Read koho Jop 31 Bible Online

Jop 31 - koho bible

Jop 31

¹“Añ neh lơh dô bơta ho bal mơ gar mat añ, mbe añ rgơi sền rmê di cau ơruh taih?

²Ñchi añ rơp geh pơnah añ jê bơh Yàng Tom Trồ hơđang trồ, Mơ phan jơtài añ jê bơh Bơtau Gơnap Gơnoar Làm Jơh tòm tiah jơnhoa la ñchi taih?

³Ò di la bơta rung rài dùh hơđang cau ò song ring, mơ bơta roh gơprah di cau lơh bơta tồi glài iơh bơsak in ò ơ?

⁴Kơnràñ ò gŏ ală gùng dà añ jê, mơ khà ală cơnđòa añ jê ò ơ?

⁵Dilah añ neh lòt tòm gùng dô bă ma blac, Mơ jơng añ sơrbac sơrbang ting jat bơta blac pơrlồm,

⁶Gen dan Yàng Tom Trồ kơr añ hơđang kơr song ring, mơ Kơnràñ rơp git bơta song ring añ jê!

⁷Dilah cơnđòa añ jê pơrlac dô đah bơh di gùng, mơ nùs añ lòt jat gar mat añ jê, Hala dilah tê añ gơs tềl ƀơ̆ ƀơl,

⁸Gen lòi gơs cau ndai sa phan añ neh sih, Mơ lòi ală phan tùc tam añ jê kong dus jơh.

⁹Dilah nùs añ neh gơkòl ơniai bơh dô nă cau ùr, mơ dilah añ kơp mòc di mpồng cau gơp ƀòn añ jê,

¹⁰Gen lòi bau ùr añ piah di mpal cau ndai dê, Mơ gơs ală cau klau ndai bic mơ khai.

¹¹Bơh hơ̆ la dô bơta tồi glài iơh rmơh; hơ̆ la dô bơta tồi glài iơh bơsak.

¹²Bơh hơ̆ rơp be dô nơm ồs chu pơrguc mù tus tòm brah tìng, mơ rơp chu tus di ryas jơh ală cồng nha añ jê.

¹³Dilah añ neh sang lòi broă gơwèt hơ dĭ klau hala dĭ ùr añ jê Tòm tŭ bol khai gơs jơnau yoam joh tòmdră mơ añ,

¹⁴Gen ñchi añ rơp lơh tòm tŭ Yàng Tom Trồ guh taih? Tòm tŭ Kơnràñ lùp añ, ñchi añ rơp ho wơl taih?

¹⁵Ò di Kơnràñ la Bơtau neh mòn añ tòm kơndul mè kung neh mòn bol khai ò ơ? Ò di kung dô Bơtau hơ̆ neh crơng mòn bol he tòm kơndul mè ò ơ?

¹⁶Dilah añ neh tă sang bơta lơi cau rƀah kơp kòñ, Hala neh lơh mat cau ùr bơnrau dê siar roh,

¹⁷hala neh sa piang lă añ jê is dô nă, mơ kòn đòi ò geh sa gơ.

¹⁸Bơh tòm tŭ añ gam pơnu, añ ròng kòn đòi kung be dô nă bèp, mơ bơh di kơndul mè añ jê, añ tề lam cau ùr bơnrau.

¹⁹Dilah añ neh gŏ dô nă cau lơi roh rui tài bơh ò gơs phan soh, Hala dô nă cau rƀah ò gơs ồi tơ̆;

²⁰Mơ nùs khai ò ai lơngai añ in, mơ bol khai ò geh ram bơh sơnò belàt añ jê;

²¹Dilah añ neh pò tê tòmdră mơ cau kòn đòi, tài bơh añ neh gŏ añ geh dòp mpồng ƀòn;

²²Gen lòi tơwòr tê añ gơ sơntă bơh di pơnì añ, Mơ lòi gơ pă bơh di tiah tơrbŏ.

²³Bơh añ rngòt di bơta rung rài tus bơh Yàng Tom Trồ, Mơ añ ò rgơi ơm di đap mat bơta ryŭ ryơm Kơnràñ dê.

²⁴Dilah añ neh ơn nùs dòn kơnòm di màh, Mơ neh đơs mơ màh ngan lah: ‘Mê la bơta gơn kơnòm añ jê;’

²⁵Dilah añ neh hòn chò bơh bơta pas gơs añ jê la dờng, Mơ bơh tê añ neh geh oă phan mơna;

²⁶Dilah añ neh sền di mattơngai tòm tŭ gơ pơnđàng sòl, Mơ mat kơnhai tòm bơta àng lơr gơ dê,

²⁷Mơ nùs añ jê neh ndơp ndơr ơn nùs, mơ bơr añ jê neh cum tê añ jê.

²⁸Hơ̆ kung la dô bơta tồi glài pal kong lơh glài mơ cahrña; Bơh añ pal gơlik ma blac gơwèt mơ Yàng Tom Trồ hơđang trồ.

²⁹Dilah añ neh hòn chò bơh bơta roh rui cau gơjrañ di añ, Hala hừh nùs tòm tŭ gŏ bơta rung rài dùh hơđang khai;

³⁰Añ ò lòi bơr añ tìs glài, Bơh ai jơnau srat sơntơm bơta kis khai dê.

³¹Dilah ală cau tòm hìu nhă añ ò đơs lah: ‘Ô, kơp kòñ bol he neh geh sa hòm poac tòm hìu Jop dê!’

³²Mơya ò gơs cau nac crih lơi pal bic mang tòm gùng, Añ neh pò mpồng hìu añ jê cau lòt gùng in.

³³Dilah añ neh cang kìng tồi glài añ jê kung be cau ndai neh lơh, bơh pồn bơta tồi glài añ jê tòm nùs añ,

³⁴tài bơh añ ntào tòm bơta rngòt dờng mpồl bol oă dê, Mơ rngòt di bơta sền òsơp cau jơi bơtiàn dê, Tian gơs añ ơm mŏ mŏ, ò khin lik lòt hơ bơdìh mpồng.

³⁵Ôih! Kơp kòñ gơs dô nă cau lơi iat añ! Tŭ do añ cih mat tòm sră tò să añ. Dan Bơtau Gơnap Gơnoar Làm Jơh ho jơnau añ; Lòi cau yă añ cih bơta añ lơh tìs tòm dô pang sră.

³⁶Ngan añ rơp tui gơ di pơnì añ, Añ rơp kơt gơ be dô nơm sơgơn bơtau hơđang añ.

³⁷Añ rơp yal loh khai in git bơh kòp cơnđòa lòt añ jê, Añ rơp tus rềp di khai be dô nă kòn bơtau.

³⁸Dilah ù tiah añ ai jơnau tòmdră mơ añ, Mơ jơh ală gùng lơòr gơ dê bềng lìu dà mat,

³⁹Dilah añ neh sa plai đo gơ dê mơ ò tơm priă, mơ lơh bơta chơt cau tòm gơ in,

⁴⁰Gen lòi tòm lò hòn ala kòi mi, Mơ ñhơt drung hòn ala kòi brà!” Ală jơnau Jop dê la jơh rau.