Read koho Jop 38 Bible Online

Jop 38 - koho bible

Jop 38

¹Gen Yàng Tom Trồ ho wơl mơ Jop, bơh tòm càl rwac lah:

²“Cau do la ñcau mơ ngui ală jơnau ò git wă Mơ lơh kơrlu kơrli bơta kơlôi bơyai Añ jê?

³Kơt tĕ but mê dê be dô nă cau klau; Añ rơp lùp mê, mơ mê rơp yal loh Añ in.

⁴Ntềng đah mê ơm tòm tŭ Añ ơn mơnàng plai ù taih? Yal tĕ Añ in, dilah mê git wă.

⁵Ñcau neh lơh nền ală sơnoa rnoas plai ù dê, ngan mê git! Ñcau la cau neh dang che was plai ù taih?

⁶Mơnàng gơ ơm hơđang phan lơi, hala ñcau neh ơn pơnai lŭ mum gơ dê.

⁷Tòm tŭ ală sơmañ àng drim đơs chò bal, mơ ală kòn klau Yàng Tom Trồ dê driau dờng hòn chò?

⁸Hala ñcau neh til tòm dàlềng mơ ală mpồng tòm tŭ gơhòr lik bơh kơndul plai ù dê,

⁹Tòm tŭ Añ lơh mhwal gơs ào jrùh gơ dê, mơ klơm gơ mơ bơta klam jơngo,

¹⁰mơ lơh nền nhàr gơ in, mơ ơn ală kai mơ ală mpồng.

¹¹Mơ đơs lah: ‘Mê mìng lòt ngài kàr hơ̆ lơm, mơ ò lòt ngài rlau, mơ tềng do ală ryà bơta jòng să mê dê pal dơh wơl sơl’?

¹²Gơs tŭ lơi mê ai ală jơnau sồr àng drim, mơ lơh rìng àng in git tiah gơ dê,

¹³Nàng gơ jơm gòm poan đah jơng trồ, Mơ cau iơh bơsak kong bơtrơh bơh di gơ sơl?

¹⁴Plai ù gơtòmgơl să kung be ù kơnàng hơđơm ƀang kì, Jơh ală bơta geh ñòm be dô nơm ào jrùh.

¹⁵Bơta àng neh roh thit bơh di cau iơh bơsak. Mơ tơwòr tê pò hơđang bol khai dê neh kong dơrpă.

¹⁶Gơs tŭ lơi mê lòt tus hơ tồ dàlềng dê. Hala cơnđòa lòt tòm tiah kơnàng jrô sơl?

¹⁷Ală mpồng dờng bơta chơt dê neh yal tơlik mê in sơl? Mê neh gŏ ală mpồng dờng bơta klam jơngo cik dê sơl?

¹⁸Mê neh git loh bơta pò ơnàng plai ù dê sơl? Dilah mê git jơh ală bơta hơ̆ gen yal tĕ.

¹⁹Ntềng đah gùng lòt tus di tiah ơm bơta àng dê taih? Mơ ntềng đah tiah bơta klam jơngo ơm taih?

²⁰Mê rgơi lam gơrê wơl hơ ù tiah tòm gơ dê, mơ git ală gùng lam tus hơ hìu ơm bol gơ dê sơl?

²¹Ngan, mê git bơh mê neh geh deh tòm tŭ hơ̆, mơ khà ală ngai mê dê la dờng ngan!

²²Mê neh mut tòm đam jàr dà piar, Hala neh sền gŏ tiah prap mìu piar,

²³Bơta lơi Añ neh prap lòi ngai bòl glar in, mơ lòi ală ngai tòmlơh mơ kơlìn gơtoă in sơl?

²⁴Ntềng đah gùng tus hơ tiah puhlèp tòmcah, hala tềng đah tiah mơ càl đah mattơngai lik gơkhồm làm hơđang plai ù?

²⁵Ñcau tò gùng mìu dà tih dê, Mơ wàs dô nơm gùng kơnàs ntơr in,

²⁶Nàng cèng mìu hơđang ù tiah ò gơs cau ơm, Hơđang ƀlàng bràs ò gơs kòn mơnus kis tềng hơ̆,

²⁷Nàng hừh nùs tiah rhàng srau mơ ù sang lòi ngềt ngơt, Mơ lơh ù hòn lik ñhơt ơ?

²⁸Mìu gơs bèp sơl? hala ñcau neh tơnggơs ală tơioh dà mơryuh taih?

²⁹Bơh hìu kòn cau lơi lơh gơlik tus dà lŭ taih? Mơ ñcau neh deh dà tŭ boh ală tap trồ dê taih?

³⁰Tòm tŭ ală dà gơlik gơs kră be lŭ, Tòm tŭ mat cìr jrô gơlik dà lŭ.

³¹Mê rgơi kơt che sreng Sơmañ Poh Nơm, Mơ hồ ală che kơt sơmañ Ngal sơl?

³²Mê rgơi lam tơlik sơmañ Majarot di di tŭ tơngai gơ dê, Hala lam sơmañ Jơgơu bal mơ ală kòn gơ dê sơl?

³³Mê git ală boh lam lơh nền ală tap trồ dê sơl? Mê rgơi bơtào gơs gơnoar at bồ hơđang plai ù sơl?

³⁴Mê rgơi tơngguh jơnau mê dê tus di ală mhwal, Mơ lơh dà tih rgơi jơm gòm mê sơl?

³⁵Mê rgơi sồr puhlèp lòt, gen tàng bol gơ lòt Mơ gơ đơs mơ mê lah: ‘Do, gơs bol hi’ sơl?

³⁶Ñcau neh ơn bơta jak chài tòm dơlam nùs, Hala ai bơta git wă dơngoh in?

³⁷Ñcau gơs bơta jak chài nàng kòp ală mhwal? Mơ ñcau rgơi sơrkềng lềng dà ală tap trồ dê

³⁸Tòm tŭ kơmbuh ù gơlik kơnut mơ ală pơnai ù gơđềt bal mơ gơp taih?