Read koho Jop 37 Bible Online

Jop 37 - koho bible

Jop 37

¹“Bơh ală bơta hơ̆, plai nùs añ rơm ngòt, Mơ gơ sơnđoh lik bơh di tiah ơm gơ dê.

²Iat tĕ! Iat tĕ ntơr sap đơs Kơnràñ dê, mơ ntas nggồr gơlik bơh di bơr Kơnràñ dê.

³Kơnràñ lơh wañ jơh hơđơm ală tap trồ, Mơ puhlèp Kơnràñ dê tus di mum plai ù.

⁴Tơnơ̆ mơ hơ̆ gen sap đơs Kơnràñ dê gơ nggồr, sap đơs ryŭ ryơm Kơnràñ dê be ntơr, Tòm tŭ kơno sap đơs Kơnràñ dê, mơ Kơnràñ ò pơndut ală puhlèp.

⁵Ală ntơr Yàng Tom Trồ dê crih crài bal mơ sap đơs Kơnràñ dê; Kơnràñ lơh ală broă dờng mơ bol he ò rgơi git wă.

⁶Bơh Kơnràñ đơs mơ piar lah: ‘Dùh tĕ hơđang ù’; Mơ đơs mơ mìu nhàc lah: ‘Dùh tĕ mìu dờng.’

⁷Be dô nơm tềl ƀang kì hơđang tê kòp nă cau dê, nàng jơh ală cau mơ Kơnràñ neh crơng gơs rgơi git.

⁸Gen ală jơi phan poan jơng rê wơl tòm ală trồm gơ dê, mơ ơm wơl tòm wàng bol gơ dê.

⁹Càl rbut tus bơh di tiah ơm gơ dê, Mơ noat mrềt tus bơh càl khồm làm jơh.

¹⁰Bơh di nhơm tă Yàng Tom Trồ dê gơlik piar; Mơ ală dà tòm dàlềng gơlik dà piar.

¹¹Kơnràñ pơdiang mhwal jù mơ kơnhồl dà, Mơ mhwal rsìh puhlèp Kơnràñ dê.

¹²Gơpơdar gùt dar jat bơta tề lam Kơnràñ dê nàng lơh sir jơh ală bơta Kơnràñ sồr bol gơ, hơđang tiah rgơi ơm tòm dunnia.

¹³Kơnràñ sồr ală mhwal lơh gơs bơta lơh glài tơmàl, hala tuh ù tiah Kơnràñ in, hala bơh bơta kòñ gơboh.

¹⁴Ơ Jop, iat tĕ jơnau do, Ơm tĕ mŏ mŏ mơ sền sơwì bơh ală broă crih crài Yàng Tom Trồ dê.

¹⁵Ồng git mbe lơi Yàng Tom Trồ ơn gơnoar sồr Kơnràñ dê hơđang gơ, Mơ lơh puhlèp tòm mhwal Kơnràñ dê pơnđàng sơl?

¹⁶Ồng git mbe ală mhwal gơ ơm kơr ring bal sơl, broă lơh crih crài Bơtau git wă dê la wil tơl sơl?

¹⁷Ồng ơm ram tòm ào jrùh ồng dê, tòm tŭ ù tiah ơm ring ngềt tài bơh càl đah đơm sơl?

¹⁸Ồng rgơi lơh be Yàng Tom Trồ lì ală tap trồ, kră be dô nơm krơh neh tŏ sơl?

¹⁹Bơto bol hi in git ñchi bol hi pal đơs mơ Kơnràñ; bol hi ò rgơi yal tơlik broă bol hi dê tài bơh bơta klam jơngo.

²⁰Pal yal Kơnràñ in lah añ kòñ đơs sơl? Gơs cau lơi kòñ nàng kong sa loan sơl ơ?

²¹Tŭ do, ò gơs dô nă cau lơi rgơi sền bơta àng, tòm tŭ gơ àng gơcrà tòm ală tap trồ, tòm tŭ càl khồm mơ lơh ală tap trồ in goh.

²²Gơlik tus bơh đah đang àng gơklŏ; gùt dar Yàng Tom Trồ la bơta ryŭ ryơm pal rngòt ngan.

²³Bơtau Gơnap Gơnoar Làm Jơh bol he ò rgơi jòi bàn, Kơnràñ la dờng tòm gơnap gơnoar mơ song ring, mơ bơta song ring tơngkah tơngkañ, Kơnràñ ò tìs glài.

²⁴Gen tàng kòn mơnus duh rngòt di Kơnràñ, Bơh Kơnràñ ò wèt sền cau lơi kơlôi is he la jak chài.”