Read koho Jop 35 Bible Online

Jop 35 - koho bible

Jop 35

¹Elihu pơnjat tai lah:

²“Ồng kơlôi bơta do la song ring sơl? Ồng đơs lah: ‘Añ la song ring di đap Yàng Tom Trồ.’

³Dilah ồng lùp Kơnràñ lah: ‘Bơta hơ̆ gơs kwơ lơi añ in taih? Ñchi bơta añ geh niam rlau dilah añ tìs glài taih?’

⁴Añ rơp ho wơl mơ ồng, mơ ală cau bơyô ồng dê bal mơ ồng.

⁵Tơnggòr tĕ hơđang trồ mơ sền; sền sơwì tĕ ală puk mhwal, mhwal lơi jơnhoa rlau mơ ồng.

⁶Dilah ồng gơs glài, gen ñchi ồng bơtào nàng tòmdră mơ Kơnràñ taih? Dilah ală bơta tồi glài ồng dê bơtơl oă ngan, gen ñchi bơta ồng lơh Kơnràñ in taih?

⁷Dilah ồng song ring, gen ñchi ồng ai Kơnràñ in taih? Hala ñchi Kơnràñ rơp dòp geh bơh di tê ồng taih?

⁸Bơta iơh bơsak ồng dê mìng lơh iơh di cau ndai be să tòm ồng, Mơ bơta song ring ồng dê, gơs kwơ kòn sau kòn mơnus in.

⁹Tài bơh gơbơtơl bơta rồn bơklơn gen cau ñìm nggà; bol khai hòi bơta dong kòl tài bơh tơwòr tê cau gơnoar pràn dê.

¹⁰Mơya ò gơs cau lơi lùp lah: ‘Ntềng đah Yàng Tom Trồ la Bơtau crơng gơs añ? Kơnràñ ai bơta pràn tòm trồ mang,

¹¹Ñcau bơto bol he rlau mơ ală phan poan jơng tòm ù, Mơ lơh bol he in jak chài rlau mơ ală sềm hơđang pah gòi taih?’

¹²Bol khai hòi dan mơya bol khai ò ho wơl, Tài bơh bơta pơnhừ să cau iơh bơsak dê.

¹³Ngan, Yàng Tom Trồ ò iat jơnau rac dan ò kwơ bol khai dê; Bơtau Gơnap Gơnoar Làm Jơh ò ơn nùs di ală bơta hơ̆.

¹⁴Tơ ài lah tòm tŭ ồng đơs lah ồng ò gŏ Kơnràñ, kơp kòñ jơnau tò să neh tus di đap Kơnràñ, mơ ồng pal ơm gơn Kơnràñ.

¹⁵Mơ tŭ do, tài bơh bơta gơjrañ Kơnràñ dê òhềt lơh glài, Mơ Kơnràñ ò ơn tồr dô êt lơi di bơta tồi glài iơh bơsak;

¹⁶Jop pò bơr đơs ală jơnau ò gơs kwơ, Mơ khai bơtơl oă jơnau ò gơs bơta git wă.”