Read koho Jop 10 Bible Online

Jop 10 - koho bible

Jop 10

¹“Añ neh làp dil rài kis añ; añ rơp yoam pơrhiat khat gơboh, Mơ añ rơp đơs tòm bơta sràt bơtang hwềng soàn añ jê.

²Añ rơp đơs mơ Yàng Tom Trồ lah: ‘Dan bañ lơh nền glài añ; Mơya dan yal añ in git ñchi bơh tài Yàng tòmdră mơ añ.

³Yàng niam nùs sơl tòm tŭ rồn bơklơn añ, sền òsơp di broă lơh tê Kơnràñ dê, Mơ kòñ gơboh kai gơrmơ̆i cau iơh bơsak dê?

⁴Yàng gơs mat poac să sơl? Yàng sền kung be dô nă jơi kòn mơnus sền sơl?

⁵Ală ngai Yàng dê be ală ngai jơi kòn mơnus sơl? Hala ală sơnam Yàng dê ndròm mơ jơi kòn mơnus òs chơt sơl?

⁶Mơ Yàng pal sơwì jòi ală bơta tìs añ jê, Mơ jòi lùp bơh tồi glài añ jê,

⁷Bulah Yàng git añ ò tìs glài, Mơ ò gơs cau lơi rgơi dong añ klàs bơh tê Yàng dê sơl?

⁸Tê Yàng neh crơng mòn añ, Mơya ngai do Yàng tơnroh añ wơl ơ?

⁹Dan Yàng kah wơl la Yàng neh mòn añ mơ ù kơnàng, Mơ tŭ do Yàng kòñ lơh añ in rê wơl tòm kơmbuh ù ơ?

¹⁰Yàng ò di neh tuh tơlik añ be dà toh, Mơ lơh añ in khơt wơl kung be dơngi dà toh,

¹¹Yàng neh tơnsoh añ mơ gơltau mơ poac, Mơ tàñ añ bal mơ ntìng mơ ală ară.

¹²Yàng neh ai añ in bơta kis mơ bơta kòñ gơboh kơ̆ dơn; Mơ bơh bơta sền gàr Yàng dê, Kơnràñ neh ê sền gàr hwềng añ.

¹³Ală bơta hơ̆ Yàng pồn ndơp tòm nùs Yàng dê; Mơ añ git hơ̆ la bơta lơh nền lài Kơnràñ dê.

¹⁴Dilah añ tìs glài, Yàng kơp sền añ, Mơ ò toh bơta tồi glài iơh bơsak añ jê.

¹⁵Dilah añ tìs glài, gen bòl glar añ in! Bulah añ ò gơs glài, añ ò rgơi pò bồ hơđang, Bơh añ kong oă bơta ƀàssìl ƀàsso, Mơ gơkram tòm bơta moat jrùng jê sồt añ jê.

¹⁶Yàng mòc añ be klìu triă khin cha, Mơ lơh tai ală broă crih crài Kơnràñ dê tòmdră mơ añ.

¹⁷Yàng lơh pa ală cau lơh cơng tòmdră mơ añ, Mơ bơtơl bơta gơjrañ gơwèt mơ añ; Yàng cèng mpồl ling pa tòmdră mơ añ.

¹⁸Ñchi bơh tài Yàng cèng tơlik añ bơh kơndul mè? Lòi añ chơt lài mơ tŭ gơs cau lơi sền gŏ añ!

¹⁹Mơ kung be añ ò tŭ lơi geh tơnggơs, geh cèng mo tus hơ bơtô ƀồc bơh tŭ pa lik bơh kơndul mè,

²⁰Ală ngai rài kis añ jê ò di la mòr jơh sơl ơ? Lòi tĕ añ ơm is nàng añ geh dô êt pơndòm pơniang,

²¹Lài mơ tŭ añ lòt tus hơ tiah ò tŭ lơi rê wơl, Tòm lơgar klam jơngo mơ mƀur bơta chơt,

²²Tòm lơgar klam cik, mƀur bơta chơt mơ sơlồng sơlàng, La tiah bulah bơta àng kung ò gơkrơi be bơta klam jơngo.’”