Read koho Jop 29 Bible Online

Jop 29 - koho bible

Jop 29

¹Jop đơs pơnjat tai ală jơnau bơyai khai dê lah:

²“Ơ hơh! Kơp kòñ añ geh kung be tòm ală tŭ tơngai yau òr, be tòm ală ngai tòm tŭ Yàng Tom Trồ neh sền gàr añ;

³Tòm tŭ ồs đèng Yàng dê pơnđàng sòl hơđang bồ añ, Mơ kơnòm di bơta àng Kơnràñ dê, añ cơnđòa gan bơta klam jơngo!

⁴Tòm tŭ añ neh gơs ală ngai sơnròp añ jê, Tòm tŭ bơta lơh bơyô mơ Yàng Tom Trồ jơm gòm hơđang sàl añ;

⁵Tòm tŭ Bơtau Gơnap Gơnoar Làm Jơh gam ơm mơ añ, mơ tòm tŭ ală kòn añ ơm gùt dar añ;

⁶Tòm tŭ cơnđòa añ jê neh rào mơ dà toh, mơ pơnai lŭ gơhòr añ in hiòng mơñà!

⁷Tòm tŭ añ lik lòt tus hơ mpồng ƀòn dờng dê, tòm tŭ añ nggui tòm hìu pơjum mpồl jơnum dê,

⁸Ală cau kơnòm să gŏ añ gen dô pleh, mơ ală cau kra jòng sơnam ñă ntào.

⁹Ală cau dờng màng ơm wơl ò đơs, Mơ ơn tê di bơr bol khai dê.

¹⁰Sap đơs ală cau kwang at bồ neh ơm ngềt, Mơ lơmpiat bol khai neh gơđềt di dò.

¹¹Tòm tŭ tồr neh kơno, gen jòng ro añ, mơ tòm tŭ mat cau lơi neh gŏ, gen dô nùs mơ añ.

¹²Tài bơh añ dong cau rƀah lơòi tòm tŭ bol khai dan, Mơ cau kòn đòi ò gơs cau lơi dong kòl.

¹³Cau dồn sa ai lơngai añ in, mơ añ lơh nùs cau ùr bơnrau đơs chò bơh hòn chò.

¹⁴Añ soh bơta song ring kung be phan soh añ jê, Bơta song ring añ jê be ào jrùh mơ chèo pùt bồ añ jê.

¹⁵Añ la gar mat cau jơngo in, Mơ jơng cau kwet gơlte in.

¹⁶Añ la bèp cau siơ̆u siar in, mơ añ dong kòl broă cau nac crih dê.

¹⁷Añ dơrpă kàng cau ò song ring. Mơ lơh cau ò song ring in tơndùh phan bol khai neh kap mơ sề.

¹⁸Añ kơlôi lah: ‘Añ rơp chơt tòm rsòn añ jê; mơ añ rơp bơtơl ală ngai añ jê la oă ngan kung be bràs.

¹⁹Ryas añ sro lik tus hơ ală dà, mơ dà tŭ rơp ơm jơh mang hơđang ală ntê añ jê.

²⁰Bơta gơklŏ añ jê tơlir pa sùm tòm añ, mơ àtak añ jê pa sùm tòm tê añ.’

²¹Bol khai iat añ mơ kơp gơn, ơm mŏ mŏ nàng iat jơnau añ bơto sồr.

²²Tơnơ̆ mơ tŭ añ neh đơs, bol khai ò gơs jơnau đơs tai; Jơnau đơs añ jê dùh hơđang bol khai kung be dà tŭ.

²³Bol khai kơp gơn añ be kơp gơn dà mìu, Ha bơr kơp gơn be gơn mìu kơnhai phàng.

²⁴Añ ñŏ mơ bol khai, tòm tŭ bol khai roh bơta dòn kơnòm; Bơta àng muh mat añ chồl nùs bol khai in.

²⁵Añ sac rwah gùng bol khai dê, mơ nggui be cau at bồ, Añ ơm kis be cau bơtau digùl ală mpồl ling khai dê, Añ ò gơkrơi kung be dô nă cau pơndòm pơniang ală cau moat jrùng ñìm rac.”