Read koho Jop 32 Bible Online

Jop 32 - koho bible

Jop 32

¹Behơ̆ pe nă cau hơ̆ ò gơs jơnau ho wơl mơ Jop tai, tài bơh khai sơnđan is să khai la song ring.

²Mơya Elihu kòn klau Barakel dê, cau Buji, jơi bơtiàn Ram, gơhào nùs di Jop bơh khai khin sơnđan is să khai la song ring rlau mơ Yàng Tom Trồ.

³Khai kung gơhào gơjrañ di pe nă cau bơyô Jop dê, tài bơh bol khai jòi ò geh jơnau nàng ho wơl Jop in, bulah bol khai neh yal loh Jop tìs glài.

⁴Tŭ do Elihu neh ơm gơn nàng đơs mơ Jop, tài bơh ală cau ne la jòng sơnam rlau mơ khai.

⁵Mơya tòm tŭ khai gŏ pe nă cau ne ò gơs jơnau lơi nàng ho, gen khai gơhào gơjrañ ngan.

⁶Behơ̆ Elihu kòn klau Barakel, cau Buji, đơs lah: “Añ la cau dềt sơnam, ai ală ồng la cau jòng sơnam; Gen tàng añ ò khin mơ rngòt, nàng yal loh bơta kơlôi añ jê ală ồng in.

⁷Añ đơs lah: ‘Cau oă sơnam pal đơs; Cau jòng sơnam pal bơto bơta jak chài.’

⁸Mơya hơ̆ la hwềng ơm tòm kòn mơnus, Nhơm tă Bơtau Gơnap Gơnoar Làm Jơh dê ai bơta git wă,

⁹Ò di mìng cau dờng cau kra la jak chài, Ò di mìng cau kis jŏ git wă bơta lơi la di.

¹⁰Gen tàng añ đơs lah: ‘Dan iat tĕ añ; Añ kung rơp yal loh bơta kơlôi añ jê.’

¹¹Do, añ neh ơm gơn jơnau ală ồng dê, Añ ơm iat ală jơnau jak chài ală ồng đơs, Tòm tŭ ală ồng ơm jòi jơnau đơs,

¹²Añ neh ơn tồr ơm iat ală ồng, Mơya ò gơs dô nă ồng lơi sang lòi jơnau Jop dê, Ò gơs dô nă cau lơi digùl ală ồng ho wơl jơnau khai dê.

¹³Bañ đơs lah: ‘Bol he neh jòi bàn bơta jak chài; Yàng Tom Trồ lơh khai in kong alah, ò di kòn mơnus ò.’

¹⁴Jop ò đơs jơnau tòmdră mơ añ, Mơ añ ò ngui jơnau ală ồng dê nàng ho wơl mơ khai.

¹⁵Bol khai nrơt nrơl mơ ò ho jơnau lơi tai; Bol khai ò gơs dô jơnau lơi nàng đơs.

¹⁶Mơ añ la cau ơm gơn tòm tŭ bol khai ơm mŏ mŏ, tài bơh bol khai ntào tềng hơ̆ mơ ò gơs jơnau ho tai ơ?

¹⁷Añ kung rơp ai jơnau ho añ jê, Añ kung rơp yal loh bơta kơlôi añ jê;

¹⁸Bơh añ gơs bềng lìu jơnau đơs, hwềng ơm tòm añ chồl bơtrut añ.

¹⁹Ngan behơ̆ nùs añ jê kung be tơrnòm sềt tòm khàr, Kung be nhồng gơltau ơn tơrnòm pa mòr bơcah.

²⁰Añ pal đơs, bơh hơ̆ añ bàn bơta rài bòl; Añ pal pò bơr añ jê mơ ho wơl.

²¹Añ rơp ò sền òsơp di cau lơi, hala đơs jơnau rơmhòc mơ cau lơi.

²²Bơh añ ò git mbe lơi nàng đơs jơnau rơmhòc, hala Bơtau crơng mòn añ rơp pơndut tơnlồi añ mo.”