Read koho Jop 7 Bible Online

Jop 7 - koho bible

Jop 7

¹“Ò di la rài kis kòn mơnus pal lơh broă bòl glar tòm dunnia ò ơ? Mơ ò di la ală ngai rài kis bol khai dê kung be ală ngai dô nă cau lơh broă bòl glar ò ơ?

²Kung be cau dĭ kơp gơn trồ mƀur, mơ kung be cau lơh ơpah kơp gơn jền tơngai,

³Behơ̆ añ la cau neh dòp geh ală kơnhai ò gơs chi lơi, Mơ ală mang bòl glar lơh gơs ală pơnah geh tòmpà añ in.

⁴Tòm tŭ añ bic gen añ đơs lah: ‘Tŭ lơi sồng añ rơp guh taih?’ Mơya mang jòng ngan, mơ añ ò gơ ai bic jơl tus rìng àng.

⁵Poac añ soh tu rhài mơ thul ơmul; Gơltau añ dàng mơ gơhòr lik ndơng.

⁶Ală ngai añ jê mhar rlau mơ dô nơm gai pơdar tàñ ồi, Tus di lồi dut gơ dê ò gơs bơta kơp kòñ lơi.

⁷Ơ Yàng Tom Trồ, dan kah tĕ lah bơta kis añ jê kung be nhơm tă; Gar mat añ rơp ò gơs tŭ lơi gŏ bơta niam tai.

⁸Gar mat gŏ añ tŭ do rơp ò gŏ añ tai, Yàng rơp jòi añ, mơya añ ò gam tai.

⁹Kung be mhwal gơ par roh thit, behơ̆ cau mù tòm lơgar làng ƀồc kung ò rê wơl tai.

¹⁰Bol khai ò rê wơl hơ hìu bol khai dê tai, tiah ơm bol khai dê ò git đal bol khai tai.

¹¹Gen tàng, añ rơp ò ơm mŏ mŏ, Añ rơp đơs tòm bơta jê sồt hwềng soàn añ jê, Añ rơp yoam tòm bơta sràt bơtang hwềng soàn añ jê.

¹²Añ la dô nơm dàlềng hala dô nơm nagrài, Gen tàng Yàng ơn cau kơp gàr añ taih?

¹³Tòm tŭ añ đơs: ‘Cơnòng bic añ rơp pơndòm pơniang añ, Cơnòng bic añ rơp lơh rài jơnau yoam añ jê.’

¹⁴Gen Yàng tơrngòt añ mơ bơta mpau, mơ pơhìn tơrngòt añ mơ bơta gơtơnggŏ.

¹⁵Tian gơs añ sac chơt gơkòl nhơm, La niam rlau mơ kis tòm să jan do.

¹⁶Añ neh dil bơta kis añ jê, añ rơp ò kis gam sùm sùm, Dan lòi dò añ jê, bơh ală ngai añ jê la dô nhơm tă.

¹⁷Jơi kòn mơnus la ñchi mơ Yàng neh lơh bol khai in oă ngan, Ñchi bơh tài Yàng ơn nùs kơlôi di khai,

¹⁸còp khai kòp àng drim, mơ lòng khai kòp tŭ kòp jơ taih?

¹⁹Yàng rơp ò tŭ lơi pleh mat bơh di añ tòm dô ơthoa, lòi tĕ dò añ jơl tus añ loan dà diau sơl ơ?

²⁰Dilah añ neh tìs glài, ñchi bơta añ lơh di Yàng taih? Yàng la Cau Ê Gàr jơi kòn mơnus! Ñchi bơh tài Yàng lơh añ gơlik dô nơm tơnggu pañ taih? Ñchi bơh tài añ neh gơlik gơs dô nơm ơnòng kơnjơ̆ Yàng in taih?

²¹Ñchi bơh tài Yàng ò toh ală bơta tìs añ jê, Mơ ò tă ngài ală bơta tồi glài añ jê taih? Bơh tŭ do añ rơp bic tòm ù; Yàng rơp jòi añ, mơya añ rơp ò gam gơs tai.”