Read koho Jop 33 Bible Online

Jop 33 - koho bible

Jop 33

¹“Behơ̆ tŭ do, ơ Jop, dan iat tĕ jơnau añ đơs, Dan ơn tồr di jơh ală jơnau añ đơs.

²Do, añ pò bơr añ jê, Ală jơnau đơs añ jê gơ ơm di lơmpiat tòm bơr añ.

³Ală jơnau đơs añ jê yal tơlik bơta song ring nùs añ jê; mơ sơndồi añ git bơta gơ đơs la song ngan.

⁴Hwềng Yàng Tom Trồ dê neh crơng mòn añ, Nhơm tă Bơtau Gơnap Gơnoar Làm Jơh dê ai añ in bơta kis.

⁵Dilah rgơi gen ho wơl tĕ añ, di đap añ rơndap ơn tĕ ală jơnau mê dê; ntào kơ̆ tĕ di tiah mê dê!

⁶Di đap Yàng Tom Trồ añ kung be ồng, Añ kung neh geh mòn gơs bơh dô pet ù kơnàng.

⁷Bañ rngòt añ ò càng lơh ồng in rngòt, bơta bơklơn añ jê ò kơnjơ̆ hơđang ồng.

⁸Ngan, ồng neh đơs tòm tồr añ, mơ añ neh kơno jơnau đơs ồng dê.

⁹Ồng đơs lah: ‘Añ sàng goh, ò tìs glài; Añ sàng goh, mơ ò gơs bơta tìs glài tòm añ.

¹⁰Sền ne Yàng Tom Trồ neh jòi bơta tòmdră mơ añ, Kơnràñ kòp añ be cau sò tơm Kơnràñ dê;

¹¹Kơnràñ ơn jơng añ jê tòm gơsàng, Mơ kơp tòm jơh ală gùng lòt añ jê.’

¹²Mơya tòm bơta do ồng ò song, añ rơp ho wơl ồng lah: Bơh Yàng Tom Trồ la dờng rlau mơ kòn mơnus.

¹³Ñchi bơh tài ồng tòm pơndang mơ Kơnràñ, ồng đơs lah: ‘Kơnràñ rơp ò ho wơl dô jơnau lơi añ jê?’

¹⁴Bơh Yàng Tom Trồ neh đơs tòm dô gùng, Mơya tòm gùng dơ̆ bàr, bulah behơ̆ kòn mơnus ò bài đal git gơ.

¹⁵Tòm bơta mpau, tòm bơta gơtơnggŏ trồ mang dê, Tòm tŭ kòn mơnus bic lơhă, lơhă bic hơđang cơnòng bic bol khai dê.

¹⁶Gen Kơnràñ pò tồr bol khai dê, Mơ tơrngòt bol khai bơh ală jơnau đơs pơhìn.

¹⁷Nàng pơrlac kòn mơnus wơl bơh di broă lơh bol khai dê, Mơ sền gàr khai klàs bơh di bơta jòng să,

¹⁸Nàng dong hwềng soàn khai klàs bơh di bơtô ƀồc, Mơ bơta kis klàs bơh di hiòng dà lòt gan.

¹⁹Bol khai kung gơkòl lơh glài jê sồt hơđang cơnòng bic bol khai dê, Mơ jê sồt sùm ò dơh tòm ală ntìng khai dê.

²⁰Tian gơs bơta kis bol khai dê cù kìr di phan sa, Mơ hwềng soàn bol khai dil ngan di ală phan bơkah.

²¹Poac să bol khai siar roh rgai rgong, Mơ ală ntìng bol khai, bơh lài ò gŏ, tŭ do mpòl.

²²Hwềng soàn bol khai dê tus rềp di bơtô ƀồc, Mơ bơta kis bol khai dê tus di ală cau cèng bơta chơt.

²³Behơ̆ gen, dilah gơs dô nă tòm bol khai la cau gơnrơh, Dô nă cau đơng kừh, dô nă tòm dô rbô nă, la dô nă cau yal loh dô nă cau song ring,

²⁴Nàng yal tơlik bơta nđàc cau hơ̆ in mơ đơs lah: ‘Dong tă tĕ khai klàs bơh di gùng mù hơ bơtô ƀồc; Añ neh jòi bàn dô nơm phan tơwài khai rau.’

²⁵Lòi poac khai dê gơlik pa wơl kung be cau kơnòm să; lòi khai rê wơl hơ ală ngai gam kơnòm să khai dê.

²⁶Gen khai hòi dan mơ Yàng Tom Trồ mơ geh dòp bơh Kơnràñ. Khai sền gŏ mat Kơnràñ mơ hòn chò driau dờng, mơ Yàng Tom Trồ tơm wơl khai in bơh bơta song ring khai dê.

²⁷Cau hơ̆ đơs chò bal mơ ală cau ndai mơ đơs lah: ‘Añ neh tìs glài, mơ lơh rkwet rkwe bơta song ngan, mơ ò di tơm wơl di añ.

²⁸Kơnràñ neh dong tơwài hwềng soàn añ klàs bơh di gùng mù hơ bơtô ƀồc, mơ bơta kis añ jê rơp gŏ bơta àng.’

²⁹Yàng Tom Trồ ngan lơh jơh ală bơta do; Bàr dơ̆, pe dơ̆ kòn mơnus in.

³⁰Cèng wơl hwềng soàn bol khai wơl bơh di bơtô ƀồc, Tồ bol khai in gŏ bơta àng bơta kis dê.

³¹Ai tồr iat tĕ añ, ơ Jop; Ơm tĕ mŏ mŏ, mơ añ rơp đơs.

³²Dilah ồng gơs jơnau lơi nàng đơs, ho tĕ añ; Đơs tĕ, bơh añ kòñ lơh cơng ồng in.

³³Dilah ò gen dan iat tĕ añ; Ơm tĕ mŏ mŏ, mơ añ rơp bơto ồng in bơta jak chài.”