê sền gŏ Jop la cau duh broă añ jê taih? Hơđang plai ù ò gơs dô nă cau lơi be khai, wil tơl mơ song ring, duh rngòt di Yàng Tom Trồ, mơ pleh ngài di bơta iơh bơsak.”

⁹Satan ho Yàng Jehôwa lah: “Jop ò di duh rngòt di Yàng Tom Trồ dô bă ò kwơ sơl ơ?

¹⁰Yàng ò di neh lơh dô nơm pơnggàr gùt dar khai, hìu nhă khai mơ jơh ală phan gơrê bal mơ khai, tòm kòp đah ò ơ? Yàng neh ai lơngai ală broă tê khai neh lơh, mơ lơh ală phan mơna khai dê gơbơtơl oă tòm lơgar.

¹¹Mơya tŭ do pò tĕ tê Yàng dê ƀư di jơh ală phan khai neh gơs, gen khai rơp srat sơntơm di đap mat Yàng mo!”

¹²Yàng Jehôwa đơs mơ Satan lah: “Niam ngan, behơ̆ gen jơh ală phan khai neh gơs la ơm tòm gơnoar mê dê; mìng bañ pò tê mê dê tòmdră mơ să jan khai.” Behơ̆, Satan lik lòt bơh di đap Yàng Jehôwa.

¹³Dô ngai ne, tòm tŭ ală kòn klau mơ kòn ùr Jop dê ơm ñô sa tòm hìu bi tơnhoa bol khai dê,

¹⁴gen dô nă cau kong sồr ntoat tus mơ Jop mơ đơs lah: “Ală kơnrồ ơm lơòr sre, ală alàng ơm sa di gah hơ̆,

¹⁵gen cau Seba brồ tus tòmpìt jơh, mơ ai đào sreh tơnchơt ală cau duh broă, mìng dô nă añ geh klàs nàng yal ồng in.”

¹⁶Tòm tŭ cau hơ̆ gam đơs, gen dô nă cau ndai tus đơs lah: “Ồs Yàng Tom Trồ dê bơh hơđang trồ chu pơrguc ală belàt bal mơ ală cau duh broă mơ tơnroh jơh, mìng dô nă añ geh klàs nàng yal ồng in.”

¹⁷Tòm tŭ cau do gam đơs, gen dô nă cau ndai tus mơ đơs lah: “Làng bol Kalde pơjum gơs pe mpồl, brồ mut tòm mpồl làkđa mơ tòmpìt jơh, mơ ai đào sreh tơnchơt jơh ală cau duh broă, mìng dô nă añ geh klàs nàng yal ồng in.”

¹⁸Tòm tŭ cau do gam đơs, gen dô nă cau ndai tus mơ đơs lah: “Ală kòn klau mơ kòn ùr ồng dê ơm ñô sa bal tòm hìu bi tơnhoa bol khai dê,

¹⁹Gen nisơna gơs càl dờng khồm bơh đah ne ƀlàng bràs, lơh poan mum hìu, mơ hìu gơtơrlơm gơklơn chơt jơh bol khai, mìng dô nă añ geh klàs nàng yal ồng in.”

²⁰Gen Jop ñă ntào, crè ào khai dê mơ koah bồ, mơ tơmbic să tòm ù mơ duh khoai Yàng,

²¹Mơ khai đơs lah: “Añ ơm kuh lòi rồ lik bơh kơndul mè, gen añ kung ơm kuh lòi rồ mơ rê wơl behơ̆. Yàng Jehôwa neh ai mơ Yàng Jehôwa neh tă tơlik, jòng ro sơnđan Yàng Jehôwa dê!”

²²Tòm jơh ală bơta hơ̆, Jop ò tìs glài hala đơs iơh di Yàng Tom Trồ.