Read koho Jop 3 Bible Online

Jop 3 - koho bible

Jop 3

¹Tơnơ̆ mơ ală bơta hơ̆, Jop pò bơr srat rma ngai deh khai dê.

²Jop đơs lah:

³“Lòi ngai deh añ jê roh thit; Mơ mang hơ̆ đơs lah ‘Gơs dô nă kòn klau neh bun!’ ò gam tai!

⁴Lòi ngai hơ̆ gơlik gơs klam jơngo! Dan Yàng Tom Trồ ơm hơđang ò sền gŏ ngai hơ̆, hala bơta àng ò pơnđàng sòl hơđang gơ!

⁵Lòi bơta jơngo mơ klam cik hòi gơ, Lòi puk mhwal jơm ndơp gơ, Lòi bơta klam jơngo jù cik tơn iu gơ.

⁶Lòi bơta klam jơngo cik gơrwàng mang hơ̆, Bañ lòi gơ geh hòn chò digùl ală ngai tòm nam, Bañ lòi gơtơmut bal mơ khà ală kơnhai dê!

⁷Ngan, lòi mang hơ̆ gơlik gơs be cau ùr kơnền, Bañ lòi jơnau driau chò geh kơno tòm mang hơ̆!

⁸Lòi ală cau jak srat rma, srat rma ngai hơ̆, Mơ ală cau chài rgơi pơrlai Lebiathan

⁹Lòi ală sơmañ àng drim gơ dê gơlik jơngo, Lòi bơta àng gơ kơp kòñ mơya ò gơs, dan sơmbir mat ò gŏ rìng àng drim gơ dê!

¹⁰Tài bơh gơ ò til mpồng hìu kòn mè añ jê, Nàng pồn ndơp bơta jê sồt bơh di mat añ.

¹¹Ñchi bơh tài añ ò chơt tòm tŭ deh, Mơ añ ò tac nhơm tòm tŭ lik bơh kơndul mè taih?

¹²Ñchi bơh tài gơs ală gơltang dòp rò añ, Mơ ală toh añ in nàng pô taih?

¹³Tŭ do gen añ neh ơm bic ring ngềt, Añ geh bic lơhă, gen añ geh ơm rlô bòl.

¹⁴Bal mơ ală cau bơtau mơ ală cau bơyai broă dunnia dê, La ală cau neh bơt bơtào să tòm bol khai bơta ồm lề in.

¹⁵Hala bal mơ ală cau at bồ gơs màh, la ală cau bềng lìu hìu bol khai dê mơ priă.

¹⁶Hala ñchi bơh tài añ ò geh tơp be dô nă kòn rlơs, Kung be dô nă oh nga ò tŭ lơi gŏ bơta àng taih?

¹⁷Tềng hơ̆ cau iơh bơsak ò lơh pơnjê, Mơ cau bòl glar geh rlô bòl.

¹⁸Ală cau kòl jàm geh ơm tòm lơngai lơngò bal mơ gơp, bol khai ò gam kơno sap đơs cau at bồ lơh broă.

¹⁹Tềng hơ̆ cau dềt mơ cau dờng ơm bal, Mơ cau dĭ geh hồ toh bơh di cau tòm bol khai dê.

²⁰Ñchi bơh tài bơta àng geh ai cau kong bòl glar in, Mơ ai bơta kis cau in gơs hwềng soàn sràt bơtang,

²¹La ală cau kơp kòñ chơt mơya ò chơt; bol khai jòi gơ rlau mơ jòi phan màng pồn ndơp.

²²Bol khai la cau chò hòp ò git lơh mơ la cau hòn chò tòm tŭ bol khai bàn bơtô ƀồc ơ?

²³Ñchi bơh tài ai bơta àng cau ò rgơi gŏ gùng, la cau neh geh Yàng Tom Trồ cang kìng sơl?

²⁴Bơh bơta tă nhơm jòng añ jê tus be phan sa, Mơ bơta rơnđơh añ jê hòr lik kung be dà.

²⁵Ngan bơta añ rngòt gen neh tus hơđang añ, Bơta añ cù kìr gen gơ neh dùh hơđang añ.

²⁶Añ ò geh ơm lơngai, kung ò ơm ring ngềt, Añ ò geh rlô bòl, mơya tus bơta bòl glar lơm!”