Read koho Jop 24 Bible Online

Jop 24 - koho bible

Jop 24

¹“Ñchi bơh tài ală tŭ tơngai ò geh lơh nền bơh Bơtau Gơnap Gơnoar Làm Jơh taih? Mơ ñchi bơh tài ală cau git Kơnràñ ò tŭ lơi gŏ ngai Kơnràñ dê?

²Cau iơh bơsak ntròn tềl nhàr ù; Bol khai tòmpìt kơñau mpồl belàt mơ ƀlàng ñhơt gơ dê.

³Bol khai cèng pơrdô alàng cau kòn đòi dê, Mơ kup kơnrồ cau ùr bơnrau lơh phan kup dồs.

⁴Bol khai tơlo cau siơ̆u siar bơh gùng lòt, mơ cau rƀah bơh tòm ù tiah bol khai pồn să.

⁵Kung be alàng brê tòm ƀlàng bràs, Cau rƀah lòt lơh broă bòl glar; jòi wàs tòm ù tiah srau gòi jòi phan sa ală kòn dềt bol khai in.

⁶Bol khai toès tòm dô nơm ƀlàng sre ò di la sre tòm bol khai dê, Mơ bol khai dòñ tòm suơn ño cau iơh bơsak dê.

⁷Bol khai bic mang să kuh, ò gơs ồi ào; mơ ò gơs phan lơi jơm să tòm tŭ noat mrềt.

⁸Bol khai sùh mơ mìu bơh mơnơm, Mơ koar di lŭ tài bơh kòñ geh kìng crŭ.

⁹Gơs cau tòmpìt kòn đòi tòm tŭ ơm pô toh; mơ kup bơrkòl kòn cau rƀah.

¹⁰Bol khai lik lòt să kuh, tài bơh ò gơs ồi ào; Bulah jơgloh bol khai tui ală cap kòi.

¹¹Bol khai pat mơñà tòm mpal lŭ, bol khai jă ño tòm thùng mơ kong tơhìr.

¹²Jơnau rơnđơh cau chơt bơh tòm ƀòn dờng, Mơ ngko cau sồt rmàñ hòi driau dong kòl. Mơya Yàng Tom Trồ ò ơn nùs di jơnau hòi dan bol khai dê.

¹³Gơs cau bơtào tòmdră di bơta àng, La cau ò mòng git gùng bơta àng, mơ ò ơm tòm gùng bơta àng dê.

¹⁴Cau tơnchơt cau ñă ntào tòm kơmbuh ù, tơnchơt cau rƀah mơ cau siơ̆u siar, mơ tòm trồ mang bol khai be cau kơñau.

¹⁵Gar mat cau rềs àr kung ơm kơp mang trồ, Khai kơlôi lah: ‘Ò gơs gar mat lơi rơp gŏ añ,’ Mơ khai jơm ndơp muh mat khai dê.

¹⁶Tòm bơta klam jơngo, bol khai tò bluh ală hìu, Mơya tòm trồ ngai bol khai krơ̆ să bol khai; bol khai ò git bơta àng.

¹⁷Bơh bơta klam jơngo cik la àng drim jơh tơl nă bol khai dê, bơh bol khai lơh bơyô mơ ală bơta rngòt rngơt bơta klam jơngo cik dê.

¹⁸Mơya bol khai kung be kơmbuh hơđang nha dà; Pơnah sre brê bol khai dê tòm lơgar kong srat rma; ò gơs dô nă cau lơi lòt hơ đah ală suơn ño bol khai dê.

¹⁹Kung be bơta duh trơàl mơ bơta ro rañ tă tơlik dà piar; Lơgar làng ƀồc kung lơh behơ̆ mơ ală cau tìs glài.

²⁰Hìu kòn hŭi bol khai, kih rhài sa bơkah bol khai; bol khai ò gam gơs cau kah tai, Behơ̆ bơta iơh bơsak kong dơrpă kung be dô đòm chi.

²¹Bol khai lơh iơh di cau ùr kơnền, Mơ lơh bơta ò niam gơwèt mơ cau ùr bơnrau.

²²Mơya Yàng Tom Trồ lơh jòng rài kis cau gơnoar pràn bơh gơnap gơnoar Kơnràñ dê; bol khai neh geh bơtào tơngguh, tòm tŭ rài kis ò gơs tiah gơn kơnòm.

²³Kơnràñ lòi bol khai ơm lơngai mơ kơlôi lah kơ̆ nền rau, Mơya gar mat Kơnràñ dê sền sơwì ală gùng dà bol khai dê.

²⁴Bol khai geh yò tơngguh dô ơthoa gen roh thit; bol khai ñòp ro mơ rung jrùh be ñhơt; bol khai kong koh kung be sơnđùng kòi.

²⁵Dilah ò behơ̆, ñcau rơp lơh cơng añ đơs blac, Mơ sơnio lah jơnau đơs añ jê gơlik ò kwơ?”