Read koho Jop 41 Bible Online

Jop 41 - koho bible

Jop 41

¹Ò gơs cau lơi khin bơrcek gơ; Behơ̆ gen ñcau rgơi ntào jai di đap Añ taih?

²Ñcau kòñ lùp dồs di Añ mơ Añ pal tơm wơl taih? Jơh ală phan hơđơm trồ gơrê bal mơ Añ.

³Añ pal đơs bơh ală jơng tê gơ dê, Bơh bơta pràn kơldang bal mơ bơta niam mơnĕ rùp să gơ dê.

⁴Ñcau rgơi hồ ào bơdìh gơ dê taih? Ñcau rgơi srơp bluh gơltau bàr tap gơ dê taih?

⁵Ñcau khin pò kơmbùng bơr gơ dê, Mơ bơta rngòt rngơt gơrwàng gùt dar sề gơ dê.

⁶Di ngkòi gơ gơs kung be ală khèl rơndap gơs sèng, tòmđềt bal kơ̆ ngan.

⁷Kòp nơm gơ tòmkap bal, Tian gơs nhơm kung ò rgơi mut lik digùl gơ.

⁸Gơ tòmjat sèng bal mơ gơp, Gơrềt bal mơ ò rgơi cah is.

⁹Ntas muh gơ dê gơđat bơta àng, Gar mat gơ ò gơkrơi kung be ală gùng bơta àng àng drim dê.

¹⁰Ală lơmpiat ồs gơbruh bơh di bơr gơ dê, Mơ ală kơmbuh ồs gơđat gùt dar.

¹¹Ñhŭ gơlik bơh di trồm muh gơ dê, Kung be dô nơm glah khuh hơđang ồs sing mơ proh.

¹²Nhơm tă gơ dê lơh hơng chah, Ală lơmpiat ồs gơbruh lik bơh di bơr gơ dê.

¹³Bơta pràn kơldang gơ dê ơm tòm ngko gơ, Mơ bơta kìr rngòt gơ lòt di đap gơ.

¹⁴Ală pet poac gơ dê gơtòmklĕ bal kơ̆ cê, bol gơ pràn kơldang ngan ò tŭ lơi wañ lơnggơh.

¹⁵Plai nùs gơ kră be lŭ, kră kung be pơnah hơđơm mpal lŭ.

¹⁶Tòm tŭ gơguh gen ală cau pràn kơldang rơm să rngòt; bol khai ruc wơl tài bơh nggồr ntas gơ dê.

¹⁷Tòm tŭ cau ai đào sreh gơ, gơ ò jê ò sồt, Bulah pềs tà hala kam sơna kung ò lơh gơ sồt jê sơl.

¹⁸Gơ sền lòs ò gơkrơi kung be rhe ñhơt, Mơ sền kòng gơlơh kung be chi ồm lề.

¹⁹Kam par ò lơh gơ in ntoat dô; Sơna lŭ pañ di gơ ò gơkrơi be nsiap gơwèt mơ gơ.

²⁰Gai mơng gơwèt mơ gơ kung be dô ngkòng rhe, Gơ ñŏ tơnhial sền òsơp di ală tà.

²¹Ngkàp hơđơm kơndul gơ sơmplàñ kung be nsàng khàr, Lòi dô nơm gùng tòm bŏ kung be gùng cau lơòr.

²²Gơlơh brong jrô in gơrơndul kung be dô nơm glah dà khuh; Mơ lơh dàlềng in gơlik gơs kung be dô nơm gri mơñà bong,

²³Lòi wơl đah ngkòi gơ kơmbuh gơcrà; Lơh cìr jrô cau sền be sŏ kò.

²⁴Hơđang ù ò gơs phan lơi ndròm bal be gơ La dô nơm phan kis ò rngòt di bơta lơi.

²⁵Gơ sền òsơp di jơh ală phan yò tơngguh să; Gơ la bơtau at bồ jơh ală phan pơnhừ să.”