Read koho Đơs Crih 102 Bible Online

Đơs Crih 102 - koho bible

Đơs Crih 102

¹Bơta hòi dan cau bòl glar dê, tòm tŭ jê nùs gen yal tơlik bơta moat jrùng he dê di đap Yàng Jehôwa Ơ Yàng Jehôwa, dan iat jơnau hòi dan añ jê; Dan jơnau rac dan añ jê geh tus hơ Kơnràñ!

²Tòm ngai bòl glar añ jê, dan bañ pồn mat Kơnràñ bơh di añ! Dan wèt tồr iat añ; Tòm ngai añ rac dan, dan mhar ho wơl añ in!

³Bơh ală ngai añ jê lòt gan rlau be ñhŭ, Mơ ală ntìng añ jê duh be dô nơm bơnhă.

⁴Nùs añ kong pù lơh mơ ro rañ be ñhơt, Gen tàng añ hŭi sa piang.

⁵Tài bơh jơnau rơnđơh dờng añ jê, Gen ală ntìng añ jê gơđềt di gơltau añ jê.

⁶Añ gơlik ndròm be grơt ơm tòm tiah ngềt ngơt, Ò gơkrơi be sềm klàng bơkào ơm tòm ală tiah lòi srau.

⁷Añ bic ò lơhă, Añ ndròm be dô nơm sềm ơm is hơđang rkàng hìu.

⁸Jơh ngai mho ală cau sò tơm dơñŏ tơnhial di añ, Ală cau bơrcek añ, bol khai ai sơnđan añ mơ srat rma.

⁹Bơh añ sa bùh be sa piang lă, Mơ dà mat añ jê gơcrài bal mơ phan ñô,

¹⁰Tài bơh bơta gơhào nùs mơ bơta gơjrañ dờng Yàng dê, Bơh Yàng neh yò añ hơđang mơ sang sơrbì añ.

¹¹Ală ngai añ jê mòr jơh kung be mƀur trồ mho; Añ ro rañ be ñhơt.

¹²Mơya, ơ Yàng Jehôwa, Kơnràñ nggui hơđang sơbàn gam sùm sùm; Sơnđan Kơnràñ dê gam gơs jơl ală rài.

¹³Yàng rơp guh mơ nđàc sơngit di Siôn; Do la tŭ ai bơta nđàc Siôn in, bơh tŭ tơngai lơh nền neh tus rau.

¹⁴Bơh ală cau duh broă Yàng dê kòñ gơboh ală pơnai lŭ Siôn dê, Mơ nđàc sơngit di kơmbuh ù gơ.

¹⁵Ală làng bol rơp duh rngòt di sơnđan Yàng Jehôwa, Mơ jơh ală cau bơtau dunnia dê rơp duh rngòt di bơta gơklŏ Kơnràñ dê.

¹⁶Tòm tŭ Yàng Jehôwa rơp bơt bơtào Siôn, Gen Kơnràñ rơp tơlik mat tòm bơta gơklŏ Kơnràñ dê.

¹⁷Kơnràñ rơp wèt sền jơnau hòi dan cau dồn sa rƀah dê, mơ ò sền òsơp di jơnau rac dan bol khai dê.

¹⁸Cih tĕ jơnau do lòi wơl rài tơnơ̆ in, Nàng dô nơm làng bol òhềt deh rgơi jòng ro Yàng Jehôwa:

¹⁹Bơh di tiah sàng goh hơđang jòng Kơnràñ neh tơmềt sền, Bơh đang trồ Yàng Jehôwa sền gŏ dunnia,

²⁰Nàng kơno jơnau ñìm rac cau ơm jàm dê, Mơ hồ toh cau kòl lơh nền chơt;

²¹Tồ sơnđan Yàng Jehôwa dê geh yal tơlik tòm Siôn, Mơ jòng ro Kơnràñ tòm Jerusalem,

²²Tòm tŭ ală làng bol pơjum bal Mơ ală lơgar nàng duh khoai Yàng Jehôwa.

²³Kơnràñ neh lơh bơta pràn kơldang añ jê gơlik lơbơn tòm gùl rài, Kơnràñ neh tơnliah ală ngai añ jê.

²⁴Añ đơs lah: “Ơ Yàng Tom Trồ añ jê, ală sơnam Yàng dê gam sùm sùm jơl jơh ală rài, Dan bañ tă añ tòm gùl khà ală ngai añ jê.”

²⁵Bơh rài yau Yàng neh bơtào kơ̆ mơnàng plai ù, Ală tap trồ la broă tê Kơnràñ lơh.

²⁶Trồ tiah rơp roh rui, mơya Yàng gam sùm sùm; Trồ tiah rơp puh lơho be ào; Yàng rơp tòmgơl trồ tiah be ào, mơ gơ roh thit.

²⁷Mơya Yàng gam sùm sùm be òs, Ală sơnam Yàng dê ò gơs tŭ lơi lồi.

²⁸Kòn sau ală cau duh broă Yàng dê rơp ơm lơngai; Jơi bơtiàn bol khai dê rơp geh bơtào kơ̆ di đap Kơnràñ.