Read koho Jop 22 Bible Online

Jop 22 - koho bible

Jop 22

¹Gen Eliphas, cau Theman ho lah:

²“Dô nă kòn mơnus rgơi gơs kwơ Yàng Tom Trồ in sơl? Tian gơs cau jak chài rlau jơh rgơi gơs kwơ Kơnràñ in sơl?

³Dilah ồng song ring gen bơta hơ̆ rơp niam nùs Bơtau Gơnap Gơnoar Làm Jơh sơl ơ? Dilah ồng lơh gùng dà ồng dê ò gơkòl lah pơrhơng gen Kơnràñ geh cồng nha lơi taih?

⁴Hơ̆ la bơh bơta dòn duh ồng dê tàng Kơnràñ lah pơrhơng ồng, Mơ cèng ồng mut tòm tiah cahrña sơl ơ?

⁵Bơta iơh bơsak ồng dê ò di la dờng ơ? Ală tồi glài ồng dê ò lồi jơh ơ?

⁶Ồng neh ai phan ai bồ bơh ală oh mi ồng dê dô bă ò bồ, mơ hồ tă ồi ào cau dê mơ lòi bol khai ơm kuh lòi rồ.

⁷Ồng ò ai dà cau bòl glar òsô in hùc, Mơ ồng neh tă phan sa, bơh cau jơgloh.

⁸Cau gơs gơnoar geh ù tiah lơh gơs phan tòm, Cau geh bơta nđàc geh ơm tềng hơ̆,

⁹Ồng neh bơtrơh ală cau ùr bơnrau rê mpàng tê gòi, Mơ bơta gơn kơnòm ală cau kòn đòi dê ồng neh tơnlề.

¹⁰Gen tàng gơs ală dă pơt gùt dar ồng, Mơ bơta rngòt rngơt nisơna bồr ndơp hơđang ồng.

¹¹Bơta klam jơngo ngan tian gơs ồng ò rgơi sền gŏ, dà kŏ gơ jơm gòm ồng.

¹²Yàng Tom Trồ ò di ơm tòm ală tiah jơnhoa hơđang trồ ò ơ? Sền gŏ ală sơmañ jơnhoa rlau jơh, bol gơ jơnhoa rlau jơh!

¹³Gen tàng ồng đơs: ‘Ñchi bơta Yàng Tom Trồ git taih? Kơnràñ rgơi cahrña gan di bơta klam jơngo sơl ơ?

¹⁴Mhwal jù pùt Kơnràñ gen tàng Kơnràñ ò gŏ, mơ Kơnràñ cơnđòa lòt hơđang dơwàng ală tap trồ.’

¹⁵Ồng rơp lòt jat gùng yau mơ ală cau iơh bơsak neh lòt sơl ơ?

¹⁶Bol khai kong sơmbat kup lài mơ tŭ tơngai neh lơh nền bol khai in, Ală mơnàng bol khai dê kòl dà kŏ cèng pơrdô.

¹⁷Bol khai đơs mơ Yàng Tom Trồ lah: ‘Dan lòi bol hi ơm is; Ñchi bơta Bơtau Gơnap Gơnoar Làm Jơh rgơi lơh di bol hi taih?’

¹⁸Bulah Kơnràñ neh tơmbềng hìu bol khai dê mơ ală phan niam; Mơya bơta bơyai cau iơh bơsak dê cù kìr añ in!

¹⁹Cau song ring gŏ bơta hơ̆ mơ hòn chò; Cau ò gơs glài dơñŏ tơnhial dê bol khai mơ sền òsơp,

²⁰đơs lah: ‘Ngan la cau sò tơm di bol hi kong tơnroh, Mơ phan lơi bol khai lòi wơl, gen gơkòl ồs sa pơrguc.’

²¹Behơ̆ dô nùs tĕ mơ Yàng Tom Trồ mơ gơtòmsòr bal mơ Kơnràñ, tòm gùng dà hơ̆ gen bơta niam rơp tus hơ ồng,

²²Dòp tĕ bơta bơto sồr bơh di bơr Kơnràñ, Mơ ơn tĕ ală jơnau đơs Kơnràñ dê tòm nùs ồng dê.

²³Dilah ồng rê wơl hơ Bơtau Gơnap Gơnoar Làm Jơh, ồng rơp geh bơtào wơl, dilah ồng tă sang bơta iơh bơsak bơh di sàl ồng dê,

²⁴Dilah ồng sơrbì màh tòm ù tiah, Mơ cơm màh Ôphir digùl ală pơnai lŭ tòm hiòng dà hòr.

²⁵Mơ dilah Bơtau Gơnap Gơnoar Làm Jơh la màh ồng dê, mơ la priă màng ồng in.

²⁶Gen ồng rơp geh hòn chò di Bơtau Gơnap Gơnoar Làm Jơh, Mơ rơp pò mat ồng dê tơnggòr hơ Yàng Tom Trồ.

²⁷Ồng rơp hòi dan mơ Kơnràñ, Kơnràñ rơp iat ồng, Mơ ồng rơp tơm sir ală jơnau ho pơgon ồng dê.

²⁸Ồng lơh nền dô bơta lơi, mơ rơp geh gơlik gơs ồng in; Mơ bơta àng rơp gơcrà hơđang gùng dà ồng dê.

²⁹Tòm tŭ kong cau ndai lơh ƀàssìl, mơ ồng đơs lah: ‘Hơ̆ la bơta pơnhừ să!’ Gen Kơnràñ rơp dong klàs cau pơndêt să.

³⁰Kơnràñ rơp dong tă bulah bol khai tìs glài iơh bơsak; Bol khai rơp geh pleh klàs tài bơh tê sàng goh ồng dê.”