Read koho Đơs Crih 103 Bible Online

Đơs Crih 103 - koho bible

Đơs Crih 103

¹Jơnau Đơs Crih Dabit cih Ơ hwềng soàn añ jê, jòng ro tĕ Yàng Jehôwa; Jơh ală bơta lơi ơm tòm añ, jòng ro tĕ sơnđan sàng goh Kơnràñ dê!

²Ơ hwềng soàn añ jê, jòng ro tĕ Yàng Jehôwa, Bañ hŭi jơh ală bơta nđàc Kơnràñ dê.

³Hơ̆ la Kơnràñ toh jơh ală tồi glài iơh bơsak mê dê, Sơmbòi jơh ală bơta kòp jê mê dê.

⁴Kơnràñ dong tơwài bơta kis mê dê klàs bơh tiah roh rui, Ai bơta kòñ gơboh kơ̆ dơn mơ bơta kòñ nđàc lơh gơs be sơgơn Bơtau tơndau mê in.

⁵Kơnràñ lơh mê in hừh hơh bơh ală phan niam tòm jơh rài kis mê dê, Nàng mê in geh wơl pràn kơldang be gam pơnu, kung be bơta pràn kơldang klàng bung dê.

⁶Yàng Jehôwa lơh bơta song ring Mơ song ngan gơwèt mơ jơh ală cau kong rồn bơklơn.

⁷Kơnràñ yal tơlik Môise in git ală gùng dà Kơnràñ dê, Mơ yal tơlik làng bol Israel in git ală broă Kơnràñ dê.

⁸Yàng Jehôwa gơs nùs nđàc sơngit mơ kòñ nđàc, Òbat gơhào gơjrañ, mơ bềng bơta kòñ gơboh kơ̆ dơn.

⁹Kơnràñ ò lah pơrhơng sùm, Kung ò prap nùs gơjrañ sùm sùm.

¹⁰Kơnràñ ò lơh di bol he jat ală tồi glài bol he dê, Kung ò sal wơl di bol he jat ală tồi glài iơh bơsak bol he dê.

¹¹Bơh ală tap trồ la jơnhoa hơđang ù kàr lơi, Gen bơta kòñ gơboh kơ̆ dơn Kơnràñ dê kung dờng kàr hơ̆ sơl gơwèt mơ ală cau duh rngòt di Kơnràñ.

¹²Đah mattơngai lik la ngài mơ đah mattơngai mut kàr lơi, Gen Kơnràñ kung tă sang bơta tìs glài bol he dê ngài kàr hơ̆ sơl.

¹³Yàng Jehôwa nđàc sơngit di cau duh rngòt di Kơnràñ, Ò gơkrơi be bèp nđàc sơngit di ală kòn khai dê behơ̆ sơl.

¹⁴Bơh Kơnràñ git bol he geh crơng gơs mbe lơi, Kơnràñ kah wơl lah bol he la kơmbuh ù.

¹⁵Rài kis kòn mơnus dê la be ñhơt; Khai gơlik dờng ò gơkrơi be bơkào tòm ƀlàng;

¹⁶Càl khồm di bơkào gen gơ ò gam tai, Mơ cau ò đal git tiah ơm gơ dê tai.

¹⁷Mơya bơta kòñ gơboh kơ̆ dơn Yàng Jehôwa dê gam sùm sùm Gơwèt mơ ală cau duh rngòt di Kơnràñ, Mơ bơta song ring Kơnràñ dê gam sùm sùm gơwèt mơ sau set bol khai dê.

¹⁸Hơ̆ la ai cau lơi in prap gàr bơta ho bal Kơnràñ dê, Mơ kah wơl ală bơta sồr lam Kơnràñ dê nàng lơh jat.

¹⁹Yàng Jehôwa neh bơtào kơ̆ sơbàn Kơnràñ dê hơđang ală tap trồ, Lơgar Kơnràñ dê at bồ hơđang jơh ală bơta.

²⁰Jòng ro tĕ Yàng Jehôwa, ơ ală cau gơnrơh Kơnràñ dê, La ală cau gơs gơnoar pràn lơh jat jơnau sồr Kơnràñ dê, mơ kơno jơnau đơs Kơnràñ dê.

²¹Ơ mpồl ling Yàng Jehôwa dê, La ală cau duh broă jat nùs kòñ Kơnràñ dê, jòng ro tĕ Yàng Jehôwa.

²²Jòng ro tĕ Yàng Jehôwa, ơ jơh ală broă Kơnràñ dê, tòm jơh ală tiah tòm lơgar Kơnràñ dê. Ơ hwềng soàn añ jê, jòng ro tĕ Yàng Jehôwa!