Read koho Jop 9 Bible Online

Jop 9 - koho bible

Jop 9

¹Gen Jop ho wơl lah:

²“Di ngan, añ git lah ngan behơ̆; Mơya mbe rgơi dô nă kòn mơnus geh song ring di đap Yàng Tom Trồ taih?

³Dilah cau lơi kòñ tòm pơndang mơ Kơnràñ, Gen khai ò rgơi ho wơl Kơnràñ dô dơ̆ tòm dô rbô dơ̆.

⁴Bơta jak chài tòm nùs Kơnràñ dê, mơ gơnap gơnoar tòm bơta pràn Kơnràñ dê. Cau lơi tòmdră mơ Kơnràñ mơ gam geh pơnjat sùm sơl?

⁵Kơnràñ cèng pơrdô ală mơnơm mơ bol gơ ò git, tuh tơlup bol gơtòm bơta gơhào gơjrañ Kơnràñ dê.

⁶Kơnràñ rơnggô plai ù bơh tiah gơ dê, Mơ lơh ală jrong gơ dê gơlơnggơr.

⁷Kơnràñ sồr mattơngai mơ gơ ò pơnđàng sòl, Kơnràñ til wơl bơta àng ală sơmañ dê.

⁸Mìng dô nă Kơnràñ lì ală tap trồ, Mơ jă trơm ală ryà dàlềng dê.

⁹Kơnràñ la Bơtau lơh gơs mpồl sơmañ Jơgơu mơ mpồl sơmañ Ngal. Mpồl poh sơmañ mơ ală mpồl sơmañ đah đơm dê.

¹⁰Kơnràñ lơh ală broă dờng rlau mơ bơta git wă, bơta crih crài ò rgơi kòp.

¹¹Ne, Kơnràñ lòt gan di đap añ, mơ añ ò gŏ Kơnràñ, Kơnràñ sơrlèt rlau mơya añ ò đal git Kơnràñ.

¹²Dilah Kơnràñ sơmbat kup, ñcau rgơi kơryan Kơnràñ taih? Ñcau rơp đơs mơ Kơnràñ lah: ‘Ñchi Yàng lơh taih?’

¹³Yàng Tom Trồ rơp ò pơrlac bơta gơjrañ Kơnràñ dê; Bulah ală cau dong kòl Rahap tơmbic să di jơng Kơnràñ.

¹⁴Behơ̆ gen mbe añ rgơi ho wơl mơ Kơnràñ, Mơ jòi jơnau mơ Kơnràñ taih?

¹⁵Bulah añ ò gơs glài, añ kung ò rgơi ho wơl mơ Kơnràñ; Añ pal rac dan bơta nđàc mơ Bơtau cahrña añ jê.

¹⁶Dilah añ hòi dan, mơ Kơnràñ ho wơl añ, Añ kung ò dòn lah Kơnràñ ơm iat jơnau đơs añ jê.

¹⁷Bơh Kơnràñ tơnlề añ tòm càl rbut dờng, Mơ bơtơl oă tềl sồt añ in ò bồ.

¹⁸Kơnràñ ò lòi añ in geh tă nhơm; Mơya Kơnràñ tơmbềng añ mơ bơta sràt bơtang.

¹⁹Dilah đơs bơh bơta pràn gen Kơnràñ la Bơtau gơs gơnoar pràn. Dilah đơs bơh bơta song ring gen ñcau rgơi yă Kơnràñ taih?

²⁰Bulah añ ò gơs glài, bơr añ rơp kup glài añ; Dilah añ wil tơl, Kơnràñ rơp lơh cơng añ la cau neh rkwet rkwe.

²¹Bulah añ wil tơl, añ kung ò git să tòm añ jê, Añ sền cù kìr dê bơta kis añ jê.

²²Jơh ală bơta la ndròm bal gen tàng añ đơs, ‘Kơnràñ tơnroh cau wil tơl bal mơ cau iơh bơsak.’

²³Tòm tŭ bơta rung rài cèng bơta chơt dô bă nisơna, Kơnràñ dơñŏ tơnhial di cau ò gơs glài tìp bơta gơlòng bòl glar.

²⁴Plai ù gơmut tòm tê cau iơh bơsak; Kơnràñ jơm mat ală cau kwang cahrña gơ dê. Dilah ò di la Kơnràñ gen hơ̆ la ñcau taih?

²⁵Ală ngai añ jê gơ lòt mhar rlau mơ cau ntoat pơrlòng; bol gơ par roh thit ò gŏ bơta niam lơi.

²⁶Bol gơ lòt gan mhar kung be ală plung lơh mơ gle mơ đơr, Kung be ală klàng bung srà mù kup phan sa.

²⁷Dilah añ đơs: ‘Añ rơp hŭi bơta ƀoah pơrhiat añ jê, Añ rơp tă sang muh mat moat jrùng añ jê mơ gơlik chò hòp.’

²⁸Gen añ kung gam rngòt rngơt di ală bơta jê sồt añ jê, Bơh añ git lah Kơnràñ ò kòp añ la cau ò gơs glài.

²⁹Bơh añ rơp kong lơh nền glài. Ñchi bơh tài añ kong bòl glar lơh broă ò kwơ taih?

³⁰Dilah añ um să añ tòm dà piar, Mơ rào tê añ mơ dà sơnơm,

³¹Gen Kơnràñ kung rơp sang añ tòm tiah ƀơ̆ ƀơl, mơ ồi ào añ jê kung cù kìr di añ.

³²Yàng Tom Trồ ò di la kòn mơnus kung be añ, mơ añ rgơi ho Kơnràñ; Mơ bol he pal ntào bal tòm tiah cahrña.

³³Ò gơs cau lơi cahrña digùl bol he. Ơn tê khai dê hơđang bàr nă bol he.

³⁴Dilah Kơnràñ rơp tă gai Kơnràñ dê bơh di añ, mơ ò lòi bơta rngòt Kơnràñ dê tơn iu añ;

³⁵Gen añ rơp ò rngòt mơ đơs mơ Kơnràñ; bơh añ git, bơta añ kơlôi sơnơng, ò di la añ.”