Read koho Jop 14 Bible Online

Jop 14 - koho bible

Jop 14

¹“Kòn mơnus deh bơh cau ùr, kis tòm dô êt ngai, bềng lìu bơta bòl glar.

²Khai hòn dờng kung be bơkào gen ñòp ro, ntoat dô be dô nơm mƀur, khai ò ơm jŏ jòng.

³Yàng sền trol di dô nă kòn mơnus behơ̆ sơl ơ? Yàng cèng añ tus nàng Yàng cahrña sơl ơ?

⁴Ñcau rgơi cèng dô nơm phan sàng goh lik bơh dô nơm phan ò sàng goh sơl ơ? Ò gơs dô nă cau lơi rgơi lơh!

⁵Ală ngai kòn mơnus di neh lơh nền rau, mơ ală khà kơnhai bol khai neh yal tơnggit oh mi in, Mơ oh mi neh geh lơh nền nhàr nàng gơ ò rgơi lòt rlau.

⁶Dan Yàng pleh mat bơh di bol khai, mơ lòi bol khai ơm is, Bol khai geh hòn chò be cau lơh broă bòl glar sir ală ngai bol khai dê.

⁷Bơh dô nơm tòm chi kung gơs bơta kơp kòñ, Dilah neh kơl rau, gơ rơp hòn tai, Mơ rơp ò dơh cat sơmbut tai.

⁸Bulah ryas gơ dê neh kra tòm ù, mơ tòm gơ dê neh chơt tòm ù,

⁹Tòm tŭ gơs nhơm dà gen gơcat sơmbut, Mơ gơcat ală ntê kung be dô đòm chi dềt.

¹⁰Mơya kòn mơnus chơt mơ ơm bic tềng hơ̆, Kòn mơnus tac nhơm gen ntềng đah bol khai taih?

¹¹Kung be dà tòm tơnau nhơm gơguh roh thit, mơ be dô nơm hiòng dà soat mơ ro rañ.

¹²Kung behơ̆, kòn mơnus neh bic rau gen ò guh tai; Jơl tus di tŭ ală tap trồ ò gam tai, bol khai kung ò kah rngal, hala guh bơh bơta bic lơhă bol khai dê.

¹³Dan Yàng pồn ndơp añ tòm lơgar làng ƀồc, mơ pồn ndơp añ jơl tus di tŭ bơta gơjrañ Kơnràñ dê lòt rlau, Dan Yàng lơh nền añ in dô tŭ tơngai, mơ kah wơl añ!

¹⁴Dilah kòn mơnus chơt, khai rơp kis wơl sơl? Jơh ală ngai bòl glar duh broă añ jê, Añ kơp gơn jơl tus di tŭ bơta hồ toh añ jê neh tus.

¹⁵Yàng rơp hòi añ, mơ añ rơp ho wơl; Yàng rơp wèt sền bơh broă lơh tê Yàng dê.

¹⁶Gen Yàng ò kòp ală cơnđòa añ jê, Yàng kung ò kah tồi glài añ jê.

¹⁷Ală bơta tìs añ jê rơp geh tap ƀang kì til kơ̆ tòm dô nơm kơldung; Yàng rơp jơm gòm ală bơta tồi glài iơh bơsak añ jê.

¹⁸Mơya be mơnơm tơrlah tơrlơm mơ lề lac, Mơ pơnai lŭ kòl tă cèng ngài bơh tiah gơ dê.

¹⁹Dà hòr lơh siar lŭ, Dà tih cèng pơrdô kơmbuh ù; Kung behơ̆, Yàng tơnroh bơta kơp kòñ kòn mơnus dê.

²⁰Yàng tòmdră pha rlau sùm sùm mơ kòn mơnus, mơ khai roh thit; Yàng tòmgơl rùp să bol khai, mơ bơtrơh bol khai lòt ngài.

²¹Ală kòn sau bol khai dê gơlik dờng màng, mơ bol khai ò git; Bol khai gơkòl tơmù tòm tiah liah, bol khai kung ò ơn nùs kơlôi.

²²Khai mìng git bơta jê sồt să jan khai dê, Mơ mìng ñìm rac bơh să tòm bol khai dê lơm.”