Read koho Jop 8 Bible Online

Jop 8 - koho bible

Jop 8

¹Gen Bildak cau Sua ho wơl lah:

²“Nđò jŏ ồng rơp đơs ală jơnau hơ̆ taih? Mơ ală jơnau đơs bơr ồng dê la kung be càl rbut dờng.

³Yàng Tom Trồ lơh tìs bơta song ring ơ? Hala Bơtau Gơnap Gơnoar Làm Jơh ò lơh dimơ bơta song ring ơ?

⁴Dilah ală kòn ồng neh tìs glài tòmdră mơ Kơnràñ, Kơnràñ neh jào bol khai tòm gơnoar lơh glài bơta tìs glài bol khai dê.

⁵Mơya dilah ồng rơp jòi jat Yàng Tom Trồ, Mơ rac dan mơ Bơtau Gơnap Gơnoar Làm Jơh;

⁶Dilah ồng sàng goh mơ song ring, Gen ngan să tòm Kơnràñ rơp ñă ntào tài bơh ồng, Mơ bơtào wơl ồng tòm tiah song ring ồng dê.

⁷Bulah bơta bồ dà ồng dê la dềt rhền, Mơya tơnơ̆ ồng dê rơp geh dờng ngan.

⁸Tŭ do lùp tĕ ală cau rài yau neh lòt rlau, mơ sền sơwì ală bơta ală ồng pàng bol khai dê neh jòi bàn.

⁹Mơya bơh bol he neh gơs bơh ngai òr, mơ bol he ò git bơta lơi; Mơ ală ngai bol he dê tòm ù la ò gơkrơi kung be dô nơm mƀur.

¹⁰Bol khai ò bơto mơ ò yal ồng in git ơ? Bol khai ò yal tơlik jơh ală jơnau bơh bơta git wă bol khai dê ơ?

¹¹Proh tràng rgơi hòn tòm tiah ò gơs bŏ ơ? Cơndung rgơi hòn tòm tiah ò gơs dà ơ?

¹²Tòm tŭ gam bơnung mơ òhềt cau koh, Gơ ro mhar rlau mơ ală jơi ñhơt ndai.

¹³Hơ̆ la gùng dà ală cau hŭi Yàng Tom Trồ; Bơta kơp kòñ cau ò dòn duh dê rơp roh rui.

¹⁴Bơta dòn kơnòm bol khai dê la bơta pùh lơho, bol khai gơn kơnòm di che blung dê.

¹⁵Dilah cau lơi sơnđìng di hìu khai dê, khai rơp ò gam ntào; dilah cau lơi sơmbat at gơ, gơ rơp ò jai kong.

¹⁶Cau iơh bơsak bơtào tơngguh di đap mattơngai, gơ gơcat ntê pa làm jơh tòm suơn.

¹⁷Ryas gơ dê gơƀar gùt dar gơnru lŭ, Mơ gơ kis digùl ală pơnai lŭ.

¹⁸Dilah gơ gơkòl dus bơh di tiah gơ dê, Gen tiah hơ̆ rơp ò dòp gơ mơ đơs lah: ‘Añ òhềt tŭ lơi gŏ mê!’

¹⁹Ne, hơ̆ la gùng dà lơngai lơngò bol khai dê, Mơ bơh di ù tiah gam gơs ală chi che ndai hòn lik.

²⁰Sền tĕ, Yàng Tom Trồ rơp ò sang lòi dô nă cau wil tơl, Hala tă tê nàng dong cau lơh bơta iơh bơsak,

²¹Kơnràñ rơp tơmbềng bơr ồng dê mơ bơta ñŏ; Mơ sơndồi ồng dê mơ jơnau driau chò.

²²Ală cau sò tơm ồng dê rơp soh bơta ƀàssìl, Mơ ală sàl cau iơh bơsak dê rơp ò gam tai.”