Read koho Jop 23 Bible Online

Jop 23 - koho bible

Jop 23

¹Gen Jop ho wơl lah:

²“Jơl tus di ngai do, jơnau pơt wòl añ jê gam sràt bơtang, Tê Kơnràñ dê klơn kơnjơ̆ gơjrañ mañ di bơta rơnđơh añ jê.

³Ôih! Kơp kòñ añ git tiah lơi añ pal jòi Kơnràñ, Kơp kòñ añ rgơi lòt tian gơs tus hơ tiah ơm Kơnràñ dê!

⁴Añ rơp ơn ală broă añ jê di đap Kơnràñ, Mơ tơmbềng bơr añ jê mơ ală jơnau đơs añ jê.

⁵Añ rơp git ñchi jơnau Kơnràñ rơp ho wơl mơ añ, mơ git wă ală bơta Kơnràñ rơp đơs mơ añ.

⁶Kơnràñ rơp tòmlơh mơ añ tòm gơnap gơnoar dờng Kơnràñ dê ơ? Ò di, mơya Kơnràñ rơp ai tồr iat añ.

⁷Tềng hơ̆ cau song ring rgơi tò să khai dê mơ Kơnràñ, Mơ añ pal tơm sir jơl sùm sùm bơh bơta cahrña añ jê.

⁸Mơya dilah añ lòt hơđap, Kơnràñ ò gơs tềng hơ̆; Dilah añ lòt hơ đah ngkòi, añ kung ò jòi bàn Kơnràñ.

⁹Tòm tŭ Kơnràñ ơm pồn đah kiau, mơ añ ò sền gŏ Kơnràñ: Tòm tŭ Kơnràñ rê wơl hơ đah ma, mơya añ kung ò rgơi gŏ Kơnràñ sơl.

¹⁰Mơya Kơnràñ git gùng lòt añ jê; Tòm tŭ Kơnràñ neh lòng añ, añ rơp gơlik gơs be màh.

¹¹Jơng añ lòt jat cơnđòa Yàng dê; Añ lòt jat gùng Kơnràñ dê, mơ ò dah ma kiau.

¹²Añ ò tŭ lơi cah ngài bơh di ală bơta sồr lam sơndồi Kơnràñ dê, Añ neh pồn prap tòm nùs ală jơnau đơs bơr Kơnràñ dê rlau mơ phan sa kòp ngai añ jê.

¹³Mơya Kơnràñ ntào is, gen ñcau rgơi kơryan Kơnràñ taih? Kơnràñ lơh bơta lơi nùs Kơnràñ kòñ.

¹⁴Bơh Kơnràñ rơp lơh wil tơl ală bơta Kơnràñ neh lơh nền añ in, Mơ oă bơta be do tòm nùs Kơnràñ dê.

¹⁵Gen tàng añ rơm să rngòt di đap Kơnràñ; Tŭ lơi añ kơlôi sơwì, añ rngòt rngơt ngan di Kơnràñ.

¹⁶Yàng Tom Trồ lơh nùs añ in rơm rngòt, Bơtau Gơnap Gơnoar Làm Jơh lơh añ in rngòt rngơt ngan.

¹⁷Dilah añ mìng rơp roh thit tòm bơta klam jơngo, mơ bơta klam jơngo cik jơm gòm muh mat añ jê.”