Read koho Jop 11 Bible Online

Jop 11 - koho bible

Jop 11

¹Jôphar, cau Naama, ho wơl lah:

²“Ò gơs jơnau ho wơl ală jơnau hơ̆ sơl ơ? Cau đơs oă jơnau do rơp geh sơnđan la song ring ơ?

³Ală jơnau đơs be kòn se ồng dê rơp lơh cau in ơm mŏ mŏ ơ? Mơ tòm tŭ ồng bơrsèl tơnhial, ò gơs cau lơi rơp lơh ồng in ƀàssìl ơ?

⁴Bơh ồng đơs mơ Yàng Tom Trồ lah: ‘Ală bơta lơh lòt añ jê la sàng goh, Mơ añ la sàng goh di đap mat Yàng Tom Trồ.’

⁵Mơya ơ hơh! Añ kơp kòñ Yàng Tom Trồ rơp đơs, Mơ pò bơr Kơnràñ dê đơs mơ ồng.

⁶Mơ kơp kòñ Kơnràñ yal ồng in ală bơta ndơp ndơr bơta jak chài dê! Bơh bơta jak chài la oă đah. Gen git tĕ lah Yàng Tom Trồ lơh dô êt rlau mơ tồi glài ồng dê.

⁷Ồng rgơi jòi bàn ală bơta jrô ndơp Yàng Tom Trồ dê sơl? Ồng rgơi jòi bàn ală nhàr Bơtau Gơnap Gơnoar Làm Jơh sơl ơ?

⁸Gơ jơnhoa rlau mơ ală tap trồ, ñchi ồng rgơi lơh taih? Jrô rlau mơ lơgar làng ƀồc, mbe ồng rgơi git taih?

⁹Sơnoa rnoas gơ jòng rlau mơ plai ù, Mơ ơnàng rlau mơ dàlềng.

¹⁰Dilah Yàng Tom Trồ lòt tus kup jàm ồng, Mơ bơtào tiah cahrña, ñcau rgơi kơryan Kơnràñ taih?

¹¹Bơh Kơnràñ git ală cau ò kwơ, Tòm tŭ Kơnràñ sền gŏ tồi glài iơh bơsak, Kơnràñ rơp ò sền sơwì sơl ơ?

¹²Mơya dô nă cau bơrngơl gơla rơp gơs bơta git wă, tòm tŭ dô nơm alàng brê geh deh be kòn mơnus.

¹³Mơya dilah ồng ơn nùs ồng dê dô bă song ngan, Ồng rơp pò tê ồng dê wèt hơ Yàng,

¹⁴Dilah tồi glài iơh bơsak ơm tòm tê ồng dê, gen sang ngài tĕ gơ, Mơ bañ lòi bơta iơh ơm tòm sàl ồng dê,

¹⁵Gen ngan ồng rơp pò mat hơđang mơ ò ƀàssìl; Ồng rơp geh ring lơngai mơ rơp ò rngòt;

¹⁶Ồng rơp hŭi bơta jê sồt ồng dê, Ồng rơp kah gơ be hiòng dà neh hòr ngài.

¹⁷Mơ rài kis ồng dê rơp àng rlau mơ trồ gùl ngai, bơta jơngo gơ dê rơp gơlik be trồ àng drim.

¹⁸Mơ ồng rơp dòn nền, tài bơh gơs bơta kơp kòñ; Ồng rơp geh sền gàr mơ ơm rlô tòm bơta ring lơngai.

¹⁹Ồng rơp bic rlô, mơ ò gơs cau lơi lơh ồng in rngòt rngơt, oă cau rơp jòi dan bơta nđàc ồng dê.

²⁰Mơya gar mat cau iơh bơsak dê rơp gơlik roh gơcoh, bol khai ò gơs gùng lơi nàng dô pleh; Bơta kơp kòñ bol khai dê kung be cau lồi nhơm.”