Read koho Jop 19 Bible Online

Jop 19 - koho bible

Jop 19

¹Gen Jop ho wơl lah:

²“Nđò jŏ oh mi rơp lơh jê sồt añ, mơ tơnlề añ mơ jơnau đơs taih?

³Neh jơt dơ̆ rau oh mi lah pơrhơng añ, Oh mi ò git ƀàssìl lơh iơh di añ taih?

⁴Dilah ngan la añ neh lơh lòt tìs nrah, bơta tìs añ jê gam ơm mơ añ.

⁵Dilah ngan la oh mi kòñ pơnhừ să tòmdră mơ añ, mơ lơh añ in ƀàssìl mơ jơnau đơs tòmdră mơ añ,

⁶Gen git tĕ lah hơ̆ la Yàng Tom Trồ neh lơh añ in bòl glar jê sồt, Mơ dang bơtơng Kơnràñ dê gùt dar añ.

⁷Bulah tòm tŭ añ hòi driau: ‘Iơh bơsak ngan!’ Añ ò gơs jơnau ho wơl. Bulah añ hòi dờng jơnau, mơya ò gơs bơta song ring,

⁸Yàng neh cang gùng añ nàng añ ò rgơi lòt gan; Kơnràñ neh ơn bơta klam jơngo hơđang gùng lòt añ jê.

⁹Kơnràñ neh tă tơlik bơta gơklŏ bơh di añ, Mơ tă sơgơn gơklŏ hơđang bồ añ.

¹⁰Kơnràñ neh tơnroh añ bơh kòp đah mơ añ roh thit, Kơnràñ dŭi ryas bơta gơn kơnòm añ jê kung be dô đòm chi.

¹¹Bơta gơjrañ Kơnràñ dê hìt tòmdră mơ añ, Kơnràñ kòp añ kung be cau sò tơm Kơnràñ dê.

¹²Ală mpồl ling Kơnràñ dê dô bă bal brồ tus, bol khai bơt theng gơrwàng tòmdră mơ añ, Mơ sơntơp sàl gùt dar sàl añ jê.

¹³Kơnràñ neh ơn hìu nhă añ jê ngài bơh añ, Ală cau mòng git añ gơlik gơs be cau crih mat bơh di añ.

¹⁴Ală cau gơp bơtiàn añ jê mơ cau bơyô đềt mềr añ jê neh lòt ngài bơh añ.

¹⁵Ală cau nac tòm hìu añ neh hŭi añ, mơ ală cau dĭ ùr añ jê sền añ be dô nă cau nac crih, añ neh gơlik be dô nă cau lơgar bơdìh di mat bol khai.

¹⁶Añ hòi cau duh broă añ mơya khai ò ho, să tòm añ pal rac dan mơ khai.

¹⁷Nhơm tă añ jê bau ùr añ cù kìr, ală oh mi tòm añ jê ngkòr ngkàc di añ.

¹⁸Tian gơs kơnòm dềt kung sền òsơp di añ, Tòm tŭ añ ñă ntào, bol khai đơs jơnau tòmdră di añ.

¹⁹Jơh ală cau bơyô đềt mềr añ jê kung cù kìr di añ, mơ ală cau añ kòñ gơboh neh gơlik gơs cau sò tơm añ.

²⁰Să jan añ gam mìng ntìng mơ gơltau lơm, Añ lik klàs gam mìng gơltau mơ sề añ jê lơm.

²¹Dan nđàc sơngit di añ, nđàc sơngit tĕ di añ, ơ ală cau bơyô añ jê! Bơh tê Yàng Tom Trồ neh tup di añ.

²²Ñchi bơh tài oh mi ting jat añ be Yàng Tom Trồ neh lơh? Òhềt geh hòm lai mơ poac añ ò ơ?

²³Ôih! Kơp kòñ ală jơnau añ jê neh geh cih kah, Kơp kòñ gơ geh cih tòm dô dap sră.

²⁴Kơp kòñ gơ geh cih hơđang sră lòs bơh dô nơm gai cih mơ trà, Hala geh pac gơ hơđang pơnai lŭ gam sùm sùm!

²⁵Bơh añ git Bơtau dong tơwài añ la Bơtau kis, Tus di lồi dut Kơnràñ rơp ntào hơđang ù.

²⁶Mơ tơnơ̆ mơ tŭ gơltau añ neh kong tơnroh, Tòm poac să añ, añ rơp gŏ Yàng Tom Trồ;

²⁷Să tòm añ rơp gŏ Kơnràñ, mơ mat tòm añ jê rơp sền Kơnràñ, ò di cau ndai. Nùs añ òsô ò soàn tòm añ!

²⁸Dilah oh mi đơs lah: ‘Mbe bol he rơp lơh iơh di khai?’ mơ: ‘Ryas ală bơta gơlik gơs la bơh khai;’

²⁹Rngòt tĕ di đào, bơh bơta gơjrañ dờng cèng bơta lơh glài mơ đào, gen tàng oh mi pal git lah rơp gơs dô ngai cahrña.”