Read koho Jop 6 Bible Online

Jop 6 - koho bible

Jop 6

¹Gen Jop ho wơl lah:

²“Ơ hơh! Kơp kòñ bơta moat jrùng añ jê geh kơr, Mơ bơta rung rài añ jê geh ơn hơđang phan kơr!

³Bơh gơ rơp kơnjơ̆ rlau mơ bràs tòm dàlềng, gen tàng ală jơnau añ jê neh đơs mhar ir;

⁴Bơh ală kam Bơtau Gơnap Gơnoar Làm Jơh dê di di añ, Hwềng añ hùc bơta bih khih gơ dê; Bơta rngòt rngơt Yàng Tom Trồ dê gơrwàng tòmdră mơ añ.

⁵Gơs tŭ lơi alàng brê nggà driau tòm tŭ gơs ñhơt? Hala kơnrồ nggà tòm tŭ gơs ñhơt ro sơl?

⁶Phan sa bơsàp ò sa mơ boh sơl ơ? Hala gơs ñchi bơkah tòm kơnồng bò tap iar taih?

⁷Tòm bơr añ ò bài sa gơ; Phan sa behơ̆ la cù kìr añ in.

⁸Ơ hơh! Kơp kòñ añ dòp geh bơta añ dan, Mơ Yàng Tom Trồ ai añ in bơta añ kòñ!

⁹Dilah Yàng Tom Trồ niam nùs mơ tơnlề añ, Lòi tê Kơnràñ dê tơnroh añ!

¹⁰Bơta do rơp gơlik bơta pơndòm pơniang añ jê, añ rơp gơs bơta hòn chò bulah bơta jê sồt ò dơh, Bơh añ ò pơndang sang ală jơnau đơs Bơtau Sàng Goh dê.

¹¹Bơta pràn kơldang añ jê la ñchi nàng añ gam kơp gơn taih? Bơta lồi dut añ jê la ñchi mơ añ pal kong ơt taih?

¹²Bơta pràn kơldang añ jê be bơta pràn kơldang lŭ ơ? Hala poac să añ la be kòng ơ?

¹³Ngan añ ò gơs bơta dong kòl añ in, mơ gơs bơta lơi neh dô lik bơh di añ.

¹⁴Cau gơplơ̆ nùs pal geh cau bơyô gơwèt niam, Bulah khai sang lòi bơta duh rngòt di Bơtau Gơnap Gơnoar Dờng Làm Jơh.

¹⁵Ală oh mi añ jê pơrlồm añ be ală croh dà soat, kung be hiòng dà tih nisơna.

¹⁶Dà lŭ lề lơh sơngkal dà, Mơ piar lề lơh dà sơngkal jù cik.

¹⁷Tòm tŭ kơnhai duh gơ roh thit, Tòm tŭ duh gơ roh thit bơh dê tiah gơ dê.

¹⁸Ală mpồl cau lòt gùng pleh lòt gùng ndai, bol khai lòt tus hơ tiah ngềt ngơt mơ roh rui.

¹⁹Ală mpồl cau lòt gùng bơh Thema jòi dà hùc, Ală cau lòt gùng bơh Seba jòi dà mơ kơp kòñ.

²⁰Bol khai gơplơ̆ nùs tài bơh bol khai neh dòn kơnòm; bol khai tus tềng hơ̆ gen gơplơ̆ nùs ngan.

²¹Tŭ do oh mi kung ò kwơ añ in dô êt lơi; Oh mi gŏ bơta rung rài añ jê, gen rngòt rngơt.

²²Gơs tŭ lơi añ đơs lah: ‘Dan ai phan pà gòi añ in ơ?’ Hala ơn phan loă añ in bơh phan mơna bol mê dê.

²³Dan dong tă añ klàs bơh tê cau tòmdră, hala tơwài añ bơh tê cau rồn bơklơn, sơl ơ?

²⁴Bơto añ gen añ rơp ơm mŏ mŏ; Dan sơnio añ in git wă bơta lơi añ neh tìs.

²⁵Jơnau đơs song gơs gơnoar pràn! Mơya ală jơnau lah pơrhơng oh mi dê gơs kwơ lơi sơl?

²⁶Oh mi kòñ lah pơrhơng jơnau đơs, Mơ sền jơnau đơs dô nă cau ò pơlai să kung be càl khồm?

²⁷Oh mi tă khà hơđang kòn đòi, Mơ pơndang sang cau bơyô oh mi dê.

²⁸Mơya tŭ do, dan oh mi rmê tĕ di añ, bơh añ ò đơs blac di đap oh mi.

²⁹Dan bañ gơs bơta ò song ring. Kơlôi sơwì wơl tĕ, bơh añ gam la cau song ring be òs.

³⁰Gơs bơta tìs lơi tòm lơmpiat añ jê sơl? Bơr añ jê ò git đal bơta iơh bơsak ò ơ?”